ວັນທີ 11 ກໍລະກົດ 2024 ນີ້ ການນຳຂອງເມືອງໂຂງ ແຂວງຈຳປາສັກ ກໍຄືຫ້ອງການກະສິກຳ ແລະ ປ່າໄມ້ເມືອງ ແລະ ຫ້ອງການອ້ອມຂ້າງເມືອງ ໄດ້ພ້ອມກັນຈັດພິທີປ່ອຍປາລົງສູ່ແຫຼ່ງທຳມະຊາດຈຳນວນ 40 ພັນໂຕທີ່ບ້ານ ຫົວສະດຳ (ໜ້າເຂື່ອນໄຟຟ້າດອນສະໂຮງ) ໂດຍການເຂົ້າຮ່ວມຂອງທ່ານ ສົມບູນ ເຮືອງວົງສາ ຄະນະປະຈຳພັກແຂວງ ຮອງເຈົ້າແຂວງຈຳປາສັກ, ທ່ານ ປະດິດ ວັນນະລັດສະໝີ ຄະນະປະຈຳພັກແຂວງ ປະທານກວດກາພັກ ຫົວໜ້າອົງການກວດກາລັດແຂວງ, ມີເຈົ້າເມືອງໆໂຂງ, ພະແນກກະສິກຳ-ປ່າໄມ້ແຂວງ, ຕາງໜ້າໂຄງການເຂື່ອນໄຟຟ້າດອນສະໂຮງ, ມີອຳນາດການປົກຄອງບ້ານ, ຕະຫຼອດຮອດພໍ່ແມ່ປະຊາຊົນພາຍໃນບ້ານເຂົ້າຮ່ວມຢ່າງພ້ອມພຽງ.
ໂອກາດນີ້ທ່ານນາງ ຄຳພູ ລິດທິສັກ ໄດ້ກ່າວເປີດພິທີ ແລະ ຍົກໃຫ້ເຫັນຫຼາຍບັນຫາສຳຄັນເປັນຕົ້ນແມ່ນ: ໄດ້ຮຽກຮ້ອງມາຍັງປະຊາຊົນບໍ່ໃຫ້ລ່າສັດປ່າທຸກຊະນິດໃນຊ່ວງໄລຍະເຂົ້າພັນສາ ຊຶ່ງເປັນລະດູທີ່ສັດນ້ຳ ແລະ ສັດປ່າກຳລັງໄຂ່ ແລະ ຖືພາມານ, ຫ້າມບໍ່ໃຫ້ຊື້-ຂາຍສັດປ່າທີ່ມີຊີວິດຕະຫຼອດເຖິງຊາກ, ຊິ້ນສ່ວນ, ອະໄວຍະວະສັດທຸກຢ່າງຕາມທ້ອງຕະຫຼາດ, ຫ້າມບໍ່ໃຫ້ຫາປາໃນລະດູປາຂຶ້ນວາງໄຂ່, ຫ້າມຕັນທາງເດີນຂອງປາທີ່ຈະຂຶ້ນວ່າງໄຂ່ຕາມສາຍຫ້ວຍ ແລະ ແມ່ນ້ຳລຳຄອງດ້ວຍວິທີການໃດໆກໍ່ຕາມ, ຫ້າມເດັດຂາດບໍ່ໃຫ້ນຳເຄື່ອງຫາປາທີ່ມີລັກສະນະດັບສູນເປັນຕົ້ນແມ່ນໃຊ້ລະເບີດ, ໄຟຟ້າຊັອດ, ເບືອປາ, ໃຊ້ດາງກວາດ ຫຼືໃຊ້ມອງທີ່ມີຂະໜາດຖີ່ເກີນໄປ ຖ້າຫາກວ່າປະຊາຊົນພົບເຫັນປະກົດການດັ່ງກ່າວ; ແມ່ນຕ້ອງໄດ້ລາຍງານໃຫ້ການຈັດຕັ້ງອຳນາດການປົກຄອງປະຕິບັດມາດຕະການຕາມລະບຽບກົດໝາຍ. ທັງນີ້, ກໍ່ເພື່ອເປັນການສ້າງຈິດສຳນຶກໃຫ້ແກ່ຊາວໜຸ່ມເຍົາວະຊົນ ແລະ ປະຊາຊົນໃຫ້ມີນ້ຳໃຈຮັກທຳມະຊາດ, ຮັກຫ້ວຍໜອງຄອງບຶງ ແລະ ຫວງແຫນຫ້ວຍນ້ຳວັງປາຂອງຕົນເອງ ເພື່ອເປັນການເສີມສ້າງຄວາມຮູ້ຄວາມເຂົ້າໃຈໃນການຂະຫຍາຍພັນສັດນ້ຳ-ສັດປ່າ, ຮູ້ປົກປັກຮັກສາຊັບພະຍາກອນທຳມະຊາດ ແລະ ສະພາບແວດລ້ອມໃຫ້ຍືນຍົງຕະຫຼອດໄປ ແລະ ທີ່ສຳຄັນ ວັນທີ 13 ກໍລະກົດ ກໍແມ່ນວັນໜຶ່ງທີ່ຄັນຂອງປວງຊົນລາວທັງຊາດ ນັ້ນກໍແມ່ນວັນຄ້າຍວັນເກີດຂອງປະທານ ສຸພານຸວົງ ຄົບຮອບ 115 ປີ ( 13 ກໍລະກົດ 1909 – 13 ກໍລະກົດ 2024).
ຈາກນັ້ນ; ການນຳຂອງເມືອງພ້ອມດ້ວຍແຂກທຸກພາກສ່ວນ ກໍໄດ້ນຳພາປະຊາຊົນປ່ອຍປາລົງສູ່ທຳມະຊາດ ຈຳນວນ 40 ພັນໂຕ, ເຊິ່ງເປັນລູກປາຊະນິດປາກິນພຶດ (ປາປາກ) ຈຳນວນທັງໝົດ.
ຂ່າວ-ພາບ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ
