ໃນຕອນເຊົ້າວັນທີ 11 ມີນາ 2021 ນີ້ ທີ່ໂຮງໝໍຊຸມຊົນ ເມືອງ ໂຂງ ແຂວງຈຳປາ ສັກ ໄດ້ມີພິທີສັກວັກຊີນປ້ອງກັນພະຍາດ ໂຄວິດ -19 ຮອບທີ 1 ເຊິ່ງເປັນເຂັມທໍາອິດ ໃຫ້ກັບກຸ່ມທີ່ມີຄວາມສ່ຽງສູງ ເປັນຕົ້ນ: ອ້ອມຂ້າງເມືອງ ທີ່ມີຄວາມສ່ຽງຕໍ່ການຕິດເຊື້ອຈາກການລະບາດຂອງພະຍາດໂຄວິດ – 19.
ໃຫ້ກຽດນຳພາເປີດພິທີສັກຢາຄັ້ງນີ້ໂດຍທ່ານ ນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີບັນດາທ່ານຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ພະນັກງານວິຊາການຫ້ອງການອ້ອມຂ້າງເມືອງ ແລະ ພ້ອມດ້ວຍຄະນະສະເພາະກິດພາຍໃນເມືອງເຂົ້າຮ່ວມຢ່າງພ້ອມພຽງ.
ໂອກາດນີ້ ທ່ານ ພົງສະຫວັດ ສີພົງສັກ ຮອງຫົວໜ້າຫ້ອງການສາທາລະນະສຸກເມືອງໂຂງ ໃຫ້ຮູ້ວ່າ: ວັກຊີນ ນີ້ມີຊື່ວ່າ Sinopharm Vaccine ( ຊີໂນຟຣາມ ) ຜະລິດໂດຍບໍລິສັດຢາຊີໂນຟຣາມຂອງປະເທດຈີນ ຫຼື China National Pharmaceutical Group Corp. ໂດຍການສັກວັກຊີນແມ່ນປະຕິບັດ 2 ໄລຍະຄື : ຮອບທີ 1 ເລີ່ມສັກມາແຕ່ວັນທີ 9-15 ມີນາ 2021 ແມ່ນໃຫ້ສຳເລັດ ແລະ ຮອບທີ 2 ຈະເລີ່ມສັກໃນວັນທີ 2 ເມສາ 2021 ແລະ ສະເພາະເມືອງໂຂງ ແມ່ນໄດ້ຮັບວັກຊີນກັນພະຍາດໂຄວິດ-19 ຄັ້ງນີ້ທັງໝົດ 2.007 ໂດສ.
ທ່ານນາງ ຄຳພູ ລິດທິສັກ ຍັງກ່າວຕື່ມວ່າ: ເຖິງວ່າຈະໄດ້ຮັບການສັກວັກຊີນແລ້ວກໍ່ຕາມ ແຕ່ເຮົາກໍຍັງຄົງສືບຕໍ່ເຝົ້າລະວັງ ແລະ ປະຕິບັດການປ້ອງກັນຢ່າງເຂັ້ມງວດຕໍ່ໄປເຊັ່ນ: ການໃສ່ຜ້າອັດປາກ, ລ້າງມືໃຫ້ສະອາດເລື້ອຍໆ ແລະ ຮັກສາໄລຍະຫ່າງ 1-2m.
ຂ່າວ-ພາບ: ພຸດທະສິນ ວົງວິໄລທອງ
Loading...