ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເລຂາຄະນະບໍລິຫານງານສູນກາງສູນກາງຊາວໜຸ່ມປະຊາຊົນປະຕິວັດລາວລົງເຄື່ອນໄຫວເຮັດວຽກທີ່ແຂວງບໍລິຄຳໄຊ

ຄະນະນຳສູນກາງຊາວໜຸ່ມ, ນຳໂດຍສະຫາຍ ອາລຸນໄຊ ສູນນະລາດ ກຳມະການສຳຮອງສູນກາງພັກ, ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວພ້ອມຄະນະ ໄດ້ລົງໄປເຄື່ອນໄຫວເຮັດວຽກຊຸກຍູ້ຂະບວນການຊາວໜຸ່ມທີ່ແຂວງບໍລິຄຳໄຊ ໃນລະຫວ່າງວັນທີ 7 ຫາ 9 ມັງກອນ 2020 ນີ້, ໂດຍໃຫ້ກຽດຕ້ອນຮັບຂອງສະຫາຍ ທອງມະນີ ໂຄດປັນຍາ ເລຂາຄະນະບໍລິຫານງານຊາວໜຸ່ມແຂວງບໍລິຄຳໄຊ; ໃນໂອກາດກາດລົງມາເຮັດວຽກໃນຄັ້ງນີ້ ຄະນະດັງກ່າວຍັງໄດ້ເຂົ້າພົບຄະນະນຳຂອງແຂວງ ເຊິ່ງໃຫ້ກຽດຕ້ອນຮັບຢ່າງອົບອຸ່ນຈາກ ສະຫາຍ ກອງແກ້ວ ໄຊສົງຄາມ ກຳມະການສູນກາງພັກ, ເລຂາຄະນະພັກແຂວງ ເຈົ້າແຂວງໆບໍລິຄຳໄຊ. ເຊິ່ງທັງສອງຝ່າຍໄດ້ພົບປະ ລາຍງານສະພາບການ ແລະ ຜົນງານທີ່ພົ້ນເດັນ, ຈຸດປະສົງໃນການໃນການມາເຄື່ອນໄຫວຄັ້ງນີ້, ພ້ອມກັບຮັບຝັງການຕີລາຄາຈາກຄະນະພັກຕໍ່ການຈັດຕັງຊາວໜຸ່ມຂອງແຂວງບໍລິຄຳໄຊໃນໄລຍະຜ່ານມາ.

ຫຼັງຈາກນັ້ນຄະດັງກ່າວໄດ້ສືບຕໍ່ລົງເຄື່ອນໄຫວເຮັດວຽກຢູ່ສູນມິດຕະພາບຊາວໜຸ່ມລາວ-ຫວຽດນາມ ເມືອງຄຳເກີດ, ແຂວງບໍ່ລິຄໍາໄຊ, ໂດຍໃຫ້ກຽດຕ້ອນຮັບຈາກສະຫາຍ ສົມສີ ໄຊເສດຕະລາດ ຫົວໜ້າສູນມິດຕະພາບຊາວໜຸ່ມລາວ-ຫວຽດນາມ; ເຊິ່ງສູນດັງກ່າວແມ່ນເລີ່ມຈາກໂຄງການສ້າງບ້ານມິດຕະພາບຊາວໜຸ່ມຊາຍເດນລາວ-ຫວຽດນາມ ໂດຍນຳໃຊ້ທຶນຊ່ວຍເຫຼືອຂອງລັດຖະບານ ສສ ຫວຽດນາມ ມອບໃຫ້ລັດຖະບານລາວ ແລະ ໄດ້ມີພິທີມອບຮັບສູນດັງກ່າວໃນເດືອນ 3 ປີ 2017 ເປັນຕົ້ນມາ; ຄະນຳຈາກສູນການຊາວໜຸ່ມລົງເຄື່ອນໄຫວເຮັດວຽກຄັ້ງນີ້ຍັງໄດ້ນຳເອົານັກວິຊາການຈາກກະຊວງກະສິກຳ ແລະ ປ່າໄມ້ ຈຳນວນໜຶ່ງ ນຳໂດຍສະຫາຍ ບຸນຈັນ ກົມບຸນຍະສິດ ຮອງເລຂາຄະນະບໍລິຫານງານຊາວໜຸ່ມກະຊວງກະສິກຳລະປ່າໄມ້, ຈຸດປະສົງມາສຳຫຼວດຟື້ນທີ່ຕົວຈິງ ແລະ ສຶກສາຄວາມເປັນໄປໄດ້ໃນການຮ່ວມມືກັນລະຫວ່າງຂະແໜງກະສິກຳປ່າໄມ້ ກັບສູນມິດຕະພາບຊາວໜຸ່ມລາວ-ຫວຽດນາມ, ເພື່ອສ້າງໃຫ້ສູນດັງກ່າວມີຄວາມເຕີບໃຫຍ່ເຂັ້ມແຂງ, ກາຍເປັນຕົວແບບທາງດ້ານກະສິກຳ, ເພື່ອດຶງດູດເອົາຊາວໜຸ່ມ ແລະ ຄອບຄົວຊ່າວໜຸ່ມໃນທ້ອງຖິ່ນສາມາດເຂົ້າມາຮຽນຮູ້ ແລະ ສ້າງອາຊີບທີ່ຍືນຍົງ, ຂຸດຄົ້ນຄວາມສາມາດບົ່ມຊ້ອນຢ່າງມີປະສິດທິຜົນ, ຜ່ານໂຄງການຝຶກອົບຮົມສ້າງອາຊີບ, ນຳໃຊ້ ແລະ ຖ່າຍທອດຄວາມກ້າວໜ້າຂອງເຕັກນິກວິທະຍາສາດການກະສິກຳ-ປ່າໄມ້, ຜ່ານໂຄງການເປີດກ້ວາງຮູບແບບຊາວໜຸ່ມເຂົ້າຮ່ວມໃນການພັດທະນາເສດຖະກິດ-ສັງຄົມ, ປະກອບສ່ວນເຂົ້າໃນການແກ້ໄຂວຽກເຮັດງານທຳ, ເຕົ້າໂຮມຄວາມສາມັກຄີຊາວໜຸ່ມລາວບັນດາເຜົ່າ. ເພີ່ມທະວີຄວາມສາມັກຄີມິດຕະພາບ, ການຮ່ວມມືຮອບດ້ານລະຫວ່າງຄະນະນຳຊາວໜຸ່ມສອງປະເທດລາວ-ຫວຽດນາມ.

