ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເມືອງແກ່ນທ້າວ ແຂວງໄຊຍະບູລີ ຈັດກອງປະຊຸມຄົ້ນຄວ້າ, ວາງແຜນຂອງຄະນະກໍາມາທິການສະກັດກັ້ນ ແລະ ຄວບຄຸມພະຍາດໄຂ້ຍຸງລາຍ

ກອງປະຊຸມຄົ້ນຄວ້າ, ວາງແຜນຂອງຄະນະກໍາມາທິການສະກັດກັ້ນ ແລະ ຄວບຄຸມພະຍາດໄຂ້ຍຸງລາຍເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນວັນທີ 14 ກໍລະກົດ ນີ້, ຢູ່ທີ່ຫ້ອງປະຊຸມຫ້ອງການສາລະນະສຸກເມືອງ. ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີຮອງເລຂາພັກເມືອງ, ຮອງເຈົ້າເມືອງໆແກ່ນທ້າວ, ມີຫົວໜ້າຫ້ອງການ, ເລຂາຄະນະພັກຮາກຖານ, ນາຍບ້ານ, ຮອງນາຍບ້ານເທດສະບານເຂົ້າຮ່ວມ 30 ກວ່າຄົນ.

ກອງປະຊຸມຄັ້ງນີ້, ໄດ້ຜ່ານບົດລາຍງານການຈັດຕັ້ງປະຕິບັດ ການສະກັດກັ້ນພະຍາດໄຂ້ຍຸງລາຍ ປີ 2016 ແລະ ແຜນການປີ 2017 ເຊິ່ງໃນໄລຍະ 1ປີໄດ້ສະໜອງອຸປະກອນທີ່ຈໍາເປັນ ເຊັ່ນ: ຊາຍຂ້າໜອນນໍ້າໃຫ້ແຕ່ລະບ້ານ ແລະ ສໍານັກງານ, ອົງການຈໍານວນໜຶ່ງ, ແຈກຍາຍມຸ້ງເຄືອບນໍ້າຢາໃຫ້ແກ່ບ້ານເປົ້າໝາຍ 9 ບ້ານຄື: ບ້ານວັງປູນ, ກົກໄຮຄໍາ, ປາກແຄມ, ປາກຕົມ, ຫົວຂົວ, ສວນກ້ວຍ, ກົກກະບົກ, ນາຄູນ, ແລະ ບ້ານຫ້ວຍອີ່ຮຸມ ຈໍານວນ 45 ດາງ. ລົງຊີ້ນໍາການກວດໜອນນໍ້າຍຸງລາຍຢູ່ສໍານັກງານ, ອົງການ ແລະ ຫ້ອງການຕ່າງໆຂອງເມືອງ. ພ້ອມກັນນັ້ນກໍລົງປະເມີນຜົນການກວດກາໜອນນໍ້າຍຸງລາຍຢູ່ 47 ບ້ານທົ່ວເມືອງ. ລົງໂຄສະນາສຸຂະສຶກສາປ້ອງກັນພະຍາດໄຂ້ຍຸງລາຍ, ແຈກຍາຍປົດສະເຕີ 5 ປໍ, ແຜນພັບປ້ອງກັນໄຂ້ຍຸງລາຍຕິດຕາມສໍານັກງານ, ອົງການ, ກົມກອງ, ໂຮງຮຽນ, ໂຮງໝໍ ແລະ ຈຸດຊຸມຊົນຈໍານວນໜຶ່ງ.

ຜົນການກວດໜອນນໍ້າຍຸງລາຍ ຢູ່ເທດສະບານ 12 ຄັ້ງ, ຈໍານວນ 28,000 ກວ່າຫຼັງຄາ, ສໍາຫຼວດທັງໝົດ 5.600 ກວ່າຫຼັງຄາ, ພົບ 350 ຫຼັງຄາ, ພາສະນະທີ່ສໍາຫຼວດນອກເຮືອນ 3.700 ກວ່າພາສະນະ, ໃນເຮືອນ 4.600 ກວ່າ, ພົບນອກເຮືອນ 350 ກວ່າພາສະນະ, ໃນເຮືອນ 160 ກວ່າພາສະນະ. ຜົນການກວດກາຢູ່ສຸກສາລາ 10 ແຫ່ງ ຈໍານວນ 12 ຄັ້ງ, ມີທັງໝົດ 55.300 ກວ່າຫຼັງຄາ, ສໍາຫຼວດ 11.000 ກວ່າຫຼັງຄາ, ພົບ 1.700​ກວ່າຫຼັງຄາ, ພາສະນະທີ່ສໍາຫຼວດນອກເຮືອນ 23.700 ກວ່າພາສະນະ, ໃນເຮືອນ 11.800 ກວ່າ, ພົບນອກເຮືອນ 1.600 ກວ່າ ແລະ ໃນເຮືອນ 800 ກວ່າ.

ໃນກອງປະຊຸມຍັງໄດ້ຜ່ານຂໍ້ຕົກລົງ ຂອງທ່ານເຈົ້າເມືອງເລກທີ 537/ຈມ.ກທ ລົງວັນທີ 12 ມິຖຸນາ 2017 ວ່າດ້ວຍການຕ່ງຕັ້ງຄະນະກໍາມາທິການປ້ອງກັນ ແລະ ສະກັດກັ້ນການລະບາດໄຂ້ຍຸງລາຍ, ຄໍາສັ່ງແນະນໍາຂອງລັດມົນຕີ ກະຊວງສາທາລະນະສຸກ ເລກທີ 0878/ກທ, ລົງວັນທີ 22 ມິຖຸນາ 2017, ຄໍາສັ່ງແນະນໍາຂອງ ທ່ານເຈົ້າແຂວງໄຊຍະບູລີ ເລກທີ 043/ຈຂ.ຊຍ ລົງວັນທີ 23 ມີນາ 2017, ແຈ້ງການຂອງພະແນກສາທາລະນະສຸກແຂວງ ເລກທີ 1445/ພສຂ.ຊຍ ລົງວັນທີ 23 ມິຖຸນາ 2017 ແລະ ຜ່ານຂໍ້ແຂ່ງຂັນ ການສະກັດກັ້ນ ຄວບຄຸມໄຂ້ຍຸງລາຍ ປະຈໍາປີ 2017.