ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງເງິນ ໄຂກອງປະຊຸມໃຫຍ່ຜູ້ແທນອົງຄະນະພັກ ຄັ້ງທີ v

ກອງປະຊຸມໃຫຍ່ຄັ້ງທີ V ຂອງອົງຄະນະພັກ ເມືອງ ເງິນ, ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 23 ທັນວາ 2019, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ຄໍາແພງ ຕັດສະຫວັດ ກໍາມະການພັກແຂວງ, ເລຂາພັກເມືອງ, ເຈົ້າເມືອງ-ເມືອງ ເງິນ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງ ປາກແບງ, ແຂວງ ອຸດົມໄຊ ແລະ ບັນດາເມືອງອ້ອມຂ້າງ ເຂົ້າຮ່ວມ 150 ກວ່າສະຫາຍ, ໃນນັ້ນມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 87 ສະຫາຍ, ຍິງ 8 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 959 ສະຫາຍ.

ໃນວາລະດໍາເນີນກອງປະຊຸມ ສະຫາຍ ຄໍາແພງ ຕັດສະຫວັດ  ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງລາຍງານການເມືອງທັງສອງພາກຊຶ່ງໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ໂດຍຍົກໃຫ້ເຫັນເຖິງຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິໜ້າວຽກບັດຕົວຈິງ, ພ້ອມທັງໄດ້ກໍານົດທິດທາງ ແລະ ຄາດໝາຍສູ້ຊົນ 5 ປີຕໍ່ໜ້າ ( 2019-2024 ), ໄລຍະຜ່ານມາທົ່ວເມືອງ ຍັງມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ໃນລະດັບ 11% ຕໍ່ປີ, ລວມຍອດຜະລິດຕະພັນພາຍໃນ ບັນລຸ 414,70 ຕື້ກີບ, ສະເລ່ຍລາຍຮັບຕໍ່ຫົວຄົນບັນລຸໄດ້ 21,94 ລ້ານກີບ, ຫຼືເທົ່າກັບ 2.581 ໂດລາ, ທຽງໃສ່ປີ 2014 ເພີ່ມຂຶ້ນ 970 ໂດລາ ແລະ ທຽບໃສ່ແຜນການ 5 ປີປະຕິບັດໄດ້ 90,08%, ການຜະລິດກະສິກໍາເປັນສິນຄ້າໄດ້ເພີ່ມຂຶ້ນ ເປັນຕົ້ນແມ່ນ:  ໝາກເດືອຍ, ຂີງພັນ, ສາລີແຂງ, ຫົວສີໃຄເຄື່ອງ ແລະ ພືດຜັກອື່ນໆ, ການລ້ຽງສັດກໍ່ໄດ້ຫັນປ່ຽນຈາກການລ້ຽງແບບທໍາມະຊາດໄປສູ່ການລ້ຽງແບບເປັນກຸ່ມ, ເປັນຟາມ ຕິດພັນກັບການປູກຫຍ້າ, ການພັດທະນາພື້ນຖານໂຄງລ່າງເຊັ່ນ: ເສັ້ນທ າງຄົມມະນາຄົມ, ໄຟຟ້າ, ນໍ້າປະປາ ແລະ ອື່ນໆໄດ້ຮັບການຍົກລະດັບດີຂຶ້ນ, ເປົ້າໝາຍການພັດທະນາແບບຍືນຍົງຂອງວຽກງານສືກສາ, ສາທາລະນະສຸກ ສ່ວນໃຫຍ່ໄດ້ປະຕິບັດບັນລຸຕາມຄາດໝາຍ, ຄຸນນະພາບການຮຽນ-ການສອນນັບມື້ດີຂຶ້ນເປັນກ້າວໆ, ໄດ້ຮັບຮອງເປັນບ້ານສາທາລະນະສຸກແບບຢ່າງ 21 ບ້ານ, ບ້ານແຮງງານ ແລະ ສະຫວັດດີການ-ສັງຄົມ 8 ບ້ານ, ບ້ານວັດທະນະທໍາ 21 ບ້ານ, ບ້ານພັດທະນາ 21 ບ້ານ ແລະ ໄດ້ສຸມໃສ່ແກ້ໄຂຄວາມທຸກຍາກຂອງປະຊາຊົນ, ປະຈຸບັນຄອບຄົວທຸກຍາກຍັງເຫຼືອ 561 ຄອບຄົວ, ເທົ່າກັບ 15,4% ( ຕາມດໍາລັດ 348/ລບ ), ກອງປະຊຸມ ສະຫາຍ ບຸນສົດ ອິນທະປັນຍາ ຮອງເລຂາພັກເມືອງ, ຮອງເຈົ້າເມືອງ ກໍ່ໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ຈາກນັ້ນຜູ້ແທນກອງປະຊຸມຍັງຈະໄດ້ພ້ອມກັນຄົ້ນຄົ້ວ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກຄັ້ງທີ V, ຄັດເລືອກເອົາຄະນະບໍລິຫານງານພັກເມືອງຊຸດໃໝ່, ຮັບຟັງການປະກອບຄໍາຄິດຄໍາເຫັນຂອງບັນດາຫ້ອງການ, ກົມກອງ ແລະ ຕົວແບບດ້ານຕ່າງໆ, ກອງປະຊຸມຍັງຈະໄດ້ຮັບຟັງການໂອ້ລົມຂອງ ສະຫາຍ ເລຂາພັກແຂວງ ແລະ ຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ນັກຂ່າວ: ຫ້ອງວ່າການແຂວງ ໄຊຍະບູລີ

ຂ່າວ-ພາບໂດຍ: ອຸ່ນເຮືອນ ໂພທິລັກ