ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ເນັ້ນໜັກຫລາຍບັນຫາສໍາຄັນໃນໂອກາດໂອ້ລົມຕໍ່ຄະນະລັດຖະບານ ໃນປະຊຸມລັດຖະບານເປີດກ້ວາງຄັ້ງທີ I ປີ 2024 ໄຂຂື້ນຢ່າງເປັນທາງການໃນວັນທີ 15 ກໍລະກົດນີ້ ເພື່ອແກ້ບັນຫາທີ່ຫຍຸ້ງຍາກ ແລະ ເຮັດໃຫ້ຄວາມທ້າທາຍທີ່ມີຢູ່ໃນປັດຈຸບັນສາມາດຂ້າມຜ່ານໄປໄດ້.
ທ່ານ ທອງລຸນ ສີສຸລິດ ຊີ້ໃຫ້ເຫັນວ່າ: ກອງປະຊຸມລັດຖະບານເປີດກວ້າງຄັ້ງນີ້ ໄຂຂຶ້ນທ່າມກາງສະພາບແວດລ້ອມສາກົນ ມີການຜັນແປໄປຢ່າງສັບສົນ, ເຕັມໄປດ້ວຍສິ່ງທ້າທາຍທົດສອບຕໍ່ສະ ຖຽນລະພາບແລະຄວາມໝັ້ນຄົງດ້ານການເມືອງ, ເສດຖະກິດ- ການເງິນ ຂອງໂລກ; ຢູ່ພາຍໃນປະເທດ, ກຳລັງປະສົບກັບຄວາມ ຫຍຸ້ງຍາກດ້ານເສດຖະກິດ-ການເງິນ, ປັດຈຸບັນນີ້ ໄດ້ກາຍເປັນຄວາມຫຼໍ່ແຫຼມທີ່ພວມກະທົບຕໍ່ການນໍາພາ ຂອງພັກ ແລະ ລັດເຮົາ ໂດຍສະເພາະການຄຸ້ມຄອງ-ບໍລິຫານ ຂອງລັດຖະ ບານ ແລະອົງການປົກຄອງທ້ອງຖິ່ນ ທີ່ສະແດງອອກໃນສະພາບ ການປັ່ນປ່ວນຂອງອັດຕາແລກປ່ຽນເງິນຕາ, ເງິນກີບອ່ອນຄ່າ, ເງິນເຟີ້ ເຮັດໃຫ້ລາຄາສິນຄ້າ ແລະ ຄ່າຄອງຊີບຖີບຕົວສູງຂຶ້ນຢ່າງບໍ່ເຄີຍມີມາກ່ອນ. ສະນັ້ນ,ກອງປະຊຸມຄັ້ງນີ້ ຈີ່ງເລັ່ງທວງໃຫ້ຄະນະລັດ ຖະບານ ຕ້ອງໄດ້ປຶກສາຫາລື, ຄົ້ນຄວ້າຊອກຫາທາງອອກ, ວາງມາດຕະການ-ວິທີການແກ້ໄຂບັນຫາ ໃຫ້ຖືກຕ້ອງ, ສອດຄ່ອງ ແລະມອບໝາຍໃຫ້ຂະແໜງການ ແລະທ້ອງຖິ່ນ ຈັດຕັ້ງປະຕິບັດດ້ວຍຄວາມເຄັ່ງຮ້ອນ, ດ້ວຍຄວາມຮັບຜິດຊອບສູງ ແລະ ດ້ວຍຈິດໃຈບຸກບືນສູ້ຊົນ, ເຮັດແທ້ທໍາຈິງອີ່ຫຼີ ຈຶ່ງຈະແກ້ບັນຫາຫຍຸ້ງ ຍາກ ແລະ ເຮັດໃຫ້ຄວາມທ້າທາຍ ທີ່ມີຢູ່ໃນປັດຈຸບັນສາມາດຂ້າມຜ່ານໄປໄດ້.
ໂອກາດນີ້ສະຫາຍເລຂາທິການໃຫຍ່, ປະທານປະເທດ ໄດ້ຕາງ ໜ້າໃຫ້ສູນກາງພັກສະແດງຄວາມຍ້ອງຍໍຊົມ ເຊີຍ ແລະຕີລາຄາສູງຕໍ່ຄວາມພະຍາຍາມຂອງລັດຖະບານ ກໍ່ຄືຄະນະພັກ, ບັນດາອົງການໃນລະບົບການ ເມືອງແຕ່ສູນກາງລົງຮອດທ້ອງຖິ່ນ- ຮາກຖານ ແລະປະຊາຊົນລາວທັງປະເທດ, ບັນດາພາກສ່ວນເສດຖະກິດຕ່າງໆ ທີ່ມີຄວາມພະຍາຍາມ, ບຸກບືນສູ້ຊົນ, ສະໜັບ ສະໜູນຊ່ວຍເຫຼືອລັດຖະບານຜ່ານຜ່າຄວາມຫຍຸ້ງຍາກ ແລະສາມາດຍາດໄດ້ຜົນສໍາເລັດທີ່ເປັນພື້ນຖານຫຼາຍດ້ານ, ເຮັດໃຫ້ຄາດໝາຍດ້ານເສດຖະກິດ-ສັງ ຄົມ ປະຈໍາປີ 2024 ໂດຍສະເພາະໃນ 6 ເດືອນຕົ້ນປີ ຫຼາຍດ້ານສາມາດບັນລຸໄດ້ຕາມແຜນ, ບໍ່ວ່າຈະເປັນດ້ານການຜະ ລິດ, ການປຸງແຕ່ງ, ການບໍລິການ ມີທ່າອ່ຽງຂະຫຍາຍຕົວທີ່ຕໍ່ເນື່ອງ; ການຈັດເກັບລາຍຮັບເພີ່ມ ຂຶ້ນ; ການແກ້ໄຂໜີ້ສິນ ເຖິງວ່າມີຄວາມຫຍຸ້ງຍາກ ແຕ່ກໍ່ໄດ້ຈັດ ສັນງົບປະມານ, ການລະດົມຈາກພາຍໃນ ເພື່ອບໍ່ໃຫ້ຜິດນັດ ຊໍາລະໜີ້; ດໍາເນີນນະໂຍບາຍເງິນຕາ ເພື່ອກະຕຸ້ນເສດຖະກິດ ແລະ ພະຍາຍາມຄຸມອັດຕາແລກປ່ຽນ, ລາຍຮັບເງິນຕາຈາກການສົ່ງ ອອກຜ່ານລະບົບທະນາຄານມີທ່າອ່ຽງດີຂຶ້ນ; ການເຕີບໂຕຂອງເສດຖະກິດ (GDP) ບັນລຸໄດ້ 4,7% ແລະ ອື່ນໆ. ທັງໝົດນັ້ນຖືເປັນສັນຍານທີ່ດີ ແລະເປັນພື້ນຖານຂັບເຄື່ອນໃຫ້ແກ່ການສືບຕໍ່ຍູ້ແຮງການ ຈັດຕັ້ງປະຕິບັດແຜນວຽກຈຸດສຸມຂອງລັດຖະບານ ໃນ 6 ເດືອນທ້າຍປີ 2024 ກໍ່ຄືວາລະແຫ່ງຊາດການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນແລະການແກ້ໄຂບັນຫາຢາເສບຕິດ ເຖິງວ່າຍັງບໍ່ສາມາດແກ້ໝົດ ແຕ່ກໍ່ມີຄວາມພະຍາ ຍາມສູງ, ມີການເຂົ້າຮ່ວມຂອງສັງຄົມດີຂຶ້ນກວ່າເກົ່າ.
