ໃນຕອນເຊົ້າ​ວັນ​ທີ 12 ທັນວາ 2020 ນີ້ທີ່​ສາລາຫໍໄຊ ບ້ານກາງໂຂງ ເມືອງໂຂງ ແຂວງ ຈຳປາສັກ ໄດ້​ຈັດ​ງານ​ແຂ່ງ​ຂັນ​ຊ່ວງ​ເຮືອ​ປະ​ຈຳ​ປີ 2020 ​ຂື້ນ​ຢ່າງເປັນທາງການ, ໃຫ້ກຽດເຂົ້າຮ່ວມໃນງານງານຄັ້ງນີ້ໂດຍ​ທ່ານນາງ ຄຳພູ ລິດທິສັກ ກຳມະການພັກແຂວງ, ເລຂາພັກເມືອງ ເຈົ້າ​ເມືອງ​ໆໂຂງ. ມີບັນ​ດາ​ທ່ານ​ໃນ​ຄະ​ນະ​ພັກ, ຄະ​ນະ​ປົກ​ຄອງ​ເມືອງ, ອຳນາດການປົກຄອງບ້ານ, ຕະຫຼອດ​ຮອດພໍ່ແມ່ປະຊາຊົນພາຍ​ໃນ​ເມືອງ ແລະ ແຂກຖືກເຊີນຈາກແຂວງ ແລະ ເມືອງ​ອ້ອມ​ຂ້າງ​ເຂົ້າ​ຮ່ວມ​ຊົມ​ຢ່າງຫຼວງຫຼາຍ.
ໂອກາດນີ້ ທ່ານນາງ ຄຳພູ ລິດທິສັກ ໄດ້​ກ່າວເປີດພິທີ ໂດຍໃຫ້ຮູ້ກ່ຽວກັບການຈັດ​ງານ​ຄັ້ງນີ້ວ່າ: ງານປະເພນີແຂ່ງ​ຂັນ​ຊ່ວງ​ເຮືອ​ໃນ​ປີ​ນີ້ ກໍ່​ຄື​ທຸກໆ​ປີ​ທີ່​ຜ່ານ​ມາ ທັງນີ້ເພື່ອສືບ​ສານ​ວັດ​ທະ​ນະ​ທຳ​ປະ​ເພ​ນີ​ອັນ​ດີ​ງາມ​ຂອງ​ຊາດກໍ່​ຄື​ຂອງ​ທ້ອງ​ຖິ່ນ,​​ ອະ​ນຸ​ລັກປົກ​ປັກ​ຮັກ​ສາໄວ້​ໃຫ້​ລູກໃຫ້ຫຼານສືບທອດ​ຕໍ່ໆ​ກັນ​ໄປ, ອີກ​ຢ່າງ​ກໍ່​ເພື່ອ​ສ້າງ​ຄວາມ​ສາ​ມັກ​ຄີ​ລະ​ຫວ່າງ​ປະ​ຊາ​ຊົນ​ບັນ​ດາ​ເຜົ່າໃຫ້ມີ​ຄວາມ​ແໜ້ນ​ແຟ້ນຍິ່ງຂຶ້ນ. ພ້ອມດຽວກັນນີ້ ທັງເປັນການປຸກລະດົມພໍ່ແມ່ປະຊາຊາວເມືອງໂຂງ ທີ່ພາຍຫຼັງສຳເລັດການເກັບກ່ຽວຜົນຜະລິດພືດລະດູຝົນແລ້ວ ກໍກະກຽມລົງສູ່ການຜະລິດລະດູແລ້ງ, ເຮັດໃຫ້ຊາວກະສິກອນ ແລະ ພໍ່ຄ້າຊາວຂາຍໄດ້ນຳຜົນຜະລິດກະສິກຳ, ເຄື່ອງຫັດຖະກຳ, ການປຸງແຕ່ງ ອາຫານ ແລະ ສິນຄ້າປະເພດຕ່າງໆຂອງຕົນມາວາງສະແດງ, ບໍລະການຂາຍໃຫ້ແຂກ ແລະ ນັກທ່ອງທ່ຽວທີ່ເຂົ້າມາຢ້ຽມຢາມ.
ຂ່າວໃຫ້ຮູ້ຕື່ມວ່າ: ການຈັດງານບຸນຊ່ວງເຮືອປະເພນີຄັ້ງນີ້ ແມ່ນຈັດແບບກະທັດຮັດ ບໍ່ໃຫຍ່ໂຕຄືດັ່ງປີຜ່ານມາ ທັງນີ້ກໍເພື່ອປະຕິບັດຕາມທິດຊີ້ນຳຂອງຂັ້ນເທິງ ໃນການສະກັດກັ້ນ ການແຜ່ລະບາດຂອງເຊື້ອພະຍາດໂຄວິດ-19. ງານຄັ້ງນີ້ມີ​ເຮືອເຂົ້າຮ່ວມແຂ່ງຂັນທັງໝົດ 9 ລຳ ແລະ ໃນນັ້ນເປັນເຮືອປະເພນີຮຸ່ນ 33 ສີພາຍ ມີ 4 ລຳ ແລະ ເຮືອກິລາຮຸ່ນ 12 ສີພາຍ ມີ 5 ລຳ ຊຶ່ງເປັນເຮືອທີ່ມາ​ຈາກບັນດາບ້ານ​ກຸ່ມບ້ານອ້ອມຂ້າງເມືອງສົ່ງເຂົ້າຮ່ວມ.
ຂ່າວໂດຍ: ພຸດທະສິນ ວົງວິໄລທອງ ນັກຂ່າວສະຖານີວີທະຍຸ-ໂທລະພາບເມືອງໂຂງ
Loading...