ປັດຈຸບັນ, ທົ່ວນະຄອນຫລວງວຽງຈັນ (ນວ) ມີຜູ້ຕິດເຊື້ອພະຍາດໄຂ້ຍຸງລາຍສະສົມ 1.000 ກວ່າຄົນ. ໃນນັ້ນ, ເມືອງໄຊເສດຖາ ມີຜູ້ຕິດເຊື້ອພະຍາດໄຂ້ຍຸງລາຍເກືອບ 200 ຄົນ, ມີຜູ້ເສຍຊີວິດ 2 ຄົນ. ຈັດອັນດັບເປັນອັນ 4 ໃນ 9 ຕົວເມືອງ ນະຄອນຫລວງວຽງຈັນ ທີ່ມີການລະບາດຂອງພະຍາດໄຂ້ຍຸງລາຍ.
ທ່ານ ຈັນທະໄລ ໄຊຍະວົງ ຫົວໜ້າຫ້ອງການສາທາລະນະສຸກ ເມືອງໄຊເສດຖາ ໄດ້ໃຫ້ຮູ້ເມື່ອບໍ່ດົນມານີ້ວ່າ: ປັດຈຸບັນ, ພະຍາດໄຂ້ຍຸງລາຍກຳລັງລະບາດ. ສະນັ້ນ, ເພື່ອສະກັດກັ້ນ ແລະ ປ້ອງກັນບໍ່ໃຫ້ລູກ-ຫລານ ແລະ ພໍ່ແມ່ ປະຊາຊົນ ເປັນພະຍາດໄຂ້ຍຸງລາຍ ຫລື ໄຂ້ເລືອດອອກ, ຫ້ອງການສາທາລະນະສຸກເມືອງໄຊເສດຖາ ຈຶ່ງໄດ້ເອົາໃຈໃສ່ຈັດຕັ້ງປະຕິບັດມາດຕະການຕ່າງໆ ໃນການປ້ອງກັນພະຍາດດັ່ງກ່າວ ເຊິ່ງ 6 ເດືອນຕົ້ນປີ 2024 ຫ້ອງການສາທາລະນະສຸກເມືອງ ໄດ້ສົມທົບກັບອຳນາດການປົກຄອງເມືອງ, ບ້ານ, ແພດອາສາສະໝັກບ້ານ(ອສບ) ສ້າງຂະບວນການທໍາລາຍແຫລ່ງເພາະພັນໜອນ ນໍ້າຍຸງລາຍຢູ່ບ້ານ ທີ່ມີຄວາມສ່ຽງ ເປັນຕົ້ນ ບ້ານໂພນພະເນົາ ເນື່ອງຈາກມີຄົນເສຍຊີວິດຍ້ອນໄຂ້ຍຸງລາຍ 1 ຄົນ. ພ້ອມນັ້ນ, ຍັງໄດ້ມອບໃຫ້ແຕ່ລະບ້ານ ເປັນເຈົ້າການໃນການເຝົ້າລະວັງດັດສະນີຂອງໜອນນໍ້າຍຸງລາຍ ເພື່ອໃຫ້ແຕ່ລະບ້ານ ໄດ້ປະຕິບັດເປັນປະຈຳທຸກໆອາທິດ ແລ້ວລາຍງານໃຫ້ຫ້ອງການສາທາລະນະສຸກເມືອງ ລົງໄປກວດກາ ແລະ ແກ້ໄຂໃຫ້ທັນເວລາ.