ຜົນສໍາເລັດທີ່ຍາດມາໄດ້ນັ້ນ ເຖິງວ່າ ມີທ່ວງທ່າທີ່ດີ ແລະເປັນພື້ນຖານສໍາຄັນໃຫ້ແກ່ການສືບຕໍ່ແກ້ໄຂບັນຫາກໍ່ຕາມ, ແຕ່ກໍ່ຍັງບໍ່ທັນສາມາດຕອບ ບັນຫາທີ່ເຄັ່ງຮ້ອນ ທີ່ແທ້ຈິງຢູ່ໃນປັດຈຸ ບັນນີ້ໄດ້ເທື່ອ ໂດຍເນັ້ນໜັກ 6 ບັນຫາສໍາຄັນຕໍ່ຄະນະລັດຖະບານ ເພື່ອແກ້ບັນ ຫາທີ່ຫຍຸ້ງຍາກ ແລະ ເຮັດໃຫ້ຄວາມທ້າທາຍທີ່ມີຢູ່ໃນປັດຈຸບັນສາມາດຂ້າມຜ່ານໄປໄດ້ຄື: ບັນຫາເຄັ່ງຮ້ອນທີ່ສຸດແມ່ນຄຸ້ມຄອງອັດຕາແລກປ່ຽນເງິນຕາຕ່າງປະເທດ, ສະພາບເງິນເຟີ້ກອງປະຊຸມນີ້ ຕ້ອງວາງມາດຕະການອອກ ເພື່ອແກ້ໄຂບັນຫາຕ່າງໆ ແຍກອອກເປັນຄວາມຮັບຜິດຊອບຂອງໃຜ, ພາກ ສ່ວນໃດ, ອົງກອນໃດແທ້, ອັນໃດເປັນຄວາມຮັບຜິດຊອບຂອງລັດຖະບານ ຫຼືອັນໃດ ເປັນພາລະຂອງອົງການມະຫາພາກ, ອັນໃດເປັນຂອງຈຸລະພາກ, ອັນໃດເປັນພາລະ-ພັນທະຂອງສັງຄົມຕ້ອງຊີ້ອອກໃຫ້ເຫັນຢ່າງແຈ້ງ, ລາຄາສິນຄ້າແພງຂຶ້ນ, ຄຸມບໍ່ຢູ່, ມາຈາກຈັກສາເຫດໃດ ແພງຍ້ອນຂາດເຂີນ ຫຼືແພງຍ້ອນການຜະລິດພາຍໃນບໍ່ຂະຫຍາຍຕົວ, ແພງຍ້ອນອັດຕາແລກ ປ່ຽນ, ແພງຍ້ອນບໍ່ຮູ້ຄຸ້ມຄອງ ຫຼືແພງຍ້ອນການແກ້ງແຍ້ງແຂ່ງຂັນ ທີ່ບໍ່ເປັນທຳ ຫຼືຍ້ອນມີການທຸ້ມຕະຫຼາດ ຫຼື ເກີດຈາກບັນຫາຈິດຕະ ສາດຂອງສັງຄົມ ຫຼືມີປັດໄຈອື່ນໃດແດ່ທີ່ເຊື່ອງຊ້ອນ ຖ້າຂະແໜງການບໍ່ຮູ້, ທ້ອງຖິ່ນບໍ່ຮູ້ ຈົນເຖິງຂັ້ນລັດຖະບານກໍ່ບໍ່ທັນຫາທາງອອກທີ່ຖືກຕ້ອງສອດຄ່ອງ ກໍ່ຈະບໍ່ຮູ້ຈັກວ່າຈະແບ່ງງານ ແລະມອບໝາຍຄວາມຮັບຜິດຊອບໃຫ້ໃຜແກ້ອັນໃດ ສະພາບເປັນແບບນີ້ ມີແຕ່ຈະບົ່ມຊ້ອນບັນຫາ ແລະ ເຮັດໃຫ້ບັນຫາກອງຂຶ້ນ, ການສ້າງເງື່ອນໄຂໃຫ້ມີການຜະລິດພາຍໃນ, ສົ່ງເສີມການ ລົງທຶນຕ່າງປະເທດເພື່ອດຶງດູດໃຫ້ເຂົານຳທຶນເຂົ້າມາສູ່ໂຄງສ້າງການຜະລິດຂອງປະເທດໃຫ້ຫຼາຍ ເພື່ອສ້າງວຽກເຮັດງານທຳໃຫ້ປະຊາຊົນພາຍໃນ,ເພື່ອໃຫ້ມີຜະ ລິດຕະພັນພາຍໃນເພີ່ມຂຶ້ນ,ຫຼຸດຜ່ອນການນໍາເຂົ້າ, ຫຼຸດຜ່ອນການໃຊ້ເງິນຕາ, ປະຢັດເງິນຕາເພື່ອເພີ່ມຄັງສຳຮອງເງິນຕາ ແລະ ທຶນສະສົມແຫ່ງລັດ, ການແກ້ໄຂໜີ້ສິນສາທາລະນະ, ໜີ້ສິນຕ່າງປະເທດກໍ່ເຫັນວ່າຍັງເປັນບັນ ຫາໃຫຍ່ຫຼວງເຖິງວ່າມີຄວາມພະຍາຍາມຢຸດຕິການສ້າງໜີ້ເພີ່ມດ້ວຍຫຼາຍມາດຕະການ ແລະ ຮູບການແຕ່ກໍ່ຍັງເຕັມໄປດ້ວຍຄວາມທ້າທາຍ, ຖ້າຈັງຫວະເປັນຢູ່ປັດຈຸບັນນີ້ຍັງສືບຕໍ່ໄປ, ປະເທດເຮົາຈະຫຼີກຈາກການຜິດນັດຊຳລະໜີ້ໄດ້ຍາກ.
