ວັນທີ 05 ທັນວາ 2020 ນີ້ ເມືອງ ຕົ້ນເຜິ້ງ ແຂວງບໍ່ແກ້ວ ໄດ້ເລີ່ມປະຕິບັດມາດຕະການປິດເມືອງຊົ່ວຄາວ ຕາມຄໍາສັ່ງ ເລກທີ 1389 ຂອງຄະນະສະເພາະກິດປ້ອງ ກັນ, ຄວບຄຸມ ແລະ ແກ້ໄຂການແຜ່ລະບາດພະຍາດ ໂຄວິດ-19 ຂັ້ນແຂວງ ແລະ ຄໍາສັ່ງເລກທີ 016 ຂອງເຈົ້າເມືອງໆ ຕົ້ນເຜິ້ງ ວ່າດ້ວຍການເພີ່ມທະວີມາດຕະການສະກັດກັ້ນ, ປ້ອງກັນ, ຄວບຄຸມ ແລະ ກຽມພ້ອມຮອບດ້ານ ເພື່ອຕອບໂຕ້ໄວຕໍ່ການລະບາດຂອງພະຍາດດັ່ງກ່າວທີ່ເກີດຂຶ້ນຢູ່ປະເທດໃກ້ຄຽງ.
ຄະນະສະເພາະກິດຂອງເມືອງ ໄດ້ມອບໝາຍມອບ ໃຫ້ຫ້ອງການໂຍທາທິການ ແລະ ຂົນສົ່ງເມືອງສົມທົບກັບສະມາຄົມເຮືອ, ອົງການປົກຄອງບ້ານ, ເຈົ້າໜ້າທີ່ກ່ຽວຂ້ອງນໍາພາ ປກສ – ກອງຫຼອນບ້ານ, ເຈົ້າຂອງເຮືອ ເຄື່ອນຢ້າຍເຮືອນ້ອຍ, ເຮືອກາບ, ເຮືອຫາປາຂຶ້ນຝັ່ງ, ເຕົ້າໂຮມເຮືອໃຫຍ່ບັນທຸກສິນຄ້າຈອດລວມໄວ້ເປັນຈຸດດຽວເພື່ອສະ ດວກໃນການຄຸ້ມຄອງ, ຕິດຕາມກວດກາ ແລະ ໃຫ້ໂຈະການເຄື່ອນໄຫວກິດຈະການເດີນເຮືອຂົນສົ່ງສິນຄ້າທຸກປະເພດ, ແຕ່ງຕັ້ງທິມງານ ປກສ – ກອງຫຼອນບ້ານ, ເຈົ້າໜ້າທີ່ຕໍາຫຼວດ, ສາທາລະນະສຸກ ລົງປະຈໍາຈຸດເຂົ້າ – ອອກເມືອງ ຈຸດບ້ານນ້ໍາເກິ່ງເກົ່າ, ຈຸດບ້ານມ່ວງຄໍາ, ຈຸດປະຕູໂຂງເຂົ້າເທດສະບານເມືອງ ເພື່ອປ້ອງກັນບໍ່ໃຫ້ມີການເຂົ້າ – ອອກຂອງພົນລະເມືອງ ແລະ ກວດອຸນຫະພູມ ຢ່າງເຂັ້ມງວດ.
ສ່ວນບັນດາບ້ານໃນຂອບເຂດເມືອງແມ່ນໃຫ້ຈັດຕັ້ງການປ້ອງກັນເວນຍາມຕະຫຼອດ 24 ຊົ່ວໂມງ ບໍ່ໃຫ້ຄົນທີ່ມາຈາກຕ່າງບ້ານ, ຕ່າງເມືອງ, ຕ່າງແຂວງ ແລະ ຕ່າງປະ ເທດ ເຂົ້າມາໃນຊ່ວງເວລານີ້ເດັດຂາດ ຍົກເວັ້ນຄະນະສະ ເພາະກິດ ແລະ ກໍລະນີເຈັບເປັນໄປຮັກສາສຸຂະພາບ, ໄປຊື້ອາຫານການກິນຢູ່ຕະຫຼາດ, ໄປທໍາການຜະລິດປູກຝັງລ້ຽງ ສັດ ແລະ ພະນັກງານ, ທະຫານ, ຕໍາຫຼວດ ໄປປະຕິບັດຫນ້າທີ່ ແຕ່ຕ້ອງໄດ້ຮັບອະນຸຍາດ ຈາກການຈັດຕັ້ງຂັ້ນບ້ານທີ່ກ່ຽວຂ້ອງ ແລະ ຕ້ອງປະຕິບັດຕາມລະບຽບ ຂອງຄະນະສະເພາະກິດວາງອອກ ນອກນັ້ນ ຍັງໄດ້ແຈ້ງໃຫ້ໂຮງຮຽນໃນຂອບຂອບທົ່ວເມືອງປິດການຮຽນ – ການສອນຊົ່ວ ຄາວ, ແຈ້ງໃຫ້ຜູ້ປະກອບການພາຍໃນເມືອງໃຫ້ປິດກິດຈະ ການຮ້ານບັນເທີງ, ຮ້ານຄາຣາໂອເກະ, ຮ້ານເບຍ, ຮ້ານບໍລິ ການນວດ, ສະປາທຸກປະເພດ, ສະຖານທີ່ອອກກໍາລັງກາຍ ແລະ ຫຼີ້ນກິລາ, ຕະຫຼາດກາງຄືນ ທີ່ມີຄວາມສ່ຽງໃນການລະບາດ ແລະ ມາດຕະການອື່ນໆ ຕາມຄໍາສັ່ງເລກທີ 06 / ນຍ ລົງວັນທີ 30 ມີນາ 2020.
ການຈັດຕັ້ງປະຕິບັດມາດຕະການປິດເມືອງຄັ້ງນີ້ຈະດຳເນີນໄປໂດຍບໍ່ມິກຳນົດ ຖ້າມີການປ່ຽນແປງ ທາງຄະນະສະເພາະກິດຂັ້ນແຂວງ, ຂັ້ນເມືອງ ຈະແຈ້ງໃຫ້ທົ່ວສັງຄົມຮັບຮູ້ແຕ່ລະໄລຍະ.
 
Cr: ອຸໄທ ພູມມາ.
Loading...