ໃນຕອນເຊົ້າຂອງວັນທີ 2 ມິຖຸນາ ຜ່ານມານີ້, ຊາວກະສິກອນ ເມືອງແບງ ແຂວງອຸດົມໄຊ ທີ່ຊົມໃຊ້ນໍ້າຊົນລະປະທານຝາຍນໍ້າຫາວ 2 ຊຶ່ງປະກອບມີ 4 ບ້ານ ຄື: ບ້ານແບງຄຳ, ບ້ານນາຫ້ວຍ, ບ້ານໂພແກ້ວ ແລະ ບ້ານປາງເດື່ອ ໄດ້ອອກແຮງງານລວມເພື່ອກະກຽມເຂົ້າສູ່ການຜະລິດໃນລະດູຝົນ ກໍຄືການກະກຽມພື້ນທີ່ເຮັດນາປີ ຊຶ່ງນຳພາໂດຍຫົວໜ້າກຸ່ມຊາວນາຈຳນວນ 4 ບ້ານ ໂດຍມີແຮງງານເຂົ້າຮ່ວມທັງໝົດ 200 ກວ່າຄົນ; ຊຶ່ງໜ້າວຽກຫຼັກທີ່ພ້ອມກັນເຮັດໃນຄັ້ງນີ້, ໄດ້ອະນາໄມເຂດໜ້າຝາຍ, ຖາງຫຍ້າ, ເອົາກິ່ງໄມ້ ຫຼື ສິ່ງກີດຂວາງຂຶ້ນຈາກຄອງນໍ້າ, ຂຸດດິນ, ແຮ່ ທີ່ຕັນໜ້າຝາຍອອກ ເພື່ອໃຫ້ນໍ້າໄຫຼເຂົ້າສູ່ຄອງເໝືອງສະດວກຂຶ້ນ ແລະ ສາມາດສະໜອງນ້ຳເຂົ້າສູ່ທົ່ງນາໃຫ້ພຽງພໍກັບຄວາມຮຽກຮ້ອງຕ້ອງການຂອງຊາວກະສິກອນ. ລະບົບຊົນລະປະທານຝາຍນໍ້າຫາວ 2 ສາມາດສະໜອງນ້ຳເຂົ້າສູ່ທົ່ງນາໄດ້ 4 ບ້ານ ກວມເອົາເນື້ອທີ່ຫຼາຍກວ່າ 15.700 ເຮັກຕາ ນອກຈາກນີ້, ຫົວໜ້າກຸ່ມຊາວນາຍັງໄດ້ແຈ້ງໃຫ້ແຕ່ລະພາກສ່ວນອະນາໄມຄອງເໝືອງ ແລະ ຕັກດິນທີ່ມາຖົມຄອງເໝືອງໃນຂອບເຂດຄວາມຮັບຜິດຊອບຂອງຕົນອອກໃຫ້ສຳເລັດ ພ້ອມທັງແບ່ງຄະນະຮັບຜິດຊອບລົງກວດກາຄອງເໝືອງແຕ່ລະຈຸດຢ່າງລະອຽດ ພາຍຫຼັງອະນາໄມສໍາເລັດເເລ້ວ ຄະນະຮັບຜິດຊອບເໝືອງຝາຍ ຈະໄດ້ປ່ອຍນ້ຳຢູ່ຫົວງານ ເຂົ້າສູ່ທົ່ງນາ ເພື່ອໃຫ້ຊາວກະສິກອນໃນເຂດດັ່ງກ່າວໄດ້ໃຊ້ນໍ້າຢ່າງພຽງພໍ ແລະ ກະກຽມເຮັດການຜະລິດ ເພື່ອໃຫ້ທ່ວງທັນກັບເວລາຕາມລະດູການ.
(ຂ່າວ-ພາບ: ສີວົງໄຊ ຄຸນນະຈັກ)
