ວັນທີ 4 ມັງກອນ 2020 ນີ້ຢູ່ສະໂມສອນເມືອງໂຂງ ແຂວງຈຳປາສັກ ໄດ້ຈັດຊຸດຝຶກອົບຮົມໃຫ້ແກ່ພະນັກງານຫຼັກແຫຼ່ງຂັ້ນເມືອງ ເພື່ອກະກຽມໃຫ້ແກ່ການເລືອກຕັ້ງສະມາຊິກສະພາແຫ່ງຊາດຊຸດທີ່ IX ແລະ ສະມາຊິກສະພາປະຊາຊົນແຂວງຊຸດທີ່ II.
ໃຫ້ກຽດເຂົ້າຮ່ວມເປັນປະທານກອງປະຊຸມຄັ້ງນີ້ໂດຍ ພັນໂທ ອ່ຳພອນ ແກ້ວບຸຜາພັນ ຄະນະປະຈຳສະພາປະຊາຊົນແຂວງ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ທັງເປັນຄະນະອະນຸກຳມະການໂຄສະນາປຸກລະດົມຂະ ບວນການ, ທ່ານ ພູວັນ ສີສຸພົນ ຮອງເລຂາພັກເມືອງ ສະມາຊິກສະພາປະຊາຊົນແຂວງ, ຮອງປະທານຄະນະກຳມະການເລືອກຕັ້ງຂັ້ນເມືອງ, ມີຄະນະປະຈຳພັກເມືອງ, ກຳມະ ການພັກເມືອງ, ເລຂາ-ຮອງເລຂາຄະນະພັກຮາກຖານກຸ່ມບ້ານ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ໂອກາດນີ້ ປະທານກອງປະຊຸມໄດ້ກ່າວເປີດກອງປະຊຸມ ຊຶ່ງຍົກໃຫ້ເຫັນວ່າ: ຊຸດຝຶກອົບຮົມການກະກຽມເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໄດ້ໄຂຂຶ້ນໃນທ່າມກາງບັນຍາກາດ ທີ່ຊາວແຂວງຈໍາປາ ສັກ ກໍຄືຊາວເມືອງໂຂງໄດ້ສຸມໃສ່ສ້າງຂະບວນການຮອບດ້ານ ເພື່ອຂ່ຳນັບຮັບຕ້ອນກອງປະຊຸມໃຫຍ່ຄັ້ງທີ XI ຂອງພັກ, ພ້ອມດຽວກັນນີ້ ກໍແມ່ນໄລຍະຊາວກະສິກອນໃນທົ່ວເມືອງສຸມໃສ່ການຜະລິດລະດູແລ້ງຢ່າງເປັນຂະບວນການຟົດຟື້ນ. ສະນັ້ນ ເພື່ອເຮັດໃຫ້ການກະກຽມເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ເປັນບັ້ນສຶກສາອົບຮົມການເມືອງ-ແນວຄິດ ຕິດພັນກັບການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ XI ຂອງພັກ ແລະ ເຊື່ອມຊຶມກໍາແໜ້ນແນວທາງນະໂຍບາຍຂອງພັກ ໃນການສ້າງລັດຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ, ເສີມຂະຫຍາຍ ແລະ ປະຕິບັດສິດປະຊາທິປະໄຕຂອງພົນລະເມືອງ ຢ່າງຖືກຕ້ອງ, ຕັ້ງໜ້າແກ້ໄຂປະກົດການຫຍໍ້ທໍ້, ເອົາໃຈໃສ່ເຊີດຊູໃນການເຄົາລົບ, ປະຕິບັດກົດໝາຍໃນທົ່ວສັງຄົມ. ທີ່ປະຊຸມຍັງໄດ້ຮັບຟັງການເຜີຍແຜ່ເຊື່ອມຊຶມ ມະຕິຂອງກົມການເມືອງສູນກາງພັກ ສະບັບເລກທີ 118/ກມສພ ວ່າດ້ວຍການເພີ່ມທະວີ ການຊີ້ນໍາ-ນໍາພາ ຂອງຄະນະພັກ ຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II, ເອກະສານ ເສີມຂະຫຍາຍສິດເປັນເຈົ້າຂອງປະຊາຊົນເຂົ້າໃນການເລືອກຕັ້ງ, ເອກະສານຖາມ-ຕອບ ສະພາແຫ່ງຊາດ ແລະ ສະພາປະຊາຊົນແຂວງ, ຮັບຟັງຄໍາແນະນໍາ ຂອງຄະນະກໍາມະການເລືອກຕັ້ງຂັ້ນແຂວງ ສະບັບເລກທີ 08/ຄລຂ ກ່ຽວກັບການປ່ອນບັດ, ການນັບຄະແນນສຽງ ແລະ ການປະກາດຜົນຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II. ຈາກນັ້ນ ກອງປະຊຸມຍັງໄດ້ຜ່ານຂໍ້ຕົກລົງຂອງທ່ານເຈົ້າເມືອງໆໂຂງ ເລກທີ 342/ຈມຂ ວ່າດ້ວຍການແຕ່ງຄະນະກຳມະການເລືອກຕັ້ງຂັ້ນເມືອງ, ມະຕິຕົກລົງຂອງຄະນະກຳມະການເລືອກຕັ້ງຂັ້ນເມືອງ ເລກທີ 001/ຄລມ ວ່າດ້ວຍການແຕ່ງຕັ້ງ ແລະ ການເຄື່ອນຂອງບັນດາອະນຸກຳມະການ ຂອງຄະນະກຳມະການເລືອກຕັ້ງຂັ້ນເມືອງ, ຂໍ້ຕົກລົງຂອງປະທານຄະນະກຳມະການເລືອກຕັ້ງຂັ້ນເມືອງ ສະບັບເລກທີ 343/ຄລມ.ຂ ວ່າດ້ວຍການແຕ່ງຕັ້ງຄະນະຮັບຜິດຊອບໜ່ວຍປ່ອນບັດ ແລະ ຄະນະຮັບຜິດຊອບປ້ອງກັນໜ່ອຍປ່ອນບັດ.
ກອງປະຊຸມຍັງໄດ້ມີການປະກອບຄໍາຄິດຄໍາເຫັນ,ຊັກຖາມ,ຊີ້ແຈງ ຂອງຜູ້ແທນກອງປະຊຸມເພື່ອເຮັດໃຫ້ບັ້ນດໍເນີນກອງປະຊຸມເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນແຂວງ ຊຸດທີ II ໄດ້ຕາມແຜນທີ່ກໍານົດໄວ້.
    
ຂ່າວໂດຍ: ພຸດທະສິນ ວົງວິໄລທອງ ນັກຂ່າວສະຖານີວິທະຍຸ-ໂທລະພາບເມືອງໂຂງ
Loading...