ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມເວທີສົນທະນາການຮ່ວມມືລາວ-ຈີນພາຍໃຕ້ຫົວຂໍ້ ໜຶ່ງແລວ ໜຶ່ງເສັ້ນທາງຄັ້ງທີ່ 2 ຈັດຂຶ້ນໃນວັນທີ 7 ທັນວານີ້ ທີ່ໂຮມແຮມແລນມາກ ແມ່ຂອງຣີເວີໄຊສ໌ ນະຄອນຫຼວງວຽງຈັນ ໂດຍແມ່ນກະຊວງຖະແຫລງຂ່າວ ວັດທະນະ ທຳ ແລະ ທ່ອງທ່ຽວຂອງລາວ ຮ່ວມກັບສຳນັກຂ່າວສານຊິນຮົວຂອງຈີນ, ສະພາການຄ້າຊາວຈີນຕ່າງດາວປະຈຳລາວຈັດຂຶ້ນ ໂດຍການຮ່ວມມືຂອງທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ທ່ານ ຟູ ຫົວ ກຳມະການສູນກາງພັກຄອມມູນິດຈີນ ຫົວໜ້າສຳນັກຂ່າວສານຊິນຮົວ, ທ່ານ ຫວັງ ຊ່າງ ອຸປະ ທູດຊົ່ວຄາວ ແຫ່ງສະຖານເອກອັກຄະລັດຖະທູດຈີນປະຈຳລາວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວມີຄໍາເຫັນວ່າ: ກອງປະຊຸມໃນຄັ້ງນີ້, ຈັດຂຶ້ນເພື່ອເສີມສ້າງສາຍພົວພັນການຮ່ວມມືລະຫວ່າງ ລາວ ແລະ ຈີນ, ສົ່ງເສີມຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ມິດຕະພາບລະຫວ່າງປະຊາຊົນຂອງສອງປະເທດ ແລະ ເພີ່ມທະວີການແລກປ່ຽນ, ການຮ່ວມມື ລະຫວ່າງສອງຂະແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວລາວ-ຈີນ, ຈີນ-ລາວ, ປັດຈຸບັນ ການລົງທຶນພັດທະນາການທ່ອງທ່ຽວ ໂດຍນັກລົງທຶນຈາກຈີນແມ່ນນັບມື້ນັບເພີ່ມຂື້ນ, ໂດຍສະເພາະໂຄງການພັດທະນາສິ່ງອຳ ນວຍຄວາມສະດວກດ້ານການທ່ອງທ່ຽວຂອງບັນດາແຂວງຕາມແລວທາງລົດໄຟລາວ-ຈີນໄດ້ປະກອບສ່ວນຕາມຈຸດມຸ່ງໝາຍການພັດທະນາເສັ້ນທາງລົດໄຟລາວ-ຈີນໃຫ້ກາຍເປັນແລວທາງເສດຖະ ກິດທີ່ສ້າງລາຍໄດ້ມະຫາສານໃຫ້ປະເທດ ຊາດ, ຊ່ວຍການແກ້ໄຂສະພາບເສດຖະ ກິດຂອງປະເທດ, ສາມາດດຶງດູດນັກທ່ອງທ່ຽວໃນພາກພື້ນ ແລະ ສາກົນໃຫ້ນັບມື້ນັບຫລາຍຂຶ້ນ.
ໃນໂອກາດນີ້ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ໄດ້ມີຄໍາເຫັນວ່າ: ກອງປະຊຸມເວທີປຶກສາຫາລືການຮ່ວມມືລາວ-ຈີນ ພາຍໃຕ້ຫົວຂໍ້“ໜຶ່ງແລວ ໜຶ່ງເສັ້ນທາງ” ໃນຄັ້ງນີ້, ແມ່ນເວທີໜຶ່ງທີ່ມີຄວາມໝາຍສໍາຄັນ ເພື່ອທົບທວນຄືນໝາກຜົນຂອງການຈັດຕັ້ງປະຕິບັດກິດຈະ ກຳ, ແຜນງານ, ໂຄງການຂອງແຕ່ລະຂະແໜງການທັງເປັນເວທີປຶກສາຫາລື ແລະ ເປີດກວ້າງການຮ່ວມມື, ການແລກປ່ຽນທາງດ້ານເສດຖະກິດ-ການຄ້າ, ການລົງທຶນຂອງພາກລັດ ແລະ ບັນດາຫົວໜ່ວຍທຸລະກິດລະຫວ່າງສອງຊາດລາວ-ຈີນ, ຈີນ-ລາວ. ສອງປະເທດໃນຖານະທີ່ເປັນບ້ານໃກ້ເຮືອນຄຽງຍາມໃດກໍ່ໃຫ້ຄວາມສໍາຄັນ ແລະ ສະໜັບສະໝູນ ເຊິ່ກັນ ແລະ ກັນຢ່າງຕັ້ງໜ້າ ເຊິ່ງໄດ້ປະກອບສ່ວນເຂົ້າໃນການເພີ່ມທະວີ ແລະ ສົ່ງເສີມການຮ່ວມມື