ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງເງິນ ແຂວງ ໄຊຍະບູລີ ສໍາເລັດ ກອງປະຊຸມໃຫຍ່ຜູ້ແທນອົງຄະນະພັກ ຄັ້ງທີ v

ພາຍຫຼັງທີ່ໄດ້ດໍາເນີນກອງປະຊຸມໃຫຍ່ ຄັ້ງທີ V ອົງຄະນະພັກເມືອງ ເງິນ, ແຂວງ ໄຊຍະບູລີ ມາເປັນເວລາ 2 ວັນ, ຈຶ່ງໄດ້ອັດລົງດ້ວຍຜົນສໍາເລັດຢ່າງຈົບງາມ, ໃນຕອນບ່າຍຂອງວັນທີ 24 ທັນວາ ປີນີ້, ທີ່ຫ້ອງປະຊຸມຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ຄໍາແພງ ຕັດສະຫວັດ ກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງ ເງິນ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງ ປາກແບງ, ແຂວງ ອຸດົມໄຊ ແລະ ບັນດາເມືອງອ້ອມຂ້າງ ເຂົ້າຮ່ວມ 150 ກວ່າສະຫາຍ.

ກອງປະຊຸມໄດ້ພ້ອມກັນຄົ້ນຄວ້າ ແລະ ເປັນເອກະພາບກັນຮັບຮອງເອົາບົດລາຍງານການເມືອງ, ແຜນ​ພັດທະນາ​ເສດຖະກິດ-ສັງຄົມ ​ແລະ ບົດ​ສໍາ​ຫຼວດການ​ນໍາພາ​ລວມຂອງຄະນະບໍລິຫານງານພັກເມືອງຊຸດທີ IV ໃນໄລຍະ 5 ປີຜ່ານມາ ແລະ ທິດທາງແຜນການ 5 ປີ 2020– 2024 ເພື່ອ ສ້າງພື້ນຖານໃຫ້ອົງຄະນະພັກເມືອງນຳພາປະຊາຊົນບັນດາເຜົ່າຫຼຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາ. ກອງ​ປະຊຸມ​ໄດ້​ຟັງ​ການ​ປະກອບ​ຄໍາ​ເຫັນ​ຈາກ​ຜູ້ຕາງໜ້າ​ຫຼາຍ​ພາກສ່ວນ, ​ເຊິ່ງສ່ວນ​ຫຼາຍ​ໄດ້​ລົງ​ເລິກ​ລາຍ​ງານ​ຜົນ​ສໍາ​ເລັດ​ແຫ່ງ​ການ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ຄັ້ງທີ IV ​ເຂົ້າ​ໃນ​ແຕ່ລະ​ຂົງ​ເຂດ​ວຽກ​ງານ​ກົມ​ກອງ, ຂະ​ແໜງ​ການ​ຂອງ​ຕົນ​ເອງ, ​ອັນໄດ້​ເຮັດ​ໃຫ້​ກອງ​ປະຊຸມ​ມີ​ເນື້ອ​ໃນ​ສົມບູນຄົບຖ້ວນ​ ແລະ ​ໄດ້ດໍາເນີນການປ່ອນບ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ພັກ​ເມືອງ​ຊຸດ​ທີ V ເຊິ່ງມີຜູ້ຮັບສະໝັກທັງໝົດ 29 ສະຫາຍ, ຍິງ 3 ສະຫາຍ, ໃນນີ້ເລືອກເອົາ 25 ສະຫາຍ, ອາຍຸສູງສຸດ 59 ປີ, ຕໍ່າສຸດ 38 ປີ, ອາຍຸສະເລ່ຍ 48 ປີ, ກອງປະຊຸມໄດ້ເປັນເອກະພາບກັນ ເລືອກເອົາ ສະຫາຍ ຄໍາແພງ ຕັດສະຫວັດ  ເປັນເລຂາຄະນະບໍລິຫານງານພັກເມືອງ, ສະຫາຍ ສອນສຸກ ພວງແກ້ວ ເປັນຮອງເລຂາ, ສະຫາຍ ບຸນສົດ ອິນທະປັນຍາ ເປັນຮອງເລຂາ ທັງເປັນປະທານຄະນະກວດກາພັກເມືອງ, ເລືອກເອົາ ສະຫາຍ ບຸນລົ້ນ ຄໍາພະວົງ ແລະ ສະຫາຍ ຄໍາມ່ວນ ພົມປັນຍາ ເປັນຮອງປະທານ, ຕອນທ້າຍຂອງກອງປະຊຸມໄດ້ຮັບຟັງການໂອ້ລົມຂອງສະຫາຍເລຂາພັກແຂວງ, ຊິ່ງສະຫາຍໄດ້ເນັ້ນໜັກບາງບັນຫາສໍາຄັນເຊັ່ນ: ຄະນະພັກຂັ້ນຕ່າງໆ ຕ້ອງຖືສໍາຄັນຄົ້ນຄວ້າ, ເຊື່ອມຊຶມກໍາແໜ້ນ ແລະ ຮູ້ຜັນຂະຫຍາຍ ແນວທາງນະໂຍບາຍ, ມະຕິ, ຄໍາສັ່ງ, ນິຕິກໍາຕ່າງໆ ຂອງຂັ້ນເທີງ ກາຍເປັນອັນລະອຽດຂອງຄະນະພັກຕົນ ໃຫ້ສອດຄ່ອງກັບສະພາບຄວາມເປັນຈິງ ແລະ ນໍາພາຈັດຕັ້ງປະຕິບັດໃຫ້ມີຜົນສໍາເລັດ, ເພີ່ມຄວາມຊີ້ນໍາ-ນໍາພາ ແກ້ໄຂບັນດາປະກົດການຫຍໍ້ທໍ້ທີ່ເກີດຂື້ນຢ່າງຕັ້ງໜ້າ ແລະ ແຂງແຮງກວ່າເກົ່າ ໃນຖັນແຖວພະນັກງານ, ສະມາຊິກພັກ ແລະ ໃນໝູ່ປະຊາຊົນເຊັ່ນ: ການສວຍໃຊ້ໜ້າທີ່ຕໍາແໜ່ງ ເພື່ອຜົນປະໂຫຍດສ່ວນຕົວ, ການຫຼີ້ນກິນຟຸມເຟືອຍ, ບັນຫາການຄ້າ-ຂາຍສິ່ງເສບຕິດ, ຂີ້ລັກງັດແງະ, ອຸບັດຕິເຫດຕາມທ້ອງຖະໜົນ, ການລັກລອບຕັດໄມ້ຕາມບໍລິ ເວນຊາຍແດນ, ການອອກ-ເຂົ້າເມືອງບໍ່ຖືກຕ້ອງ ແລະ ບັນຫາອື່ນໆ, ພ້ອມທັງຜັນຂະຫາຍມະຕິກອງປະຊຸມໃຫຍ່ຄັ້ງນີ້ເຂົ້າສູ່ຊີວິດຕົວຈິງໃຫ້ມີຜົນສໍາເລັດຕາມຄາດໝາຍທີ່ວາງໄວ້.

 

ຂ່າວ-ພາບໂດຍ: ອຸ່ນເຮືອນ ໂພທິລັກ