ເມືອງໄຊ ແຂວງອຸົມໄຊ ຈະຖືເອົາວຽກງານພັດທະນາການທ່ອງທ່ຽວ ເປັນໜຶ່ງໃນບຸລິມະສິດສໍາຄັນຂອງເມືອງ ເພື່ອຂັບເຄື່ອນການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກ ໃຫ້ສອດຄ່ອງກັບແຜນພັດທະນາຍືນຍົງສີຂຽວຂອງພັກ-ລັດຖະບານໃນຕໍ່ໜ້າ. ຂະນະທີ່ແຕ່ລະປີມີນັກທ່ອງທ່ຽວ ເຂົ້າມາທ່ອງທ່ຽວພາຍໃນເມືອງໄຊ ສະເລ່ຍປະມານ 41.000 ກວ່າຄົນຕໍ່ປີ ສ້າງລາຍຮັບໄດ້ 900.000 ໂດລາສະຫະລັດ.
ທ່ານ ວາລີ ຈືນໍເຢັງ ເຈົ້າເມືອງໄຊ ແຂວງອຸດົມໄຊ ໄດ້ໃຫ້ສໍາພາດຕໍ່ສື່ມວນຊົນ ກ່ອນກອງປະຊຸມເວທີສາກົນ ເພື່ອໂຄສະນາການທ່ອງທ່ຽວລາວ ລະຫວ່າງ 27-30 ພຶດສະພາ 2024 ນີ້ວ່າ: ເມືອງໄຊ ຈະຖືເອົາວຽກງານທ່ອງທ່ຽວບັນຈຸເຂົ້າເປັນບຸລິມະສິດສໍາຄັນ ເພື່ອສືບຕໍ່ປັບປຸງ ແລະ ພັດທະນາຂອດການບໍລິການ, ແຫລ່ງທ່ອງທ່ຽວໃໝ່ໃຫ້ສາມາດຮອງຮັບ ແລະ ດຶງດູດເອົານັກທ່ອງທ່ຽວພາຍໃນ ແລະ ຕ່າງປະເທດເຂົ້າມາເມືອງໄຊໃຫ້ຫລາຍຂຶ້ນກວ່າເກົ່າ.
ປັດຈຸບັນ, ພາຍໃນເມືອງ ມີແຫລ່ງທ່ອງທ່ຽວທັງເກົ່າ ແລະ ໃໝ່ລວມທັງໝົດ 14 ແຫ່ງ. ໃນນັ້ນ, ແຫລ່ງທ່ອງທ່ຽວທໍາມະຊາດ 7 ແຫ່ງ, ວັດທະນະທໍາ 5 ແຫ່ງ ແລະ ປະຫວັດສາດ 2 ແຫ່ງ. ສະຖານທ່ອງທ່ຽວທີ່ພົ້ນເດັ່ນກວ່າໝູ່ໄດ້ພັດທະນາ ແລະ ເປີດໃຫ້ບໍລິການແຫລ່ງທ່ອງທ່ຽວແລ້ວຄື: ຕາດນໍ້າກັດ, ຖໍ້າຈອມອອງ, ວັດພູທາດ ແລະ ອື່ນໆ. ປັດຈຸບັນ, ກໍາລັງພັດທະນາແຫລ່ງທ່ອງທ່ຽວທໍາມະຊາດ ພູຫຍ້າຄາ ຢູ່ (ບ້ານ ຫລັກ 32) ເພື່ອຮອງຮັບເອົານັກທ່ອງທ່ຽວຈາກພາຍໃນ ແລະ ຕ່າງປະເທດ ແລະ ຍັງໄດ້ ເຊັນບົດບັນທຶກຄວາມຊ່ວຍຈໍາ (MOU) ກັບນັກທຸລະກິດຫລາຍຫົວໜ່ວຍ ເພື່ອພັດທະນາແຫລ່ງທ່ອງທ່ຽວຕ່າງໆ ໃຫ້ຫລາຍຂຶ້ນຕື່ມ. ສະເພາະຂະແໜງການທ່ອງທ່ຽວພາຍໃນເມືອງສົມທຽບກ່ອນໂຄວິດ ແລະ ຫລັງໂຄວິດ 19 ລະບາດ ສາມາດຕີລາຄາເບື້ອງໄດ້ວ່າ ແຕ່ລະປີມີນັກທ່ອງທ່ຽວເຂົ້າມາທ່ອງທ່ຽວ ແລະ ໃຫ້ບໍລິການພາຍໃນເມືອງໄຊ ປະມານ 41.880 ກວ່າຄົນຕໍ່ປີ, ສ້າງລາຍຮັບໄດ້ 901.069 ໂດລາສະຫະລັດ. ກ່ອນໂຄວິດ-19 ລະບາດໃນປີ 2019 ມີນັກທ່ອງທ່ຽວເຂົ້າມາທ່ອງທ່ຽວເມືອງໄຊ ປະມານ 15.960 ກວ່າຄົນຕໍ່ປີ ສ້າງລາຍຮັບໄດ້ 659.538 ໂດລາສະຫະລັດ.