ເຖິງຢ່າງໃດກໍຕາມ, ການຈັດຕັ້ງປະຕິບັດວຽກງານດັ່ງກ່າວ ຍັງມີຂໍ້ຫຍຸ້ງຍາກ ເນື່ອງຈາກວ່າ ໃນປີນີ້, ການລະບາດຂອງພະຍາດໄຂ້ຍຸງລາຍ ຈະບໍ່ເປັນຈຸ້ມ, ເກີດກະແຈກກະຈາຍບ້ານລະຄົນ, 2 ຄົນເຮັດໃຫ້ມີຄວາມຫຍຸ້ງຍາກໃນການສ້າງຂະບວນການຕ່າງໆ ເພື່ອທຳລາຍແຫລ່ງເພາະພັນໜອນນໍ້າຍຸງລາຍ. ນອກຈາກນີ້, ພະຍາດໄຂ້ຍຸງລາຍ ຍັງເປັນພະຍາດລະດູການ ທີ່ເກີດໃນຊຸມຊົນແອອັດ, ຫ້ອງແຖວ ແລະ ອື່ນໆ ທີ່ມີຄວາມເປີະເປື້ອນ ຈຶ່ງເຮັດໃຫ້ຫ້ອງການສາທາລະນະສຸກ ບໍ່ສາມາດເຂົ້າເຖິງໄດ້, ພ້ອມນີ້ ຍັງອີງຕາມສະພາບເສດຖະກິດໃນປັດຈຸບັນ ຈຶ່ງເຮັດໃຫ້ບໍ່ສາມາດຕອບສະໜອງສານເຄມີ ຫລື ຢາຕ່າງໆເພື່ອນໍາໄປພົ່ນຂ້າໜອນນໍ້າຍຸງລາຍ, ງົບປະມານບໍ່ພຽງພໍຕໍ່ວຽກງງານດັ່ງກ່າວ, ຄວາມລື້ງເຄີຍຂອງປະຊາຊົນຕໍ່ພະຍາດໄຂ້ຍຸງລາຍ ຖືວ່າເປັນເລື່ອງທຳມະດາ.
ໂອກາດນີ້, ທ່ານ ຈັນທະໄລ ໄຊຍະວົງ ຍັງຝາກເຖິງປະຊາຊົນໃຫ້ເອົາໃຈໃສ່ໃນການຮັບຮູ້ຂໍ້ມູນຂ່າວສານທາງດ້ານໄຂ້ຍຸງລາຍ ຫລື ໄຂ້ເລືອດອອກ ເນື່ອງຈາກພະຍາດດັ່ງກ່າວ, ເປັນພະຍາດບົ່ມຊ້ອນ, ມີຄວາມອັນຕະລາຍຮ້າຍແຮງເຖິງແກ່ຊີວິດໄດ້ ໂດຍສະເພາະປັດຈຸບັນເປັນລະດູຝົນ ເປັນລະດູການພະຍາດໄຂ້ຍຸງລາຍ, ຈົ່ງມີສະຕິໃນການປ້ອງກັນໂດຍປະຕິບັດຫລັກການ 5ປ ທີ່ກະຊວງສາທາລະນະສຸກວາງອອກ. ຖ້າລູກ-ຫລານ ຫລື ຄົນໃນຄອບຄົວບໍ່ສະບາຍ, ເຈັບເປັນບໍ່ຄວນຊື້ຢາມາກິນເອງ, ຄວນໄປປຶກສາແພດໝໍໂດຍດ່ວນເຊັ່ນ: ໂຮງໝໍສູນກາງ, ແຂວງ, ເມືອງ, ສຸກສາລາ, ສະຖານທີ່ໃຫ້ບໍລິການຕ່າງໆ, ສິ່ງສຳຄັນຂໍໃຫ້ສຳນັກງານ-ອົງການ, ຜູ້ປະກອບການຕ່າງໆ ເຫັນຄວາມສຳຄັນຮັກສາສິ່ງແວດລ້ອມຊ່ວຍກັນ ເປັນຕົ້ນ ການກຳຈັດຂີ້ເຫຍື້ອ, ການຈັດສັນຄວາມເປັນລະບຽບຮ້ອຍພາຍໃນບ້ານ-ເຮືອນ, ພາຊະນະບັນຈຸນໍ້າຕ່າງໆ. ໃນນັ້ນ, ຖ້າເຂດໃດ, ຈຸດໃດຂອງເມືອງໄຊເສດຖາ ມີການລະບາດພະຍາດໄຂ້ຍຸງລາຍ ຫລື ມີຄວາມສ່ຽງ, ມີຍຸງຈຳນວນຫລາຍ ກໍ່ສາມາດແຈ້ງຫາຫ້ອງການສາທາລະນະສຸກໄດ້ ເພື່ອຈະໄດ້ກວດກາ ແລະ ແກ້ໄຂໃຫ້ທັນເວລາ.
ທີ່ມາ: ຂປລ
