ຄະນະບໍລິຫານງານຊາວໜຸ່ມກະຊວງຖະແຫຼງຂ່າວ ວັດທະນະທໍາ ແລະ ທ່ອງ ທ່ຽວຮ່ວມກັບຄະນະບໍລິຫານງານຊາວ ໜຸ່ມນະຄອນຫຼວງວຽງຈັນເລີ່ມຈັດກິດຈະກໍາເຄື່ອນໄຫວທັດສະນະສຶກສາຢູ່ສະຖານທີ່ຕ່າງໆທາງປະຫວັດສາດ ພາຍ ໃນນະຄອນຫຼວງວຽງຈັນ ໃນວັນທີ 9 ທັນວານີ້ ໂດຍການນໍາພາຂອງທ່ານ ລິດທິສັກ ວໍລະລາດ ຮອງເລຂາຄະນະບໍລິຫານງານຊາວໜຸ່ມ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ພ້ອມດ້ວຍຜູ້ຕາງໜ້າຄະນະບໍລິຫານງານຊາວໜຸ່ມ ນະຄອນຫຼວງວຽງຈັນ ແລະ ຊາວ ໜຸ່ມ- ເຍົາວະຊົນທີ່ມາຈາກ 5 ເມືອງຂອງນະຄອນຫຼວງວຽງຈັນເຂົ້າຮ່ວມ.
ທ່ານ ລິດທິສັກ ວໍລະລາດ ຮອງເລຂາຄະນະບໍລິຫານງານຊາວໜຸ່ມ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວໃຫ້ສໍາພາດວ່າ: ຈຸດປະສົງຂອງການຈັດກິດຈະກໍາຄັ້ງນີ້ ເພື່ອສ້າງຂະ ບວນການສົ່ງເສີມຊາວ ໜຸ່ມ- ເຍົາວະຊົນ ສຶກສາຮຽນຮູ້ປະ ຫວັດສາດ ແລະ ຮໍ່າຮຽນເຮັດຕາມແນວຄິດຂອງປະທານໄກສອນ ພົມວິຫານຢູ່ສະຖານທີ່ທາງປະຫວັດສາດຂອງນະ ຄອນຫຼວງວຽງຈັນ ເປັນຕົ້ນ: ຫໍພິພິທະ ພັນແຫ່ງຊາດ, ຫໍສະໝຸດແຫ່ງຊາດ ແລະ ສະຖານທີ່ທ່ອງທ່ຽວທາງວັດທະນະທໍາວັດສີສະເກດ, ຫໍພະແກ້ວ ແລະ ປະຕູໄຊ ເພື່ອສຶກສາອົບຮົມການເມືອງແນວຄິດໃຫ້ຊາວໜຸ່ມ-ເຍົາວະຊົນ ມີຄວາມໜັກແໜ້ນ, ມີຄຸນສົມບັດ, ສິນທໍາປະຕິວັດ, ຮັກປະເທດຊາດ, ຮັກບ້ານເກີດເມືອງນອນ, ມີຄວາມເຊື່ອໝັ່້ນຕໍ່ແນວທາງນະໂຍບາຍພັກ-ລັດໃລໄຍໃໝ່.
ຮອງເລຂາຄະນະບໍລິຫານງານຊາວໜຸ່ມ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວຍັງໄດ້ຮຽກຮ້ອງໃຫ້ບັນດາຊາວໜຸ່ມ-ເຍົາວະຊົນທຸກຄົນໄດ້ຫັນມາສຶກສາຮຽນຮູ້ປະຫວັດສາດ, ການນໍາພາຂອງຜູ້ນໍາເຮົາແຕ່ລະຍຸກ, ແຕ່ລະສະໄໝ ແລະ ແນວຄິດຂອງປະທານໄກສອນ ພົມວິຫານ ຜູ້ນໍາແສນເຄົາລົບຮັກຂອງປວງຊົນລາວທັນຊາດ, ຕະຫລອດຮອດສະຖານທີ່ທ່ອງທ່ຽວທາງວັດທະນະທໍາ, ປະຫວັດສາດ, ຮີດຄອງປະເພນີ ເພື່ອນໍາໄປເຜີຍແພ່ໃຫ້ຊາວໂລກໄດ້ຮັບຮູ້ປະເທດລາວເຮົາຫລາຍຂຶ້ນ, ສໍາລັບການຈັດກິດຈະກໍາຄັ້ງນີ້, ຄະນະຊາວໜຸ່ມຈາກ 5 ເມືອງຂອງນະຄອນຫຼວງວຽງຈັນ ຄື: ເມືອງ ຈັນທະບູລີ, ໄຊທານີ, ສີສັດຕະນາກ, ໄຊເສດຖາ ແລະ ເມືອງສີໂຄດຕະບອງຈະໄດ້ສັບປ່ຽນກັນເຄື່ອນໄຫວເປັນເວລາ 3 ວັນ.
