ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເມືອງ ໄຊຍະບູລີ ປະສົບໄພນ້ຳຖ້ວມ

ພາຍຫຼັງເກີດມີຝົນຕົກໜັກ, ຕໍ່ເນື່ອງກັນເປັນເວລາ 3 ວັນ ພໍມາຮອດວັນທີ 03 ສິງຫາ ນີ້ລະດັບນ້ຳຮຸ່ງ ເຊິ່ງເປັນສາຍນ້ຳໄຫຼຜ່ານເຂດໃຈກາງເທດສະບານ ເມືອງ ໄຊຍະບູລີ ແຂວງ ໄຊຍະບູລີ ໄດ້ຍື່ງສູງຂຶ້ນລົ້ນຝັ່ງ; ໄຫຼເຂົ້າຖ້ວມເຮືອນຊານ, ຮົ້ວສວນຂອງປະຊາຊົນ ທີ່ຢູ່ບ່ອນຕ່ຳລຽບຕາມແຄມຫ້ວຍຮ່ອງ ໜອງບຶງ ແລະ ຕາມແຄມແມ່ນ້ຳຮຸ່ງ ໂດຍສະເພາະແມ່ນຢູ່ເຂດບ້ານ ວັງຊອຍ, ບ້ານ ທ່ານາ, ບ້ານ ນາໄຮ, ນາຕໍໃຫຍ່, ນາເລົາ, ໜອງແຊງ, ບ້ານບຸ່ງ, ບ້ານຖິ່ນ, ສີເມືອງ, ນາຊ່ຳ ແລະ ບ້ານອື່ນໆ ເຊິ່ງມີປະຊາຊົນຫຼາຍຄອບຄົວໄດ້ຮັບຄວາມເດືອດຮ້ອນຈາກໄພພິບັດທີ່ເກີດຂຶ້ນໃນຄັ້ງນີ້.

ຕໍ່ສະພາບດັ່ງກ່າວ, ຄະນະກໍາມະການປ້ອງກັນ ແລະ ຄວບຄຸມໄພພິບັດ ແຂວງ ໄຊຍະບູລີ ກໍໄດ້ແຕ່ງຕັ້ງຄະນະຮັບຜິດຊອບລົງຕິດຕາມ, ເຝົ້າລະວັງໃນຈຸດຕ່າງໆທີ່ມີຄວາມສ່ຽງ; ພ້ອມທັງຈັດສະຖານທີ່ພັກເຊົາຊົ່ວຄາວໄວ້ຮອງຮັບໃຫ້ຜູ່ທີ່ໄດ້ຮັບຜົນກະທົບ ແລະ ປຸກລະດົມກຳລັງຈາກ ກອງບັນຊາການ ປກສ ແຂວງ, ກອງບັນຊາການທະຫານແຂວງ ສົມທົບກັບພາກສ່ວນຕ່າງໆ ເຂົ້າໄປຊ່ວຍເຫຼືອ ປະຊາຊົນ ຂົນເຄື່ອງຂອງ, ສັດສາວາສິ່ງອອກຈາກບໍລິເວນນ້ຳຖ້ວມ ໄປໄວ້ໃນເຂດທີ່ປອດໄພ, ພ້ອມທັງໂຄສະນາປຸກລະດົມໃຫ້ທຸກຄົນເອົາໃຈໃສ່ຕິດຕາມສະພາບດິນຟ້າອາກາດຢ່າງໃກ້ຊິດ.

ພາຍຫຼັງລະດັບນໍ້າຮຸ່ງຫລຸດລົງ ແລະ ມີທ່າອ່ຽງກັບຄືນເຂົ້າສູ່ສະພາວະປົກກະຕິ ເລີ່ມແຕ່ຕອນເຊົ້າວັນທີ 04 ສິງຫາ ນີ້, ຄະນະຮັບຜິດຊອບ ໄດ້ສືບຕໍ່ລົງຕິດຕາມສະພາບຢູ່ແຕ່ລະຈຸດທີ່ປະສົບໄພນ້ຳຖ້ວມ; ເຂດໃດທີ່ມີຄວາມປອດໄພ ກໍໄດ້ປຸກລະດົມໃຫ້ແຕ່ລະຄອບຄົວຊ່ວຍກັນອະນາໄມທຳຄວາມສະອາດ ຕາມສະຖານທີ່ເຮືອນຊານບ້ານຊ່ອງ ແລະ ຊ່ວຍເຄື່ອນຍ້າຍເຄື່ອງຂອງເຂົ້າໄວ້ໃນເຮືອນ; ພ້ອມທັງສຶກສາອົບຮົມໃຫ້ແຕ່ລະຄົນມີແນວຄິດອຸ່ນອ່ຽນທຸ່ນທ່ຽງ, ຕ້ານ ແລະ ສະກັດກັ້ນປະກົດການຫຍໍ້ທໍ້ທີ່ອາດຈະເກີດຂຶ້ນຢູ່ໃນໄລຍະເກີດໄພພິບັດນ້ຳຖ້ວມ; ສ່ວນຜົນເສຍຫາຍ ຍັງຢູ່ລະຫວ່າງ ການກວດກາຂອງຄະນະຮັບຜິດຊອບທີ່ກ່ຽວຂ້ອງ.

ຂ່າວ: ສີເມືອງ ໄຊຍະເວດ