ເລຂາທິການໃຫຍ່, ປະທານປະເທດ ຍັງໄດ້ຊີ້ໃຫ້ເຫັນຜົນຕາມມາ ຂອງການແກ້ໄຂບັນຫາເສດຖະກິດ ບໍ່ທັນໄດ້ ເຊິ່ງເຮັດໃຫ້ເກີດມີສະພາບການຕ່າງໆທີ່ໜ້າເປັນຫ່ວງ ເປັນຕົ້ນພະນັກງານປະລະວຽກງານ, ແຮງງານມີສີມືແມ້ກະທັ້ງແຮງງານດິບກໍ່ໄຫຼອອກຈາກປະເທດໄປຫາເງິນລ້ຽງຊີບ; ທຸລະກິດພາຍໃນບໍ່ເດີນ; ນັກລົງທຶນຕ່າງປະເທດຖອນໜີຫຼືບໍ່ກໍ່ບໍ່ດຳເນີນທຸລະກິດໄດ້ຕໍ່, ລັດບໍ່ມີຖານລາຍຮັບ ຫຼື ມີກໍ່ຫຼຸດໜ້ອຍຖອຍລົງ; ຕ່າງປະເທດບໍ່ມາລົງທຶນ; ພາບພົດຂອງປະເທດຖືກກະທົບ; ປະຊາຊົນພາຍໃນ ແລະປະເທດຄູ່ຮ່ວມພັດທະນາຂາດຄວາມເຊື່ອໝັ້ນສັດທາ; ໄພວ່າງ ງານເພີ່ມຂຶ້ນ, ເຍົາວະຊົນ, ຊາວໜຸ່ມ ປະລະການຮຽນຫຼາຍຂຶ້ນ; ບັນຫາປະກົດການຫຍໍ້ທໍ້ຕ່າງໆໃນສັງຄົມ ແລະອື່ນໆ ຕໍ່ໜ້າສະພາບການດັ່ງກ່າວ, ທຸກພາກສ່ວນຕ້ອງມີຄວາມຮັບຜິດຊອບຮ່ວມກັນ ເພື່ອແກ້ໄຂບັນດາບັນຫາທີ່ຕັ້ງຂຶ້ນໃຫ້ໄວ, ໃຫ້ມີປະສິດ ທິພາບ, ຕ້ອງຫັນປ່ຽນສະພາບວິກິດໃຫ້ເປັນໂອ ກາດໃຫ້ແກ່ການຫັນໄປສູ່ອັນໃໝ່, ສູ່ຈຸດໃໝ່ໃນການຫັນປ່ຽນດ້ວຍການບໍລິຫານຈັດການຢ່າງຖືກເປົ້າໝາຍ ທີ່ຈະນຳໄປສູ່ການແກ້ໄຂບັນຫາໃຫ້ຕົກໄປໄວເທົ່າທີ່ຈະໄວໄດ້.
