ປັດຈຸບັນຄະນະພັກ ອໍານາດການປົກຄອງເມືອງ ສາມັກຄີໄຊ ແຂວງ ອັດຕະປື ກໍ່ຄືຫ້ອງການກະສິກໍາ ແລະ ປ່າໄມ້ເມືອງ ພວມກໍາລັງສຸມໃສ່ການກະກຽມດ້ານຄວາມພ້ອມ ໃຫ້ແກ່ການປູກຕົ້ນໄມ້ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2024 ທີ່ຈະມາເຖິງນີ້, ທັງນີ້ກໍ່ເພື່ອເປັນການຄືນຄວາມອຸດົມສົມບູນຂອງປ່າໄມ້ທໍາມະຊາດ ແລະ ເພີ່ມພື້ນທີ່ສີຂຽວໃຫ້ກັບຕົວເມືອງ.
ທ່ານ ນາງ ລັດສະໄໝ ຄໍາພິລາວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ສາມັກຄີໄຊ ໄດ້ໃຫ້ສໍາພາດເມື່ອວັນທີ 27 ພຶດສະພາ 2024 ນີ້ວ່າ: ປັດຈຸບັນເມືອງ ສາມັກຄີໄຊ ມີເນື້ອທີ່ປົກຫຸ້ມຂອງປ່າໄມ້ 22.600 ກວ່າເຮັກຕາ ຫຼື ກວມເອົາ 46% ຂອງເນື້ອທີ່ທົ່ວເມືອງ, ເຊິ່ງໃນປີທີ່ຜ່ານມາ ສະພາບການຈັດຕັ້ງປະຕິບັດການປູກໄມ້ຢູ່ໃນ 3 ປະເພດປ່າ ແມ່ນຫຼຸດຄາດໝາຍຢູ່ 36% ແລະ ປູກເຂດນອກ 3 ປະເພດປ່າຫຼຸດຄາດໝາຍ 56%, ເຊິ່ງສະເພາະປີນີ້ ເພື່ອເຮັດໃຫ້ການປູກໄມ້ເພີ່ມຂຶ້ນ ແລະ ເນື່ອງໃນໂອກາດວັນທີ 1 ມີຖຸນາ 2024 ວັນປູກຕົ້ນໄມ້ແຫ່ງຊາດ ອໍານາດການປົກຄອງເມືອງ ສາມັກຄີໄຊ ໄດ້ກຽມຄວາມພ້ອມໃຫ້ແກ່ວັນດັ່ງກ່າວ, ໂດຍການກະກຽມເນື້ອທີ່ປູກຢູ່ 3 ຈຸດຂອງບ້ານ ກະຍື, ລວມເນື້ອທີ່ຫຼາຍກວ່າ 1 ເຮັກຕາ, ນອກນັ້ນຍັງໄດ້ກະກຽມເບ້ຍໄມ້ໄດ້ຈໍານວນ 500 ກ່ວາເບ້ຍ, ເພື່ອຈັດພິທີການປູກໃນວັນປູກຕົ້ນໄມ້ແຫ່ງຊາດ ທີ່ຈະມາເຖິງ.
ທ່ານ ນາງ ລັດສະໄໝ ຄໍາພິລາວົງ ຫົວໜ້າຫ້ອງການກະສິກຳ ແລະ ປ່າໄມ້ເມືອງ ສາມັກຄີໄຊ ໄດ້ໃຫ້ຮູ້ຕື່ມວ່າ: ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມີຖຸນາ 2024 ທີ່ຈະມາເຖິງ ຂໍເຊີນຊວນທຸກພາກສ່ວນສັງຄົມ, ທຸກອົງການຈັດຕັ້ງ ແລະ ປະຊາຊົນບັນດາເຜົ່າ ຈົ່ງເຂົ້າຮ່ວມຂະບວນການປູກຕົ້ນໄມ້ໃຫ້ເປັນຂະບວນການຟົດຟື້ນ ເພື່ອປຸກຈິດສໍານຶກໃຫ້ເດັກນ້ອຍ ມີຈິດໃຈຮັກທໍາມະຊາດ ທັງເປັນການປູກຕົ້ນໄມ້ ເພື່ອຄືນຄວາມອຸດົມສົມບູນ ໃຫ້ແກ່ຜືນປ່າ ແລະ ຮັກສາລະລະບົບນິເວດວິທະຍາໃຫ້ມີຄວາມອຸດົມສົມບູນ ກ້າວໄປເຖິງການສ້າງຕົວເມືອງສີຂຽວໃນອານາຄົດ.
ຂ່າວ: ວ. ຫລວງອາໄພ