ໂອກາດການລົງມາຄັ້ງນີ້ ຄະນະໄດ້ສືບຕໍ່ລົງພົບປະໂອ້ລົມກັບຊາວໜຸ່ມເມືອງຄຳເກີດ, ໂດຍການຕ້ອນຮັບຂອງສະຫາຍ ທອງໄຂ ທຳມະວົງ ເລຂາຊາວໜຸ່ມເມືອງຄຳເກີດ, ພິທີໄດ້ຈັດຂຶ້ນທີ່ສະໂມສອນຂອງເມືອງ, ມີສະມາຊິກຊາວໜຸ່ມທີ່ມາຈາກບັນດາຫ້ອງການ, ຂະແໜງການຕ່າງໆ ຕະຫຼອດຮອດນັກຮຽນທີ່ເປັນສະມາຊິກຊາວໜຸ່ມ-ເຍົາວະຊົນອອ້ມຂ້າງເມືອງຄຳເກີດເຂົ້າຮ່ວມຢ່າງພ້ອມພຽງ. ໃນພິທີໄດ້ຮັບຟັງການລາຍງານ ການເຄື່ອນໄຫວວຽກງານຊາວໜຸ່ມ-ເຍົາວະຊົນ ທີ່ພົ້ນເດັ່ນໃນໜຶ່ງປີທີ່ຜ່ານມາ ໂດຍສັງເຂບ ຈາກສະຫາຍເລຂາຊາວໜຸ່ມເມືອງ ໃຫ້ຊາບວ່າປັດຈຸບັນຄະນະບໍລິຫານງານຊາວໜຸ່ມເມືອງຄຳເກີດ ມີ 24 ສະຫາຍ, ຍິງ 4 ສະຫາຍ, ເປັນຄະນະປະຈຳ 9 ສະຫາຍ, ມີສະມາຄົມນັກທຸລະກິດໜຸ່ມ 1 ສະມາຄົມ ມີ 25 ສະຫາຍ, ຍິງ 2 ສະຫາຍ, ມີໜ່ວຍຊາວໜຸ່ມທັງໝົດ 100 ໜ່ວຍ, 6 ຮາກຖານ, ທົ່ວເມືອງມີເກນໄວໜຸ່ມທັງໝົດ 15.325 ຄົນ, ເປັນຍິງ 7.255 ຄົນ ໃນນັ້ນເປັນສະມາຊິກຊາວໜຸ່ມປະຊາຊົນປະຕິວັດລາວ ຈຳນວນ 8.719 ສະຫາຍ, ຍິງ 5.435 ສະຫາຍ; ໃນນັ້ນເປັນພະນັກງານທີ່ເຮັດວຽກຊາວໜຸ່ມເມືອງ 7 ສະຫາຍ, ຍິງ 3 ສະຫາຍ. ຈາກນັ້ນສະຫາຍ ອາລຸນໄຊ ສຸນນະລາດ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດ ໄດ້ໃຫ້ກຽດໂອ້ລົມຕໍ່ກອງປະຊຸມ, ກອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະຊາວໜຸ່ມຍາດມາໄດ້ໃນໄລຍະຜ່ານມາ, ພິເສດແມ່ນຄວາມສາມາດໃນການປຸກລະດົມປຸ້ມລຸມຄວາມສາມັກຄີເປັນປຶກແຜ່ນແໜ້ນໜາ, ຮຽກຮ້ອງໃຫ້ຊາວໜຸ່ມແຕ່ລະຂັ້ນຕ້ອງໄດ້ຮູ້ ແລະ ເຂົ້າໃຈແຈ້ງຕໍ່ພາລະບົດບາດ, ສິດ ແລະ ໜ້າທີ່ຂອງຕົນໄດ້ຢ່າງໜັກແໜ້ນ, ຖືເອົາວຽກງານສຶກສາອົບຮົມປູກຈິດສຳນຶກໃຫ້ແກ່ໜໍ່ແໜງຂອງຊາດເປັນບັນຫາສຳຄັນ, ຕີຕ້ານບັນຫາປະກົດການຫຍໍ້ທໍ້ທີ່ເກີດຂຶ້ນກັບກຸ່ມຊາວໜຸ່ມ ເປັນຕົ້ນແມ່ນຄ່ານິຍົມທີ່ບໍ່ຖືກຕ້ອງ, ປັບປຸງຮູບແບບ ແບບແຜນໃນການນຳພາຊາວໜຸ່ມໃຫ້ແທບເໝາະ, ສອດຄ່ອງ ແລະ ທັນສະໄໝກັບຄວາມຕ້ອງການຂອງຊາວໜຸ່ມໃນຍຸກປະຈຸບັນ ເພື່ອຮັບປະກັນບໍ່ໃຫ້ຊາວໜຸ່ມລົງຫຼົງຜິດ, ຕົກເປັນເຫຍື່ອຂອງກຸ່ມຄົນບໍ່ດີມາໝູນໃຊ້ທຳລາຍລະບອບຂອງພວກເຮົາ ເພາະກຳລັງຊາວໜຸ່ມເປັນກຳລັງຍຸດທະສາດ ແລະ ເປັນກຳລັງໃຫຍ່ໂຕໂຫຖານ ກວມເອົາ 60 % ຂອງພົນລະເມືອງໃນທົ່ວປະເທດ, ພ້ອມດຽວກັນນັ້ນຕ້ອງໄດ້ຍົກສູງຄວາມຮູ້-ຄວາມສາມາດຂອງຕົນຂຶ້ນຢ່າງບໍ່ຢຸດຢັ້ງເພື່ອຮັບປະກັນໃນການເຊື່ອມໂຍມກັບສາກົນ.

ການລົງມາເຮັດວຽກຄັ້ງນີ້ ຄະນະນຳຈາກສູນກາງຊາວໜຸ່ມຍັງໄດ້ຍາດເວລານຳເອົາກະຕ່າໝາກໄມ້ ພ້ອມດ້ວຍຄຳອວຍພອນອັ່ນປະເສີດ ເຂົ້າອວຍພອນແດ່ ພໍ່ເຖົ້າ  ບຸນຮອງ ຊົງລ່າຫວ່າງ ອາຍຸ 74 ປີ, ພະນັກງານບໍານານອາດີດການນຳຫຼັກແຫຼ່ງຂອງເມືອງ ກໍຄືແຂວງບໍລິຄຳໄຊ ເພື່ອສະແດງຄວາມກະຕັນຍູ ຮູ້ບຸນຄຸນ, ເຫັນໄດ້ຜົນງານ ຄຸນງາມຄວາມດີ ຂອງການນຳໃນຮຸ່ນກ່ອນທີ່ເພິ່ນໄດ້ເສຍສະຫລະເວລາ ອອກເຫື່ອເທແຮງ ສຸມສະຕິປັນຍາໃນການກອບກູ້ປະເທດຊາດ ກໍຄື່ໄລຍະປົກປັກຮັກສາປະເທດຊາດມາໃຫ້ພວກເຮົາໄດ້ຢູ່ເຢັນເປັນສຸກຄືສູ່ມື້ນີ້. ສະນັ້ນຈຶ່ງເວົ້າໄດ້ວ່າ: ໄດ້ກິນນໍ້າ ບໍ່ລືມບໍ່,  ໄດ້ກິນໝາກ ບໍ່ລືມຜູ້ປູກ, ຍ້ອນມືເພິ່ນໃນວັນນັ້ນ ຈຶ່ງມີເຮົາໃນວັນນີ້.

ພາລະກິດສຸດທ້າຍຂອງການລົງມາເຄື່ອນໄຫວຂອງຄະນະໃນຄັ້ງນີ້, ຄະນະນຳຈາກສູນກາງຊາວໜຸ່ມຍັງໄດ້ເຂົ້າພົບປະໂອ້ລົມກັບຊາວໜຸ່ມທີ່ຢູ່ບັນດາ ພະແນກການອ້ອມຂ້າງແຂວງບໍລິຄຳໄຊ, ບັນດາຫ້ອງການອອ້ມຂ້າງເມືອງປາກຊັນ ຕະຫຼອດຮອດສະມາຊິກຊາວໜຸ່ມ-ເຍົາວະຊົນທີ່ມາຈາກບັນດາໂຮງຮຽນ, ສະຖາບັນການສຶກສາອ້ອມຂ້າງ ເຂົ້າຮ່ວມຈຳນວນ 300 ກວ່າສະຫາຍ. ເຊິ່ງພິທີດັ່ງກ່າວໄດ້ຈັດຂຶ້ນທີ່ສະໂມສອນໃຫຍ່ຂອງແຂວງບໍລິຄຳໄຊ.

ໂດຍ: ສ.ສັນທະນາ