ສູນກາງຊາວໜຸ່ມປະຊາຊົນປະຕິວັດລາວ (ສຊປປລ) ຮ່ວມກັບວິທະຍຸໂທລະພາບສູນກາງແຫ່ງ ສປ ຈີນ (CMG) ປະຈໍາ ສປປ ລາວ ໄດ້ຈັດກອງປະຊຸມເວທີສົນທະນາແລກປ່ຽນ ໃນຫົວຂໍ້ ການລົງເລິກປະຕິຮູບຂອງຈີນໃນຍຸກໃໝ່ກັບໂອກາດຂອງໂລກ ທີ່ ສຊປປລ ຂຶ້ນໃນວັນທີ 24 ກໍລະກົດ ນີ້ ທີ່ສູນດັ່ງກ່າວ ໂດຍມີ ທ່ານ ທອງຈັນ ພູມີພັນ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ; ທ່ານ ນາງ ແສງແກ້ວ ຫົວໜ້າວິທະຍຸໂທລະພາບສູນກາງແຫ່ງ ສປ ຈີນ (CMG) ປະຈໍາ ສປປ ລາວ ແລະ ແຂກຖືກເຊີນຈາກ 8 ພາກສ່ວນ ພ້ອມດ້ວຍພາກສ່ວນທີ່ກ່ຽວຂ້ອງຂອງ ລາວ-ຈີນ ເຂົ້າຮວ່ມແບບປົກກະຕິ ແລະ ວິດີໂອທາງໄກ.
ທ່ານ ທອງຈັນ ພູມີພັນ ໄດ້ກ່າວວ່າ: ເວທີສົນທະນາ ພາຍໃຕ້ຫົວຂໍ້ ການລົງເລິກປະຕິຮູບຂອງຈີນໃນຍຸກໃໝ່ ກັບໂອກາດຂອງໂລກ ຊຶ່ງຢູ່ໃນທ່າມກາງ ທີ່ ສປ ຈີນ ສໍາເລັດການດໍາເນີນກອງປະຊຸມຄົບຄະນະຄັ້ງທີ 3 ຄະນະກໍາມະການສູນກາງພັກກອມມູນິດຈີນ ສະໄໝ ທີ 20 ແລະ ສປປ ລາວ ຈັດຕັ້ງຜັນຂະຫຍາຍມະຕິກອງປະຊຸມສໍາຄັນ ຂອງພັກ-ລັດ, ບົນພື້ນຖານມູນເຊື້ອການພົວພັນຮ່ວມມືອັນດີ ລະຫວ່າງ ລາວ-ຈີນ, ການເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານຕາມທິດ 4 ດີ ແລະ ການສ້າງຄູ່ຮ່ວມຊາຕາກໍາລາວ-ຈີນ, ຈີນ-ລາວ. ກາຍເປັນຂີດໝາຍສຳຄັນໃນການພົວພັນ ລະຫວ່າງ ຄະນະຊາວໜຸ່ມສອງຊາດລາວ ແລະ ສປ ຈີນ, ທັງເປັນການປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນມິດຕະພາບ ແບບຄູ່ຮ່ວມຍຸດທະສາດ ຮອບດ້ານໝັ້ນຄົງຍາວນານ ລະຫວ່າງສອງພັກ, ສອງລັດ, ປະຊາຊົນສອງຊາດ, ອົງການຈັດຕັ້ງຕ່າງໆ, ເວົ້າສະເພາະສອງອົງການຈັດຕັ້ງຊາວໜຸ່ມລາວ ແລະ ສປ ຈີນ.
ຜ່ານມາຄະນະຊາວໜຸ່ມກໍໄດ້ຮັບການສະໜັບສະໜູນຫຼາຍດ້ານ ບໍ່ວ່າຈະເປັນວັດຖຸເງິນ, ແລກປ່ຽນພົບປະການຖ່າຍທອດບົດຮຽນ, ທັດສະນະສຶກສາ ແລະ ທຶນຝຶກອົບຮົມໃນຫົວຂໍ້ຕ່າງໆໃຫ້ແກ່ຊາວໜຸ່ມລາວ, ມີຊ່ຽວຊານອາສາສະໝັກຈີນ ມາຊ່ວຍຄະນະຊາວໜຸ່ມລາວຫຼາຍສະຫາຍ,ໂຄງການກໍ່ສ້າງພື້ນຖານໂຄງລ່າງ ສູນກິດຈະກໍາຊາວໜຸ່ມຄົບວົງຈອນ. ເວທີສົນທະນາສອງປະເທດ ຖືເອົາເວທີສົນທະນານີ້ ແບ່ງປັນຄວາມຮູ້, ປະສົບການ ຜ່ານຂົງເຂດວຽກງານຕ່າງໆ, ຈັດເວທີສົນທະນາຊາວໜຸ່ມຜ່ານຫົວຂໍ້ຕ່າງໆ ເພື່ອສ້າງແຮງບັນດານໃຈ, ເປັນກໍາລັງແຮງອັນສໍາຄັນທີ່ດີ ແລະ ນໍາເອົາບົດຮຽນ ຜົນປະໂຫຍດມາໃຫ້ແກ່ ສອງພັກ, ສອງລັດ ໃນໂອກາດນີ້ ສະແດງຄວາມຊົມເຊີຍ ແລະ ຍົກຍ້ອງນໍ້າໃຈໄມຕີຈິດ ນໍ້າໃຈອັນງົດງາມ ຂອງພັກ-ລັດ ແລະ ປະຊາຊົນຈີນ.
ບັນດາບົດຮຽນ ແລະ ເນື້ອໃນຜ່ານຫົວຂໍ້ຕ່າງໆເຫຼົ່ານັ້ນຈະເປັນບົດຮຽນອັນລໍ້າຄ່າ, ສ້າງເງື່ອນໄຂ ແລະ ສະພາບແວດລ້ອມໃຫ້ແກ່ຊາວໜຸ່ມລາວ ມີອຸດົມການໜັກແໜ້ນມີຄ່ານິຍົມທີ່ຖືກຕ້ອງ, ມີຄວາມຮູ້ຄວາມສາມາດ ຄຽງຄູ່ກັບຍຸກສະໄໝ ກາຍເປັນຜູ້ສືບທອດທີ່ດີຂອງ ພັກ-ລັດ ແລະ ຖືເອົາມະຕິກອງປະຊຸມໃຫຍ່ ຂອງການນໍາພາຂອງພັກກອມມູນິດຈີນ ແລະ ພັກປະຊາຊົນປະຕິວັດລາວ ນໍາມາຜັນຂະຫຍາຍ ແລະ ນໍາໃຊ້ເຂົ້າໃນວຽກງານໃຫ້ມີປະສິດທິພາບ ປະສິດທິຜົນສູງ.
ຂ່າວ-ພາບ: ຍຸພິນທອງ
