ຫ້ອງການ ກະສິກໍາ ແລະ ປ່າໄມ້ເມືອງໄຊ ແຂວງອຸດົມໄຊ ຈັດພິທີ ປ່ອຍປາ ເນື່ອງໃນໂອກາດ ວັນປ່ອຍປາ ແລະ ອະນຸລັກ ສັດນ້ຳ ແຫ່ງຊາດ ຄົບຮອບ 37 ປີ (13 ກໍລະກົດ 1987–13 ກໍລະກົດ 2024 ) ໃນວັນທີ 12 ກໍລະກົດ 2024 ທີ່ອ່າງນ້ຳຫີນ.
ທ່ານ ສຸລິວົງ ຍົດບຸນ ຮອງຫົວໜ້າຫ້ອງການ ກະສິກຳ ແລະ ປ່າໄມ້ ເມືອງໄຊ ແຂວງອຸດົມໄຊ ໄດ້ກ່າວວ່າ: ການຈັດພິທີ ໃນຄັ້ງນີ້ ກໍເພື່ອເປັນການ ສະເຫລີມສະຫລອງ ວັນປ່ອຍປາ ແລະ ອະນຸລັກສັດນ້ຳແຫ່ງຊາດ ໃຫ້ເຕັມໄປດ້ວຍຄວາໝາຍ, ຄວາມສຳຄັນ ແລະ ມີບັນຍາກາດຟົດຟື້ນ ທັງເປັນການປູກຈິດສຳນຶກໃຫ້ ຊາວໜຸ່ມ, ເຍົາວະຊົນ ຄົນຮຸ່ນຫລັງ ແລະ ຊັ້ນຄົນຕ່າງໆ ຮັບຮູ້, ເຂົ້າໃຈ ຕໍ່ກັບເນື້ອໃນ ແລະ ຄວາມໝາຍ ຂອງວັນດັ່ງກ່າວ ແລະ ພ້ອມກັນ ເປັນເຈົ້າການ ໃນການອະນຸລັກສັດນ້ຳ ກໍຄື ການປ່ອຍແນວພັນສັດນ້ຳ ຄືນສູ່ທຳມະຊາດ ເວົ້າລວມ, ເວົ້າສະເພາະ ກໍຄື ການປ່ອຍປາ ເພື່ອສ້າງເປັນວັງອະນຸລັກ ແລະ ວັງສະຫງວນ ແນ່ໃສ່ເຮັດໃຫ້ແນວພັນປາ ມີການແຜ່ຂະຫຍາຍນັບມື້ນັບເພີ່ມຂຶ້ນ, ເຊິ່ງແນວພັນປາທີ່ນຳມາປ່ອຍຢູ່ທີ່ອ່າງນ້ຳຫີນໃນຄັ້ງນີ້ ມີ 1 ແສນກວ່າໂຕ ປະກອບມີ: ປານິນ 20 ພັນກວ່າໂຕ, ປາໄນ 30 ພັນກວ່າໂຕ, ປາປາກ 20 ພັນກວ່າໂຕ, ປາອິນເດຍ 30 ພັນກວ່າໂຕ, ປານວນຈັນ 2.500 ໂຕ ແລະ ປາກິນຫຍ້າ 2.500 ໂຕ.
ທ່ານ ສຸລິວົງ ຍົດບຸນ ກ່າວຕື່ມອີກວ່າ: ພາຍຫລັງທີ່ສຳເລັດການປ່ອຍປາໃນຄັ້ງນີ້ແລ້ວ ແມ່ນຫ້າມທຸກຄົນໃນສັງຄົມ ນຳເອົາປາ ທີ່ບໍ່ໄດ້ຮັບອະນຸຍາດ ຈຳນວນ 11 ຊະນິດ ເປັນຕົ້ນ ປານິນຄາງດຳ, ປານິນມາຍັນ, ປານິນບັດເຕີ, ປາຄໍ່ອາເມຊອນ, ປາດູດຝຸ່ນ, ປາວີ, ປາປີລັນຢາ ແລະ ປາທຸກຊະນິດທີ່ຕັດແຕ່ງພັນທຸກຳ ນຳມາປ່ອຍຢູ່ທີ່ອ່າງນ້ຳຫີນ ດັ່ງກ່າວນີ້ຢ່າງເດັດຂາດ ເພາະມັນຈະສົ່ງຜົນກະທົບຕໍ່ລະບົບນິເວດ ພ້ອມທັງຮຽກຮ້ອງໃຫ້ທຸກພາກສ່ວນ ໃນສັງຄົມ ເປັນເຈົ້າການຊ່ວຍກັນປົກປັກຮັກສາ, ອະນຸລັກສັດນ້ຳ ໂດຍສະເພາະ ປາ ຢູ່ບໍລິເວນອ່າງນ້ຳຫີນ ແລະ ຫ້າມຫາປາແບບດັບສູນ.
ຂ່າວ: ຄານມະນີ ຮຽນດໍຈັນ
