ວັນທີ 23 ກໍລະກົດ 2024 ນີ້, ກອງປະຊຸມເວທີປຶກສາຫາລືນັກທຸລະກິດໜຸ່ມປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງຄັ້ງທຳອິດພາຍໃຕ້ຫົວຂໍ້ວ່າ “ລົງເລິກການຮ່ວມມື ຮ່ວມກັນສ້າງຄວາມຈະເລີນຮຸ່ງເຮືອງ” ຈັດຂຶ້ນຢູ່ນະຄອນຄຸນໝິງ ແຂວງຢຸນນານຈີນ. ຜູ້ຕາງໜ້າອົງການຈັດຕັ້ງຊາວໜຸ່ມ ແລະ ນັກທຸລະກິດໜຸ່ມທີ່ມາຈາກ 6 ປະເທດ ລຸ່ມແມ່ນ້ຳລ້ານຊ້າງ-ແມ່ນ້ຳຂອງໄດ້ເຂົ້າຮ່ວມກອງປະຊຸມດັ່ງກ່າວ.
ທ່ານ ນາງ ຫວາງຢີ້ ຮອງປະທານສະຫະພັນຊາວໜຸ່ມແຫ່ງຊາດຈີນ ໄດ້ປະກອບຄຳເຫັນໃນພິທີເປີດກອງປະຊຸມ, ໂດຍຮຽກຮ້ອງໃຫ້ອົງການຈັດຕັ້ງຊາວໜຸ່ມ ແລະ ນັກທຸລະກິດໜຸ່ມຢູ່ປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງ ເພີ່ມທະວີການແລກປ່ຽນ, ຊຸກຍູ້ການເຊື່ອມໂຍງເຊື່ອມຈອດກັນດ້ານຈິດໃຈຂອງປະຊາຊົນ; ຍຶດໝັ້ນການຂັບເຄື່ອນພັດທະນາດ້ວຍການປະດິດສ້າງໃໝ່, ຊຸກຍູ້ການຮ່ວມມືທີ່ຕິດແທດຕົວຈິງ; ລົງເລິກການການພັດທະນາແບບເຊື່ອມໂຍງເຊື່ອມຈອດກັນ, ຊຸກຍູ້ຄວາມຈະເລີນຮຸ່ງເຮືອງຮ່ວມກັນ.
ຜູ້ຕາງໜ້າຊາວໜຸ່ມປະເທດຕ່າງໆທີ່ເຂົ້າຮ່ວມກອງປະຊຸມ ເປັນເອກະພາບກັນເຫັນວ່າ, ເມື່ອຜະເຊີນໜ້າກັບສະພາບການສາກົນ ທີ່ສະຫຼັບສັບຊ້ອນກັນຢ່າງສັບສົນ, ນັກທຸລະກິດໜຸ່ມຂອງປະເທດໃນພາກພື້ນນີ້ເພີ່ມທະວີການຮ່ວມມື, ຈະມີຄວາມໝາຍທີ່ຕັ້ງໜ້າຕໍ່ການຊຸກຍູ້ສັນຕິພາບ ສະຖຽນລະພາບ ແລະ ການພັດທະນາແບບຍືນຍົງຂອງພາກພື້ນ. ຫວັງວ່ານັກທຸລະກິດໜຸ່ມ ຢູ່ປະເທດ ລຸ່ມແມ່ນ້ຳລ້ານຊ້າງ-ແມ່ນ້ຳຂອງ ກຳແໜ້ນໂອກາດທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຢ່າງມີຄຸນນະພາບສູງ, ນຳໃຊ້ເວທີການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງໃຫ້ດີ, ຊຸກຍູ້ການສ້າງສາປະຊາຄົມຮ່ວມຊາຕາກຳ ປະເທດລຸ່ມແມ່ນ້ຳລ້ານຊ້າງ-ແມ່ນ້ຳຂອງ ດ້ວຍຄວາມກະຕືລືລົ້ນຂອງຊາວໜຸ່ມ, ຊຸກຍູ້ໃຫ້ການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ກ້າວຂຶ້ນສູ່ລະດັບສູງກວ່າເກົ່າຢ່າງບໍ່ຢຸດຢັ້ງ.
ໃນກອງປະຊຸມຍັງໄດ້ເຜີຍແຜ່ “ຖະແຫຼງການຄຸນໝິງວ່າດ້ວຍການຮ່ວມມືຂອງນັກທຸລະກິດໜຸ່ມປະເທດລຸ່ມແມ່ນ້ຳລ້ານຊ້າງ -ແມ່ນ້ຳຂອງ”, ໂດຍບັນລຸຄວາມເຫັນທີ່ເປັນເອກະພາບກັນ ກ່ຽວກັບການສ້າງກົນໄກຮ່ວມມືຂອງນັກທຸລະກິດໜຸ່ມ ປະເທດແມ່ນ້ຳລ້ານຊ້າງ-ແມ່ນ້ຳຂອງ.
