ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເລັ່ງແກ້ໄຂ ການນຳໃຊ້ພາສາລາວ ຍັງບໍ່ລັກສະນະ ເອກະພາບທົ່ວສັງຄົມ

ທ່ານ ຈະ​ເລີ​ນ ​ເຢຍປາວ​ເຮີ ລັດຖະມົນຕີ ​ປະຈຳ​ສຳນັກງານ ​ນາຍົກລັດຖະມົນຕີ ​ໂຄສົກ​ລັດຖະບານ ​ໄດ້​ຈັດ​ກອງ​ປະຊຸມ​ ພົບ​ປະ​ກັບ​ ບັນດາ​ຕົວ​ແທນ​ຈາກ​ສື່​ມວນ​ຊົນ ທຸກຂະ​ແໜງການ ​ເພື່ອ​ປຶກສາ​ຫາລື ​ແລະ ​ແລກປ່ຽນບົດຮຽນ ​​ໃນ 2 ຫົວ​ຂໍ້​​ໃຫຍ່​ຄື: ຄວາມ​ຮູ້​ບາງ​ປະການ ​ແລະ ຂໍ້ຄວາມ​ທີ່​ຄວນ​ເອົາ​ໃຈ​ໃສ່​ ໃນ​ການ​ນຳ​ໃຊ້​ພາສາ​ລາວ ​ໃຫ້​ຖືກຕ້ອງໃນສື່​ສິ່ງ​ພິມ ​ແລະ ກຳ​ແໜ້ນ​ໂຄງ​ປະກອບ​ ລະບົບ​ການ​ເມືອງ ປະຊາທິປະ​ໄຕ ຢູ່​ພາຍ​ໃນ​ປະ​ເທດ ​ເພື່ອ​ໂຄສະນາ​ເຜີຍ​ແຜ່​ ໃຫ້​ຖືກຕ້ອງ ​ແລະ ມີ​ວິທະຍາສາດ.

 

ທ່ານ ​ໂຄສົກ​ລັດຖະບານ ກ່າວ​ວ່າ: ການ​ພົບ​ປະ​ກັບ ​ສື່​ມວນ​ຊົນ​ຄັ້ງ​ນີ້ ​ແນ​ໃສ່​​ເຮັດ​ໃຫ້ ການ​ນຳ​ໃຊ້​ພາສາ​ລາວ ​ເປັນ​ຕົ້ນ​ແມ່ນ ​ພາສາ​ຂຽນ​ ໃຫ້​ຖືກ​​ໄວ​ຍະ​ກອນ, ການ​ໃຊ້​ຄຳ​ໃຫ້​ຖືກຕ້ອງ​ຊັດ​ເຈນ, ມີ​ການ​ຮຽບຮຽງ​ຖ້ອຍ​ຄຳ, ສຳນວນ ​ແລະ ປະ​ໂຫຍ​ກ​ເປັນ​ຢ່າງ​ດີ ທັງ​ນີ້ ​ແມ່ນ​ການ​ເປັນ​ຫ່ວງ​ເປັນ​ໄຍ ​ແລະ ການ​ເອົາ​ໃຈ​ໃສ່ ຂອງ​ລັດຖະບານ​ ຕໍ່ການ​ນຳ​ໃຊ້​ພາສາ​ລາວ​ ຂອງ​ສື່​ມວນ​ຊົນ ​ໃນ​ນັ້ນ ດ້ານ​ທີ່​ດີ​ກໍ​ຈະ​ໄດ້​ສືບຕໍ່ຮັກສາ ​ແລະ ສົ່ງ​ເສີມ ​ສ່ວນ​ສິ່ງ​ທີ່​ຍັງ​ເຮັດບໍ່ທັນ​ໄດ້​ດີ ກໍ​ຈະ​ມີ​ການ​ປັບປຸງ​ແກ້​ໄຂ ​ແລະ ພັດທະນາ ການ​ນຳ​ໃຊ້​ພາສາ​ລາວ ​ໃຫ້​ໄປ​ໃນ​ທິດ​ທາງ​ ທີ່​ເປັນ​ເອກະ​ພາບ​ກັນ.