ທັງດ້ານເສດຖະກິດການຄ້າ, ການລົງທຶນ, ການແລກປ່ຽນຂໍ້ມູນຂ່າວສານ, ວັດທະນະທໍາ, ເຕັກໂນໂລຊີ ກໍ່ຄືການໄປມາຫາສູ່ກັນລະຫວ່າງປະຊາຊົນດ້ວຍກັນ ໂດຍຜ່ານການທ່ອງທ່ຽວ. ລາວ ແລະ ຈີນ, ມີສາຍພົວພັນມິດຕະ ພາບອັນເປັນມູນເຊື້ອ ແລະ ການພົວພັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານຕາມທິດ 4 ດີ ແລະ ບົນພື້ນຖານການເປັນຄູ່ຮ່ວມຊາຕາກໍາລາວ-ຈີນ, ຈີນ-ລາວ. ສອງພັກ, ສອງລັດ ໄດ້ຕັ້ງໜ້າຈັດຕັ້ງປະຕິບັດຂອບການຮ່ວມມື “ໜຶ່ງແລວ ໜຶ່ງເສັ້ນທາງ” ໃນຫຼາຍຂົງເຂດວຽກງານ, ເປັນຕົ້ນ: ການຮ່ວມມືກັນສ້າງເສັ້ນທາງລົດໄຟລາວ-ຈີນ ເຊິ່ງໄດ້ເປີດນໍາໃຊ້ຢ່າງເປັນທາງການ ໃນປີ 2021 ແລະ ເປີດຂະບວນລົດໄຟໂດຍສານສາຍສາກົນວຽງຈັນ-ຄຸນມິງ, ຄຸນມິງ-ວຽງຈັນ ໃນເດືອນເມສາຜ່ານມາ. ຜົນສຳເລັດດັ່ງກ່າວໄດ້ນຳເອົາຜົນປະໂຫຍດອັນໃຫຍ່ຫລວງມາສູ່ປະຊາຊົນສອງຊາດລາວ-ຈີນ ກໍ່ຄືບັນດາປະເທດ ໃນພາກພື້ນ ເຊິ່ງເປັນການປະກອບສ່ວນທີ່ສຳຄັນເຂົ້າໃນການຮ່ວມມືພັດທະນາເສດຖະກິດ, ການຄ້າ, ການລົງທຶນ ແລະ ການໄປມາຫາສູ່ລະຫວ່າງປະຊາຊົນສອງປະເທດກໍຄືພາກພື້ນສາກົນນັບມື້ນັບເພີ່ມຂຶ້ນ. ນອກນີ້ ລາວຈະສືບຕໍ່ຮ່ວມມືກັບຈີນ ເພື່ອນໍາໃຊ້ເສັ້ນທາງລົດໄຟດັ່ງກ່າວໃຫ້ເປັນເສັ້ນທາງແຫ່ງມິດຕະພາບ, ການຮ່ວມມື ແລະ ການພັດທະນາ, ເສັ້ນທາງແຫ່ງຄວາມອີ່ມໜຳສຳລານ ແລະ ສ້າງຄວາມຜາສຸກໃຫ້ແກ່ປະຊາຊົນສອງຊາດ ລາວ-ຈີນ ກໍ່ຄືປະຊາຊົນໃນພາກພື້ນ.
ກອງປະຊຸມເວທີສົນທະນາການຮ່ວມມືລາວ-ຈີນພາຍໃຕ້ຫົວຂໍ້ ໜຶ່ງແລວ ໜຶ່ງເສັ້ນທາງຄັ້ງທີ່ 2 ຄັ້ງນີ້ ຍັງໄດ້ມອບໃບຢັ້ງຢືນໃຫ້ແກ່ສະມາຊິກຄູ່ຮ່ວມມືດ້ານຂ່າວສານເສດຖະກິດໜຶ່ງແລວ ໜຶ່ງເສັ້ນ ທາງ ເປັນຕົ້ນ: ສູນຄົ້ນຄວ້າເສດຖະກິດຊົນນະບົດຂອງກະຊວງກະສິກໍາ ແລະ ຊົນນະບົດຈີນ, ວິສາຫະກິດຈີນ ແລະ ຂະແໜງການອື່ນໆ ພ້ອມທັງເຊັນສັນຍາການຮ່ວມມືບົດບັນທຶກຄວາມເຂົ້າໃຈລະຫວ່າງເວັບໄຊ ໜຶ່ງແລວ ໜຶ່ງເສັ້ນທາງຈີນ ແລະ ສໍານັກຂ່າວສານປະເທດລາວ ແລະ ການເຊັນສັນຍາການຮ່ວມມືບົດບັນທຶກຄວາມເຂົ້າໃຈລະຫວ່າງທະນາຄານອຸດສາຫະກໍາ ແລະ ການຄ້າຂອງຈີນ ແລະ ຄະນະກໍາມະທິການຮ່ວມມືລາວ-ຈີນ, ລວມທັງກິດຈະກໍາອື່ນໆ ເປັນຕົ້ນ: ພິທີວາງສະແດງຮູບພາບຜົນສຳ ເລັດໃນການສ້າງຄູ່ຮ່ວມຊາຕາກຳລາວ-ຈີນໂດຍຮວບລວມເອົາບັນດາຮູບພາບຂອງການຮ່ວມມືໃນຂົງເຂດຕ່າງໆ ເຊັ່ນ: ການສຶກສາ, ສາທາ, ການຄົມມະນາຄົມ, ການທ່ອງທ່ຽວ, ເສດຖະກິດ, ການຄ້າ, ການລົງທຶນ ແລະ ອື່ນໆ.%
ຂຽນໂດຍ: ບຸນຍັງ ພຸດສະຫວັດ
May be an image of 8 people, dais and text