ເມືອງແກ້ວອຸດົມ ລະດົມກຳລັງເຂົ້າມອດໄຟໄໝ້ລາມປ່າພູສັນເຂື່ອນ

ຕາມການລາຍງານຂອງ ທ່ານ ສີສະຫວາດ ແສງພະຈັນ ເຈົ້າເມືອງໆແກ້ວອຸດົມ ແຂວງວຽງຈັນ ໄດ້ໃຫ້ຮູ້ວ່າ: ຈາກສະພາບໄຟໄໜ້ລາມປ່າພູສັນເຂື່ອນ ບ້ານແສງສະຫວ່າງ, ບ້ານຂ້າມຊ້າງ ແລະ ບ້ານພູເຂົາຄໍາ ເມືອງແກ້ວອຸດົມ ໄດ້ເກີດຂຶ້ນແຕ່ວັນທີ 17-21 ເມສາ 2023 ເຊິ່ງມີຄວາມຮຸນແຮງ ແລະ ຂະຫຍາຍເປັນວົງກວ້າງ.

ຕໍ່ເຫດການດັ່ງກ່າວ, ກຳລັງ ປກຊ, ປກສ ເມືອງແກ້ວອຸດົມ ໄດ້ສົມທົບກັບກອງບັນຊາການທະຫານແຂວງວຽງຈັນ ໄດ້ນຳໃຊ້ກຳລັງກອງພັນ 432, ກອງຮ້ອຍ 201 ກອງຮ້ອຍ 203, ອົງການປົກຄອງເມືອງແກ້ວອຸດົມ, ບ້ານ ແລະ ພາກສ່ວນຕ່າງໆ ຈຳນວນພົນ 200 ກວ່າຄົນ ເຂົ້າມອດໄຟໄໝ້ລາມປ່າພູສັນເຂື່ອນ ໂດຍໃຊ້ກຳລັງພົນ, ພາຫະນະທາງບົກ ແລະ ອາກາດ ໂດຍໄດ້ປະສານສົມທົບກອງບັນຊາການທະຫານອາກາດ ແລະ ກົມສູ້ຮົບ ກົມໃຫຍ່ເສນາທິການກອງທັບ ນຳໃຊ້ຍົນແຮລີກ໋ອບແຕ MI 17 ບິນສຳຫລວດເບິ່ງຈຸດໄຟໄໝ້ ເພື່ອຈະໄດ້ນຳເອົາກຳລັງເຂົ້າໄປມອດ ເຊິ່ງຄະນະຊີ້ນໍາແຕ່ລະພາກສ່ວນໄດ້ປຶກສາຫາລື ແລະ ຕົກລົງເຫັນດີເປັນເອກະພາບໄດ້ຈັດແບ່ງອອກເປັນ 2 ຈຸດ ຄື: ຈຸດທີ 1 ແມ່ນບ້ານແສງສະຫວ່າງ ລຽບຕາມພູສັນເຂື່ອນໄຟຟ້ານໍ້າງື່ມ 1 ແລະ ຈຸດທີ 2 ແມ່ນ ບ້ານຂ້າມຊ້າງ ບ້ານພູເຂົາຄໍາ ແຕ່ລະຈຸດແມ່ນໄດ້ໃຊ້ກໍາລັງພົນຂົນນໍ້າຂຶ້ນໄປມອດ ແລະ ຖ່າງແລ່ວໄຟເພື່ອຕັດແລ່ວໄຟ, ມອດໄຟ ເພື່ອບໍ່ໃຫ້ໄຟດັ່ງກ່າວລຸກລາມໄປເປັນບໍລິເວນກວ້າງອີກ.

ທ່ານ ທ່ານ ສີສະຫວາດ ແສງພະຈັນ ໄດ້ໃຫ້ຮູ້ອີກວ່າ: ສາເຫດດັ່ງກ່າວແມ່ນເກີດມາຈາກພໍ່ແມ່ປະຊາຊົນບຸກລຸກຖ່າງປ່າເຮັດໄຮ່, ເຮັດສວນ ແລ້ວຈູດໄຮ່ ເຮັດໃຫ້ໄຟໄໝ້ລາມປ່າໄປເປັນບໍລິເວນກວ້າງ, ມາຮອດປັດຈຸບັນແມ່ນສາມາດຄວບຄຸ້ມໄຟໄດ້ຈໍານວນໜຶ່ງ.

ຂ່າວ-ພາບ: ດາວເພັດ ແກ້ວປະເສິດ