ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ໃຫ້ສໍາພາດຕໍ່ສື່ມວນຊົນກ່ຽວກັບຄວາມຊົງຈຳທີ່ມີຕໍ່ສະຫາຍຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມວ່າ: ສະຫາຍຫງວຽນຟູຈ້ອງ ເປັນຄົນທີ່ມີຄວາມຮູ້ເລິກເຊີ່ງທາງດ້ານທິດສະດີ ແລະ ບົດຮຽນອັນໃຫ່ຍຫລວງທາງດ້ານພຶດຕິກຳໃນການພັດທະນາເສດຖະກິດ-ສັງຄົມຂອງຫວຽດນາມ, ສະຫາຍໄດ້ສຶກສາຢ່າງເລິກເຊີ່ງ ລັດທິມາກເລນິນ, ເສັ້ນທາງກ້າວຂື້ນສູ່ສັງຄົມນິຍົມ ແລະສໍາຄັນທີ່ສຸດ ສະຫາຍຫງວຽນຟູຈ້ອງໄດ້ນໍາເອົາແນວຄິດໂຮ່ຈິມິງມາຈັດຕັ້ງນໍາພາສ້າງສາປະເທດຊາດຫວຽດນາມນັບມື້ນັບກ້າວຂື້ນຢ່າງບໍ່ຢຸດຢັ້ງ. ປະຈຸບັນນີ້ຫວຽດນາມເປັນໜື່ງໃນປະເທດທີ່ໄດ້ຮັບການຍອມຮັບຈາກທົ່ວໂລກວ່າໄດ້ຮັບການພັດທະນາຢ່າງໝັ້ນທ່ຽງ, ມີບາດກ້າວເດີນທີ່ຈະແຈ້ງ, ຊັດເຈນ ການພັດທະນາເສດຖະກິດ-ສັງຄົມຂອງຫວຽດນາມໃນປັດຈຸບັນ ແມ່ນດຳເນີນໄປພາຍໃຕ້ການຊີ້ນໍາໆພາອັນປີຊາສາມາດຂອງສະຫາຍຫງວຽນຟູຈ້ອງ, ຄວາມສະຫລາດສ່ອງໃສຂອງພັກກອມມູນິດຫວຽດນາມ ທີ່ສ້າງຕັ້ງນໍາພາໂດຍປະທານໂຮ່ຈິມິງ ຫລືລຸງໂຮ່ຂອງພວກເຮົາ ຊື່ງແມ່ນສະຫາຍຫງວຽນຟູຈ້ອງເປັນຜູ້ນໍາມາຈັດຕັ້ງຜັນຂະຫຍາຍໃຫ້ເກີດດອກອອກຜົນທີ່ແທ້ຈິງ. ປະເທດຊາດຫວຽດນາມໄດ້ຮັບການພັດທະນາ, ປະຊາຊົນໄດ້ຮັບການເບີ່ງແຍງດູແລ ແກ້ໄຂຊີວິດການເປັນຢູ່ ທັງໝົດເຫລົ່ານີ້ແມ່ນຍ້ອນການນໍາພາຢ່າງເດັດດ່ຽວ, ກ້າຫານ, ຖືກຕ້ອງ, ຊັດເຈນຂອງແນວ ທາງທີ່ສະຫາຍຫງວຽນຟູຈ້ອງໄດ້ວາງອອກ ແລະ ນໍາພາໃນການຈັດຕັ້ງປະຕິບັດ ຊື່ງເປັນການປະກອບ ສ່ວນສໍາຄັນໃຫ້ແກ່ພັກ ລັດ ແລະປະຊາຊົນຫວຽດນາມ ກາຍເປັນຂອງຂວັນອັນຍີ່ງໃຫ່ຍທີ່ສະຫາຍ ຫງວຽນ ຟູຈ້ອງໄດ້ປະໄວ້ໃຫ້ກັບຄົນຫວຽດນາມ.
ການຈາກໄປຂອງ ສະຫາຍ ຫງວຽນຟູຈ້ອງ ເປັນການສູນເສຍຜູ້ນໍາປະຕິວັດ ທີ່ອົງອາດກ້າແກ່ນຂອງພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ເຊິ່ງໃນຕະຫຼອດຊີວິດແຫ່ງການເຄື່ອນໄຫວປະຕິວັດສະຫາຍ ໄດ້ອຸທິດຊີວິດ, ເຫື່ອແຮງ ແລະ ສະຕິປັນຍາເຂົ້າໃນວຽກງານ, ພາລະກິດປົດປ່ອຍຊາດ, ພາລະກິດທ້ອນ ໂຮມປະເທດຊາດເປັນເອກະພາບ ແລະພາລະກິດປ່ຽນແປງໃໝ່ຂອງພັກກອມມູນິດຫວຽດນາມ, ໂດຍສະເພາະ ແມ່ນວຽກງານປັບປຸງກໍ່ສ້າງພັກໃຫ້ເຂັ້ມແຂງ, ປອດໃສກໍ່ຄືວຽກງານການປ້ອງກັນ, ຕ້ານການສໍ້ລາດບັງຫຼວງ ແລະຕ້ານປະກົດການຫຍໍ້ທໍ້ຕ່າງໆ ອັນໄດ້ເຮັດໃຫ້ປະເທດຫວຽດນາມ ມີການພັດທະນາຢ່າງບໍ່ຢຸດຢັ້ງຖານະບົດບາດຂອງຫວຽດນາມກໍ່ໄດ້ຮັບການຍົກສູງຂື້ນຢ່າງຈະແຈ້ງໃນເວທີພາກພື້ນ ແລະ ສາກົນ.
ໂດຍ: ຈັນທະສອນ