ປະທານປະເທດ ຍັງສະເໜີໃຫ້ລັດຖະບານ ຕ້ອງໄດ້ສຸມໃສ່ແກ້ໄຂບັນຫາໃຫ້ໄດ້ຕາມຄາດໝາຍ ທີ່ຈຳເປັນຮີບດ່ວນ ຄື: ເອົາຄ່າເງິນກີບທີ່ອ່ອນລົງໃຫ້ຢຸດພາຍໃນ 1 ເດືອນ, ຈາກນັ້ນໃຫ້ຄ່ອຍໆແຂງຂຶ້ນເປັນກ້າວໆ, ເອົາອັດຕາເງິນເຟີ້ໃຫ້ຫລຸດລົງເປັນກ້າວໆດ້ວຍທຸກວິຖີທາງ, ຄຸ້ມຄອງລາຄາສິນຄ້າໃຫ້ຮັດກຸມ,ສົມເຫດ ສົມຜົນ; ພວກເຮົາປະຕິບັດການຄ້າເສລີເປີດກວ້າງ, ແຕ່ມີການຄຸ້ມຄອງ-ດັດສົມຂອງລັດ, ນີ້ຄືເສດຖະກິດຕະຫຼາດ ຕາມທິດສັງຄົມນິຍົມ; ແກ້ໄຂຄ່າຄອງຊີບຂອງພະນັກງານ,ລັດຖະກອນ, ທະຫານ,ຕຳຫຼວດ, ຄູ, ແພດໝໍໃຫ້ຢູ່ໃນລະດັບສາມາດປະຄັບປະຄອງໄປໄດ້ ສ້າງທຸກເງື່ອນໄຂທຸກຢ່າງເທົ່າທີ່ຈະເຮັດໄດ້ ເພື່ອແກ້ໄຂບັນຫານີ້, ໃຫ້ຖືວຽກນີ້ ເປັນບຸລິມະສິດລະດັບຕົ້ນໆ; ເພີ່ມຄັງສຳຮອງເງິນຕາຕ່າງປະເທດຂຶ້ນຕື່ມໃຫ້ໄດ້ລະດັບຄາດໝາຍຫຼືລື່ນນັ້ນດ້ວຍມາດຕະການນໍາເຂົ້າ-ສົ່ງອອກສິນຄ້າຜ່ານລະບົບທະນາຄານ; ຕັ້ງໜ້າຫຼຸດຜ່ອນການໃຊ້ເງິນຕາໃຫ້ຫຼຸດລົງດ້ວຍວິທີຈຳກັດການນໍາເຂົ້າສິນຄ້າທີ່ບໍ່ຈຳເປັນໃຫ້ເປັນຮູບປະທຳ, ໃຫ້ຮີບ ຮ້ອນສ້າງຕັ້ງທະນາຄານຄຳຂຶ້ນໂດຍໄວ ແລະ ເອົາຄຳເປັນຄັງສະສົມແຫ່ງລັດໃຫ້ໄດ້, ຖືເປັນບາດກ້າວສຳຄັນ ຂອງການຄໍ້າປະກັນສະຖຽນລະພາບຂອງເສດຖະກິດແຫ່ງຊາດ; ແຕ່ຕ້ອງຄຸ້ມຄອງໃຫ້ຮັດກຸມ, ຫຼຸດຜ່ອນການໃຊ້ເງິນຕາລົງ ແມ່ນໝາກຫົວໃຈ ຂອງການປະຢັດ, ແມ່ນການສະກັດກັ້ນການເພີ່ມຂຶ້ນ ຂອງການ ແລກປ່ຽນນອກລະບົບ; ຕັດສິນໃຈສູງໃນການປະຕິບັດມາດຕະການປະຢັດມັດທະຍັດ, ວາງມາດຕະການປະຢັດນີ້ກໍ່ເວົ້າລວມໆບໍ່ໄດ້, ຕ້ອງມີຈຸດສຸມ, ມີຄວາມລະອຽດ ຮອບດ້ານເປັນຕົ້ນແມ່ນປະຢັດຕົ້ນທຶນ, ປະຢັດພະລັງງານ, ປະຢັດການໃຊ້ຈ່າຍບໍລິຫານ ປະຕິບັດນະໂຍບາຍການປະຢັດນີ້ ຕ້ອງສ້າງເປັນແຜນ, ສ້າງຂະບວນການປະຕິບັດໃຫ້ໄປພ້ອມໆກັນໃນທົ່ວສັງຄົມ; ແກ້ໄຂດ່ວນ, ແກ້ຂາດຕົວບັນດາກົນໄກອືດອາດ, ຊັກຊ້າ, ບໍ່ໂປ່ງໃສແລະມີເງື່ອນງໍາຂອງການສໍ້ລາດບັງຫຼວງ, ກິນສິນບົນ, ໃຫ້ສິນບົນແລະກວດກາຄົນສວຍໃຊ້ໂອກາດໃນເວລາທີ່ມີສະພາບຫຍຸ້ງຍາກ ເຊັ່ນ: ການລັກລອບຂາຍໂຄງການ, ລັກລອບເອົາຊັບພະຍາກອນເອົາຂອງສ່ວນລວມໄປເປັນຂອງສ່ວນຕົວ ຢ່າງເດັດດ່ຽວ, ເດັດຂາດ. ສືບຕໍ່ເກັບກູ້ໜີ້ສິນ, ທວງໜີ້ສິນ ມາໃຫ້ລັດ, ຮີບຮ້ອນປະມູນຂາຍຊັບສິນທີ່ຢືດໄດ້ຈາກຜູ້ກະທຳຜິດກົດໝາຍ, ຮີບຮ້ອນເກັບກູ້ວັດຖຸ-ເງິນຄຳ-ຊັບສົມບັດ ຈາກຜູ້ທີ່ລັກໂລບເອົາໄປໃນກໍລະນີຕ່າງໆ ທີ່ສານຕັດສິນແລ້ວ.
