ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເມືອງໄຊທານີ ນະຄອນຫຼວງວຽງຈັນ ຈັດພິທີປ່ອຍປາ ໂອກາດວັນປ່ອຍປາແລະອານຸລັກສັດນໍ້າ ສັດປ່າແຫ່ງຊາດ ຈໍານວນ 50.000ໂຕ

ຕອນເຊົ້າວັນທີ 12 ກໍລະກົດ 2019ນີ້,  ຫ້ອງການສະກິກໍາ ແລະ ປ່າໄມ້ ເມືອງໄຊທານີ ນະຄອນຫຼວງວຽງຈັນ ຈັດພິທີປ່ອຍປາ ໂອກາດວັນປ່ອຍປາແລະອານຸລັກສັດນໍ້າ ສັດປ່າແຫ່ງຊາດ ວັນທີ 13 ກໍລະກົດ ທີ່ ວັງເດືອນຫ້າ ບ້ານຂຸດສາມບາດ ເມືອງໄຊທານີ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ຈັນທະລາ ອິນທະລັງສີ ເຈົ້າເມືອງ ໆ ໄຊທານີ, ທ່ານທອງສຸກ ບົວລີຂັນ ຫົວໜ້າຫ້ອງການກະສິກໍາແລະປ່າໄມ້ເມືອງໄຊທານີ ພ້ອມດ້ວຍພະແນກການຕ່າງໆ ອ້ອມຂ້າງເມືອງ, ພາກສ່ວນກ່ຽວຂ້ອງ ແລະ ປະຊາຊົນເປັນຈຳນວນຫລາຍ.

         ທ່ານ ຈັນທະລາ ອິນທະລັງສີ ກ່າວໄຂພິທີ ໂດຍຍົກໃຫ້ເຫັນ ຄວາມໝາຍສຳຄັນ ຂອງວັນປ່ອຍປາ ແລະ ອະນຸລັກສັດນໍ້າ ສັດປ່າ ແຫ່ງຊາດ ວ່າ: ເປັນການປູກຈິດສໍານຶກ ໃຫ້ເຍົາວະຊົນ ກໍຄືປະຊາຊົນລາວ ບັນດາເຜົ່າ ໃຫ້ຮັບຮູ້ເຂົ້າໃຈ ແລະ ຮູ້ຈັກ ອະນຸລັກ ຮັກສາ ສັດນໍ້າ ສັດປ່າ ໃຫ້ຍືນຍົງ ທັງເປັນການປຸກລະດົມ ທົ່ວປວງຊົນ ໃຫ້ປະກອບສ່ວນ ຄຸ້ມຄອງ ກວດກາ ປົກປັກຮັກສາ ພັດທະນາ ແລະ ນຳໃຊ້້ ສັດນໍ້າ ສັດປ່າ ດ້ວຍຄວາມຮັບຜິດຊອບສູງ ຮັບປະກັນຄວາມອຸດົມສົມບູນ  ຄວາມດຸ່ນດຽ່ງ ຂອງລະບົບນິເວດ ໃນທຳມະຊາດ, ປະກອບສ່ວນ ຍົກລະດັບ ຊີວິດການເປັນຢູ່ ຂອງປະຊາຊົນ ບັນດາເຜົ່າໃຫ້ດີຂຶ້ນ ເຊິ່ງເປັນໜ້າທີ່ຂອງໝົດທຸກຄົນໃນທົ່ວສັງຄົມ ທີ່ຈະຕ້ອງໄດ້ເຮັດໜ້າທີ່ປົກປັກຮັກສາ ແລະຄຸ້ມຄອງແຫລ່ງນໍ້າທໍາມະຊາດ ເພື່ອເປັນບ່ອນແຜ່ພັນປາໃນຍາມລະດູຝົນ ໂດຍສະເພາະໃນຍາມສັດນໍ້າສັດປ່າແຜ່ພັນໃນຍາມເຂົ້າພັນສາ.

ຈາກນັ້ນທ່ານ ຈັນທະລາ ອິນທະລັງສີ ເຈົ້າເມືອງໆ ໄຊທານີ ໄດ້ຕັດແຖບຜ້າໄຂພິທີປ່ອຍປາຢ່າງເປັນທາງ ເຊິ່ງປາທີ່ນໍາມາປ່ອຍໃນຄັ້ງນີ້ ມີທັງໝົດ 50.000ໂຕ ໃນນັ້ນມີປານິນ, ປາໄນ, ປາປາກ ແລະປາມະລິການ.

 ຜ່ານມາ ເມືອງໄຊທານີ ໄດ້ຈັດພິທີ ປ່ອຍສັດນໍ້າ ສັດປ່າ ແລ້ວ 8 ເທື່ອ ປ່ອຍປາໄດ້ 1.800.000ກ່ວາໂຕ, ຄືປີ 2011 ຈັດຢູ່ໜອງເຊືອມ ປ່ອຍໄດ້ 76.000 ກວ່າໂຕ, ປີ 2012ແລະປີ 2013 ປ່ອຍຢູ່ນໍ້າງຶ່ມວັດບ້ານໄຮ່ ປີລະ ໜຶ່ງແສນໂຕ, ປີ 2014 ປ່ອຍຢູ່ບ້ານທ່າສົ້ມມໍ 50.000ໂຕ, ປີ2015 ປ່ອຍຢູ່ໜອງເຊືອມ 50.000ໂຕ, ປີ2016 ປ່ອຍຢູ່ໜອງໂງມ 75.000 ໂຕ ປີ 2017 ປ່ອຍຢູ່ນໍ້າງຶ່ມຈຸດບ້ານໄຮ່ 200.000 ໂຕ, ປີ 2018 ປ່ອຍຢູ່ ໜອງຄັນ ບ້ານນາຕານ 50.000ໂຕ. ສະເພາະປີນີ້  ທົ່ວນະຄອນຫຼວງວຽງຈັນ ຈັດພິທີປ່ອຍປາ ຢູ່ 9 ຈຸດ ຄາດໝາຍປ່ອຍປາໃຫ້ໄດ້ທັງໝົດ 800.000ໂຕ.