 

ໃນ​ໄລຍະ​ຜ່ານ​ມາ ພາສາ​ລາວ ​ແລະ ການ​ນຳ​ໃຊ້​ພາສາ​ລາວ ​ໄດ້​ຮັບ​ການ​ພັດທະນາ​ ​ແລະ ມີການຂະຫຍາຍຕົວ​ຢ່າງ​ຕໍ່​ເນື່ອງ​ ​ເຊິ່ງ​ມີ​ລັກສະນະ​ຊາດ, ວິທະຍາສາດ ​ແລະ ລັກສະນະ​ມະຫາຊົນ ດ້ວຍ​ຄວາມ​ຖືກຕ້ອງ​ຂອງ​ພັກ ​ເຊິ່ງການ​ນຳ​ໃຊ້​ຕົວ​ຈິງ​ ເຮັດ​ໃຫ້ພາສາ​ລາວ ​ໄດ້​ຮັບ​ການ​ຄົ້ນຄວ້າ ​​ເລິກ​ເຊິ່ງຍິ່ງໆ​ຂຶ້ນ. ສະ​ນັ້ນ ສະພາບການ​ນຳ​ໃຊ້​ ພາສາ​ລາວ​ໃນ​ປັດຈຸບັນ ຍັງ​ບໍ່ທັນ​ໄດ້​ດີ​ເທົ່າ​ທີ່​ຄວນ ​​ແລະ ​ຍັງບໍ່​ເປັນ​ເອກະ​ພາບ​​ ໂດຍ​ສະ​ເພາະ ການ​ຂຽນຜິດ ​ແລະ ການ​ນຳ​ເອົາ​ຄຳ ​ຈາກ​ພາສາ​ອື່ນທີ່​ໃກ້​ຄຽງ ມາ​ນຳ​ໃຊ້​ປົນ​ເປ​ກັບ​ພາສາ​ລາວ ຢ່າງ​ບໍ່​ເໝາະສົມ ຕົວຢ່າງ ​ໄດ້​ພົບເຫັນ​ຢູ່​ຕາມ​ປ້າຍ, ​ໃນສື່ສິ່ງ​ພິມ, ​ໃນ​ຖ້ອຍ​ຄຳ​ຂອງ​ພິທີ​ກອນ-​ນັກ​ຈັດ​ລາຍການ ​ແລະ ອື່ນໆ ​ເຊິ່ງຕ້ອງ​ໄດ້​ຮີບ​ຮ້ອນ​ແກ້​ໄຂ ​ເນື່ອງ​ຈາກ​ໄດ້​ສົ່ງ​ຜົນ​ບໍ່ດີ ​ຕໍ່ພາສາ​ລາວ, ຄວາມ​ເປັນ​ເອກະລັກ ​ແລະ ຄວາມ​ເປັນ​ສື່​ກາງ ​ອັນ​ແທ້​ຈິງ​ຂອງ​ຊາດ.

 

​ໃນ​ລະຫວ່າງ​ ການ​ພົບ​ປະ​ຫາລື ຄັ້ງ​ນີ້, ບັນດາ​ຕົວ​ແທນ​ຈາກ​ສື່​ມວນ​ຊົນ ກໍ​ໄດ້​ສະ​ແດງ​ຄວາມ​ຄິດ​ເຫັນ ທີ່​ຫລາກ​ຫລາຍ ການ​ນຳ​ໃຊ້​ພາສາ​ລາວ ​ໃນ​ສື່​ຕ່າງໆ​ໃນ​ໄລຍະ​ຜ່ານ​ມາ ​ເຊິ່ງ​ໄດ້​ຊີ້​ໃຫ້​ເຫັນ​ຂໍ້​ຜິດພາດ ​ແລະ ຄວາມ​ບໍ່​ເອກະ​ພາບກັນ ​ເນື່ອງ​ຈາກວ່າ​ ຮອດ​ປັດຈຸບັນ ລາວ​ບໍ່ທັນ​ສ້າງວັດຈະນະ​ນຸກົມ ທີ່​ສົມບູນ​ແບບ, ລວມທັງ​ ການ​ນຳ​ໃຊ້​ ພາສາ​ຕ່າງປະ​ເທດ ທີ່ມີ​ທັງ (ຝຣັ່ງ ​ແລະ ອັງກິດ), ການ​ໃຊ້​ໄວ​ຍະ​ກອນ​ຫັນ​ລີ້ນ (ຣ) ​ແລະ ການ​ລະບຸ​ຕຳ​ແໜ່ງ ຂອງ​ການ​ນຳ ຍັງ​ມີ​ຄວາມ​ສັບສົນ ​ເຮັດ​ໃຫ້​ສື່​ມວນ​ຊົນ​ພົບ​ຄວາມ​ຫຍຸ້ງຍາກ ​ແລະ ຂາດ​ບ່ອນ​ອີງ ຈຶ່ງ​ໄດ້​ສົ່ງ​ຜົນ​ຕໍ່ການການ​ນຳ​ໃຊ້​ ພາສາ​ລາວສົມຄວນ. ສະ​ນັ້ນ, ສະ​ເໜີ​ໃຫ້​ໂຄສົກ​ລັດຖະບານ ຮີບ​ຮ້ອນ​ຄົ້ນຄວ້າ​ ພິຈາລະນາ ຕາມ​ຄວາມ​ເໝາະສົມ.

 

ຂ່າວ:ຂປລ