ໂອກາດນີ້ ທ່ານ ທອງລຸນ ສີສຸລິດ ຍັງໄດ້ສະເໜີບາງບັນຫາ ທີ່ເປັນຂໍ້ຄິດ ແລະທິດຊີ້ນໍາ ເພື່ອໃຫ້ກອງປະຊຸມລັດຖະບານຄັ້ງນີ້ ຄົ້ນຄວ້າ, ພິຈາລະນາຕົກລົງ ເພື່ອພ້ອມກັນຈັດຕັ້ງປະຕິບັດໃຫ້ໄດ້ຮັບຜົນດີ ໂດຍຖືໃຫ້ເອົາມະຕິຂອງກົມການເມືອງສູນກາງພັກ ສະບັບເລກທີ 04 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ຫລື ສອຈ ໃນໄລຍະໃໝ່ ເປັນບ່ອນອີງ ເພື່ອໄຈ້ອອກມາເປັນອາວຸດ, ເປັນເຂັມທິດ ເພື່ອແກ້ບັນຫາເສດຖະກິດ ແລະນຳໄປສູ່ການຈັດຕັ້ງປະຕິບັດໃຫ້ເປັນຈິງ.
ໃນກອງປະຊຸມລັດຖະບານເປີດກ້ວາງ ຄັ້ງທີ I ປີ 2024 ທ່ານ ທອງລຸນ ສີສຸລິດ ຍັງໄດ້ຮຽກຮ້ອງໃຫ້ທົ່ວພັກ, ລັດ, ກໍາລັງປະກອບອາວຸດ ແລະ ປວງຊົນລາວທັງຊາດ ເອົາໃຈໃສ່ແກ້ໄຂຄວາມຫຍຸ້ງຍາກເສດຖະກິດ-ການເງິນ ທີ່ພວມປະເຊີນຢູ່ໃຫ້ມີການຫັນປ່ຽນ ຕາມແນວທາງທີ່ດີຂຶ້ນ, ປະຕິບັດຄໍາຂວັນປະຈໍາໃຈທີ່ວ່າ ພວກເຮົາ ສາມາດເຮັດໄດ້, ສາມາດເຮັດເອງໄດ້, ສິ່ງສໍາຄັນ ແມ່ນເພີ່ມທະວີຄວາມສາມັກຄີ ເປັນຈິດໜຶ່ງໃຈດຽວ, ຖືເອົາເສດຖະກິດ ເອກະລາດ ເປັນເຈົ້າຕົນເອງ ເປັນແນວທາງ, ເປັນອາວຸດ. ກົມການເມືອງສູນກາງພັກຊີ້ນໍາ; ລັດຖະບານ, ບໍລິຫານ -ຈັດການ, ສະພາແຫ່ງຊາດ-ສະພາປະຊາຊົນທ້ອງຖິ່ນຕິດຕາມ, ກວດກາໃຫ້ຄໍາເຫັນ; ບັນ ດາອົງການຈັດຕັ້ງການເມືອງ, ມະຫາຊົນ ປຸກລະດົມ, ຈັດຕັ້ງເປັນແບບຢ່າງ; ນັກທຸລະກິດ, ຜູ້ປະກອບການ, ປະຊາຊົນ ເປັນຜູ້ເຂົ້າຮ່ວມ ແລະ ຈັດຕັ້ງປະຕິບັດຢ່າງເປັນຂະບວນ, ຢ່າງມີສະຕິ ຈຶ່ງຈະແກ້ໄຂໄດ້, ຜ່ານຜ່າໄດ້, ແລະ ກ້າວເດີນໄປໜ້າຕໍ່ໄປ.