ທ່ານ ເຈົ້າເມືອງໄຊ ຍັງໃຫ້ຮູ້ອີກວ່າ: ເສັ້ນທາງລົດໄຟລາວ-ຈີນ ເປັນໜຶ່ງໃນກະແຈສໍາຄັນໃນການຂັບເຄື່ອນການພັດທະນາ ເສດຖະກິດ-ສັງຄົມ, ແກ້ໄຂຄວາມທຸກຍາກ, ສ້າງວຽກເຮັດງານທໍາ ເນື່ອງຈາກວ່າມີນັກທ່ອງທ່ຽວ, ນັກລົງທຶນໄດ້ເຂົ້າມາເມືອງຂອງພວກເຮົາຫລາຍຂຶ້ນຍ້ອນເສັ້ນທາງສະດວກສະບາຍ, ມີຄວາມປອດໄພສູງ, ຄ່າຂົນຜູ້ໂດຍສາຍ ແລະ ສິນຄ້າຖືກ, ປະຢັດເວລາ ເຊິ່ງໄລຍະຜ່ານມາ, ນັກທ່ອງທ່ຽວ ແລະ ນັກລົງທຶນເຂົ້າມາເມືອງໄຊ ແມ່ນໄດ້ໃຊ້ເວລາຫລາຍວັນ ແລະ ເສັ້ນທາງຫຍຸ້ງຍາກ ເຊິ່ງເປັນອຸປະສັກໜຶ່ງຕໍ່ການເດີນທາງ ແລະ ຂົນສົ່ງສິນຄ້າ. ແຕ່ມາຮອດປັດຈຸບັນເມືອງໄຊ ກາຍເປັນເມືອງທີ່ມີເສັ້ນທາງລົດໄຟລາວ-ຈີນແລນຜ່ານ ແລະ ທັງເປັນທາງຜ່ານໄປຍັງບັນດາແຂວງພາກເໜືອ, ເປັນປະຕູອອກສູ່ ສສ ຫວຽດນາມ, ສປ ຈີນ ແລະ ຣາຊະອານາຈັກໄທ.
ໃນອະນາຄົດ, ທາງເມືອງ ຈະສຸມໃສ່ພັດທະນາວຽກງານການທ່ອງທ່ຽວຢ່າງຕັ້ງໜ້າ ເປັນຕົ້ນ ຈະພະຍາຍາມຄົ້ນຄວ້າຊອກຫາແຫລ່ງທຶນ, ລະດົມນັກລົງທຶນທາງພາຍໃນ ແລະ ຕ່າງປະເທດ ມາລົງທຶນພັດທະນາແຫລ່ງທ່ອງທ່ຽວພາຍໃນເມືອງໄຊ ເພື່ອຮອງຮັບເອົານັກທ່ອງທ່ຽວມາໃຊ້ບໍລິການ; ຈະປັບປຸງ ແລະ ພັດທະນາແຫລ່ງທ່ອງທ່ຽວ ແບບປະຖົມປະຖານໃຫ້ມີປະສິດຕິພາບສູງຂຶ້ນກວ່າເກົ່າ ແລະ ສ້າງແຫລ່ງທ່ອງທ່ຽວແຫ່ງໃໝ່ຂຶ້ນ ໂດຍສະເພາະແມ່ນນໍ້າອອກຮູຫລັກ8, ຖໍ້າບ້ານມູນເມືອງ ແລະ ແຫລ່ງທ່ອງທ່ຽວອື່ນໆທີ່ເໝາະສົມ.
ຂ່າວ: ເກີດຂວັນໃຈ ມາລີຈັນສີ
