ການທົດລອງການສຳຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ໄດ້ດຳເນີນຢູ່ 4 ແຂວງ ຄື: ນະຄອນຫລວງວຽງຈັນ, ແຂວງຫົວພັນ, ແຂວງບໍ່ແກ້ວ ແລະ ແຂວງ ເຊກອງ ເລີ່ມແຕ່ວັນທີ 27 ພຶດສະພາ ຫາ ວັນທີ 16 ມິຖຸນາ 2024 ໂດຍໄດ້ຮັບການສະໜັບສະໜູນຊ່ວຍເຫລືອດ້ານວິຊາການ ແລະ ງົບປະມານຈາກ ອົງການສະຫະປະຊາຊາດ ກອງທຶນສຳລັບປະຊາກອນ ຫລື UNFPA ແລະ ຄູ່ຮ່ວມພັດທະນາ ເປັນຕົ້ນ ລັດຖະບານອົດສະຕຣາລີ, ສະຫະລັດອາເມລິກາ ແລະ ສປ ຈີນ. ການທົດລອງໃນຄັ້ງນີ້, ບໍ່ພຽງແຕ່ເປັນການທົດລອງການເກັບກຳຂໍ້ມູນພາກສະໜາມເທົ່ານັ້ນ, ແຕ່ເປັນການທົດລອງການສຳຫລວດ ທີ່ຈັດຕັ້ງປະຕິບັດທຸກຂະບວນການ ແລະ ຂັ້ນຕອນຂອງການສຳຫລວດທັງໝົດ ຄືກັນກັບການສຳຫລວດໃຫຍ່ ເຊິ່ງການສຳຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ຈະຈັດຕັ້ງປະຕິບັດໃນເດືອນມີນາ ປີ 2025.
ທ່ານ ດຣ. ບາກທິຢໍ ຄາດິເຣິບ ຜູ້ຕາງໜ້າອົງການ UNFPA ໄດ້ກ່າວວ່າ: ການສໍາຫລວດພົນລະເມືອງ ແລະ ທີ່ຢູ່ອາໄສ ແມ່ນໜຶ່ງວຽກງານທີ່ໃຊ້ເວລາ, ຊັບຊ້ອນ ແລະ ໃຫຍ່ທີ່ສຸດໃນປະເທດ ເຊິ່ງຈະຕ້ອງໄດ້ຮັບການຈັດຕັ້ງປະຕິບັດ ໂດຍຜ່ານການຊ່ວຍເຫລືອທີ່ເປັນບຸລິມະສິດ. ການທົດລອງສຳຫລວດພົນລະເມືອງ ແມ່ນຈຸດພົ້ນເດັ່ນທີ່ສຳຄັນ ເນື່ອງຈາກຈະຊ່ວຍໃຫ້ສາມາດທົດສອບບັນດາອົງປະກອບຕ່າງໆຂອງການສຳຫລວດພົນລະເມືອງ ເປັນຕົ້ນ ແບບສອບຖາມ, ການກະກຽມບຸກຄະລາກອນເກັບກຳຂໍ້ມູນ, ແຜນການໂຄສະນາພ້ອມທັງສ້າງຄວາມເຂົ້າໃຈ ແລະ ການຮ່ວມມືຂອງພົນລະເມືອງ. ນັກເດີນສຳຫລວດ ຈະຖາມຄຳຖາມກັບຫົວໜ້າຄົວເຮືອນ ກ່ຽວກັບຜູ້ຢູ່ອາໄສປົກກະຕິ ແລະ ຄຸນລັກສະນະດ້ານພົນລະເມືອງ ແລະ ເສດຖະກິດ-ສັງຄົມຂອງພວກເຂົາ, ຈະມີຫລາຍຄໍາຖາມກ່ຽວກັບອາຍຸ, ສະຖານະພາບການແຕ່ງງານ, ສາສະໜາ, ພາສາ, ຄວາມຫຍຸ້ງຍາກດ້ານໜ້າທີ່ການ, ສະຖານທີ່ຢູ່ອາໄສຜ່ານມາ ແລະ ປັດຈຸບັນ, ການສຶກສາ, ການຈ້າງງານ, ຈໍານວນລູກທີ່ເກີດ ແລະ ການເສຍຊີວິດພາຍໃນຄົວເຮືອນ. ນັກເດີນສຳຫລວດ ຍັງຈະເກັບກຳຂໍ້ມູນກ່ຽວກັບສະພາບທີ່ຢູ່ອາໄສ, ສິ່ງຂອງເຄື່ອງໃຊ້ຕ່າງໆໃນຄົວເຮືອນ ແລະ ກິດຈະກຳທາງດ້ານກະສິກຳ; ທຸກຄົນທີ່ຢູ່ປະຈຳໃນຄົວເຮືອນປະກອບມີເດັກນ້ອຍ, ເດັກແດງ, ຜູ້ໃຫຍ່, ຜູ້ສູງອາຍຸ ແລະ ຜູ້ທີ່ມີຄວາມຫຍຸ້ງຍາກທາງດ້ານໜ້າທີ່ການງານ ແມ່ນຈະຕ້ອງໄດ້ຈົດນັບໃນການທົດລອງສໍາຫລວດພົນລະເມືອງ, ທຸກຄົນມີຄວາມສໍາຄັນ ແລະ ທຸກຄົນໃນຄົວເຮືອນແມ່ນຕ້ອງຈົດນັບເຂົ້າໃນຕອນທ້າຍຂອງການສໍາພາດ, ນັກເດີນສຳຫລວດຈະຕິດສະຕິກເກີຢູ່ຂ້າງປະຕູເຮືອນ, ເພື່ອຊີ້ບອກເຖິງຜົນສໍາເລັດຂອງການທົດລອງເກັບກຳຂໍ້ມູນ ຂອງເຮືອນ ຫລື ທີ່ຢູ່ອາໄສທີ່ຢູ່ໃນເຂດສຳຫລວດນັ້ນ; ນັກເດີນສຳຫລວດ ຈະເກັບກຳຂໍ້ມູນຂອງຄົວເຮືອນໂດຍນຳໃຊ້ແທັບເລັດ ແລະ ຈະຮັບປະກັນວ່າຂໍ້ມູນທີ່ບັນທຶກໄວ້ຈະຖືກເກັບຮັກສາເປັນຄວາມລັບຢ່າງດີ ໂດຍຂໍ້ມູນທີ່ເກັບກໍາແມ່ນພຽງແຕ່ເພື່ອຈຸດປະສົງທາງສະຖິຕິເທົ່ານັ້ນ ແລະ ຈະບໍ່ຖືກສົ່ງຕໍ່ ຫລື ເຜີຍແຜ່. ຄາດວ່າຈະມີເກືອບ 25.000 ຄົວເຮືອນທີ່ຈະລົງໄປຢ້ຽມຢາມໃນລະຫວ່າງ 3 ອາທິດ ໃນເດືອນພຶດສະພາ-ເດືອນມິຖຸນາ ປີ 2024.
ທ່ານ ນາງ ພອນສະຫລີ ສຸກສະຫວັດ ຫົວໜ້າສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ ໄດ້ກ່າວວ່າ: ການສຳຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແມ່ນການສຳຫລວດລະດັບຊາດ ທີ່ເປັນແຫລ່ງຂໍ້ມູນໜຶ່ງດຽວທີ່ສຳຄັນ ໃນການປັບປຸງຖານຂໍ້ມູນພົນລະເມືອງແຫ່ງຊາດຂອງ ສປປ ລາວ ຕະຫລອດໄລຍະ 10 ປີ ຜ່ານມາ; ເປັນຖານຂໍ້ມູນທີ່ຈະປະກອບດ້ວຍຂໍ້ມູນກ່ຽວກັບການຈະເລີນພັນ, ການເສຍຊີວິດ ແລະ ການເຄື່ອນຍ້າຍຂອງພົນລະເມືອງ, ລວມທັງຂໍ້ມູນລະອຽດກ່ຽວກັບຄຸນລັກສະນະຂອງພົນລະເມືອງ, ໂຄງປະກອບດ້ານອາຍຸ, ເພດ, ຊົນເຜົ່າ, ສາສະໜາ, ການຂຶ້ນທະບຽນການເກີດ, ການຖືບັດປະຈຳຕົວ-ສຳມະໂນຄົວ, ການສຶກສາ, ການປະກອບອາຊີບ, ເງື່ອນໄຂການດຳລົງຊີວິດ ແລະ ການເຂົ້າເຖິງການບໍລິການຕ່າງໆ. ການສຳຫລວດດັ່ງກ່າວນີ້ຈະເປັນແຫລ່ງຂໍ້ມູນ ເພື່ອຮັບໃຊ້ໃຫ້ແກ່ການຕິດຕາມ ແລະ ປະເມີນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ແລະ ການກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X, ສະໜອງໃຫ້ແກ່ການຕິດຕາມເປົ້າໝາຍການພັດທະນາແບບຍືນຍົງ ແລະ ວິໄສທັດຮອດປີ 2030, ການຫລຸດພົ້ນອອກຈາກປະເທດດ້ອຍພັດທະນາ, ການປັບປຸງນະໂຍບາຍທາງດ້ານພົນລະເມືອງ ກໍຄື ຍຸດທະສາດ ການພັດທະນາຊັບພະຍາກອນມະນຸດແຫ່ງຊາດ ຂອງ ສປປ ລາວ ແລະ ການຕິດຕາມແຜນງານທາງດ້ານພົນລະເມືອງ ໃນລະດັບຊາດ, ພາກພື້ນ ແລະ ສາກົນອີກດ້ວຍ. ໃນຂະນະທີ່ປະເທດລາວ ກ້າວໄປສູ່ສະຖານະພາບ ຜູ້ມີລາຍຮັບປານກາງ ໃນປີ 2026, ຂໍ້ມູນ ແລະ ຫລັກຖານຈາກການສຳຫລວດພົນລະເມືອງ ຈະມີຄວາມສຳຄັນເປັນຢ່າງຍິ່ງສຳລັບພາກລັດຖະບານ ແລະ ເອກະຊົນ ໃນການຕັດສິນໃຈ ໂດຍອີງໃສ່ຫລັກຖານກ່ຽວກັບເສັ້ນທາງກ້າວໄປສູ່ການເຕີບໂຕຂອງເສດຖະກິດ ແລະ ການປ່ຽນແປງທີ່ດີ ໃນຂະນະທີ່ບໍ່ໄດ້ປະປ່ອຍໃຜໄວ້ທາງຫລັງ.
ທີ່ມາ: ຂປລ.
