ໃນວັນທີ 20 ສິງຫາ 2024, ທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ ພ້ອມດ້ວຍຄະນະ ລົງຕິດຕາມກວດກາເບິ່ງຜົນເສຍຫາຍຕົວຈິງ ຈາກໄພພິບັດນ້ຳຖ້ວມ ໃນລະຫວ່າງວັນທີ 29-30 ກໍລະກົດ ຜ່ານມາ ຢູ່ເຂດລ້ອງນ້ຳໂມ້ ເມືອງໝອກ ແຂວງຊຽງຂວາງ.
ທ່ານ ມີສຸກ ຂັນທະຍົງທອງ ເຈົ້າເມືອງໆໝອກ ໄດ້ລາຍງານວ່າ: ໄພພິບັດນ້ຳຖ້ວມເກີດຂຶ້ນຢູ່ເມືອງໝອກ ເປັນຕົ້ນ ເຂດລ້ອງນ້ຳໂມ້ ເຮັດໃຫ້ດິນເຈື່ອນທັບເຮືອນປະຊາຊົນ ເສຍຫາຍ 1 ຫລັງ, ເນື້ອທີ່ທຳການຜະລິດ 6 ບ້ານ ໃນນີ້, ເນື້ອທີ່ນາ 210,8 ເຮັກຕາ, ມີນາເສຍຫາຍ 120.8 ເຮັກຕາ, ໄຮ່ເຂົ້າ 11 ເຮັກຕາ, ສວນສາລີ 45 ເຮັກຕາ, ເນື້ອທີ່ພືດຕ່າງໆ 42 ເຮັກຕາ, ໜອງປາ 1 ໜອງ, ງົວ 3 ໂຕ ແລະ ເສັ້ນທາງຂອງເມືອງເປ່ເພ 5 ເສັ້ນ ລວມມູນຄ່າເສຍຫາຍ 6 ຕື້ກວ່າກີບ.
ຕໍ່ເຫດການດັ່ງກ່າວ, ຄະນະກຳມະການຄຸ້ມຄອງໄພພິບັດຂັ້ນແຂວງ ແລະ ເມືອງ ກໍໄດ້ລົງຊ່ວຍສຸກເສີນ ຕໍ່ຄອບຄົວຜູ້ທີ່ຖືກຜົນກະທົບໂດຍໄດ້ນຳເອົາສັງກະສີມຸງເຮືອນ, ເຫລັກຕະປູ ແລະ ເຄື່ອງອຸປະໂພກ-ບໍລິໂພກຈຳນວນໜຶ່ງ ມອບໃຫ້ຄອບຄົວດັ່ງກ່າວ.
ໂອກາດນີ້, ທ່ານ ບຸນຈັນ ສີວົງພັນ ໄດ້ເນັ້ນໃຫ້ອຳນາດການປົກ ຄອງບ້ານ ແລະ ພໍ່ແມ່ປະຊາຊົນ ເຂດລ້ອງນ້ຳໂມ້ ເຕົ້າໂຮມຄວາມສາມັກຄີຊ່ວຍເຫລືອເຊິ່ງກັນ ແລະ ກັນ, ຕິດຕາມເຝົ້າລະວັງໄພພິບັດທີ່ຈະເກີດຂຶ້ນ, ກວດກາປ້ອງກັນພະຍາດໃນລະດູຝົນ ພ້ອມນີ້, ພະແນກການທີ່ກ່ຽວຂ້ອງ ຕ້ອງລົງກວດກາປະເມີນແກ້ໄຂສຸກເສີນໃນສະເພາະໜ້າ ແລະ ຍາວນານ ຕໍ່ກັບຜົນເສຍຫາຍຈາກໄພພິບັດໃນຄັ້ງນີ້ ພ້ອມທັງລົງຊຸກຍູ້ປະຊາຊົນ ໃນການ ແກ້ໄຂຟື້ນຟູ ແລະ ປູກພືດທົດແທນພາຍຫລັງນ້ຳຫລຸດລົງ.
ໃໂອກາດດຽວກັນ, ການນຳແຂວງ ຍັງໄດ້ນຳເອົາເຄື່ອງອຸປະ ໂພກ-ບໍລິໂພກຈຳນວນໜຶ່ງ ມອບໃຫ້ປະຊາຊົນທີ່ຖືກຜົນກະທົບ ເປັນຕົ້ນ ເຂົ້າສານ, ນ້ຳດື່ມ, ແນວພັນພືດ, ໝີ່, ປ່ອງປາ, ເກີບ, ປື້ມຂຽນ ລວມມູນຄ່າ 56 ກີບ. ນອກຈາກນີ້, ອົງການປົກຄອງແຂວງ ແລະ ທະນາຄານກາງສາຂາຊຽງຂວາງ ໄດ້ມອບເງິນຈຳນວນໜຶ່ງ ໃຫ້ອົງການປົກຄອງເມືອງໝອກ ເພື່ອໝູນໃຊ້ເຂົ້າໃນວຽກງານຂອງເມືອງຕື່ມອີກ.
ຂ່າວ: ບຸນມີແສງທຸມມີ
