ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ອຸນຄຳ ບຸນເພັງ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງປາກແຊງ ແຂວງຫລວງພະບາງ ໃຫ້ສຳພາດຕໍ່ນັກຂ່າວເມືອງວ່າ: ໃນຕອນຄໍ່າຄືນຂອງ ວັນທີ 20 ພຶດສະພາ 2024 ມີຝົກຕົກແຮງຕິດຕໍ່ກັນຫຼາຍຊົ່ວໂມງ ເຮັດໃຫ້ນໍ້າຫ້ວຍຫຼາຍສາຍ ເກີດມີນ້ຳປ່າໄຫຼຊຸກະທົບໃສ່ແຫຼ່ງນໍ້າຫ້ວຍອວງ ບ້ານສະຄິງ ແລະໄຫຼຖ້ວມຂອບເຂດບ່ອນໄປທຳການຜະລິດຂອງປະຊາຊົນ ໄດ້ຮັບຜົນເສຍຫາຍ ລວມທັງເສັ້ນທາງຫຼວງຂອງແຂວງເລກທີ 2505 ເຮັດໃຫ້ມີຂີ້ເຫຍື້ອ ແລະງ່າໄມ້ ຕັນທໍ່ນ້ຳລອດທາງ ນ້ຳໄດ້ໄຫຼຖ້ວມທາງ ແລະກັດເຊາະເສັ້ນທາງຈົນຂາດ ການສັນຈອນໄປມາຈື່ງໄດ້ຍຸດຊົ່ວຄາວ.
ຕໍ່ກັບເຫດການດັ່ງກ່າວ, ທ່ານ ສຸດາວັນ ພັນຈັກຂັນ ເຈົ້າເມືອງປາກແຊງ ພ້ອມດ້ວຍຄະນະ ໄດ້ໄປກວດກາຕົວຈິງ ທັງປຸກລະດົມພາກສ່ວນນັກທຸລະກິດຢູ່ພາຍໃນເມືອງ ເພື່ອປະກອບສ່ວນການສ້ອມແປງ ແລະແກ້ໄຂສຸກເສີນ ເພື່ອເຮັດໃຫ້ການສັນຈອນສາມາດໄປມາໄດ້ໂດຍພື້ນຖານ, ພາຍຫຼັງໃນການສ້ອມແປງສຸກເສີນໃຫ້ສໍາເລັດ ຈະມີການປັບຕື່ມໃນຫຼັງລະດູຝົນ ເພື່ອໃຫ້ການສັນຈອນໄດ້ມີຄວາມສະດວກເປັນປົກກະຕິ.
ໃນໂອກາດນີ້ ຫົວໜ້າຫ້ອງການໂຍທາທິການ ແລະ ຂົນສົ່ງ ເມືອງປາກແຊງ ໄດ້ຮຽກຮ້ອງໃຫ້ຜູ້ໃຊ້ລົດ ໃຊ້ຖະໜົນ ຈົ່ງມີສະຕິໃນການຂັບຂີ່ຍານພາຫະນະໃນໄລຍະລະດູຝົນ ເພື່ອເຮັດໃຫ້ທຸກຄົນມີຄວາມປອດໄພ, ພ້ອມນີ້ ໄດ້ຮຽກຮ້ອງໃຫ້ອົງການປົກຄອງບ້ານ ຈົ່ງເປັນເຈົ້າການເຝົ້າລະວັງສະພາບທີ່ຈະກະທົບເຖິງການສັນຈອນ ຫາກເກີດມີບັນຫາຕິດຄັດໃຫ້ເລັ່ງແກ້ໄຂ ແລະສະເໜີຕໍ່ພາກສ່ວນກ່ຽວຂ້ອງໂດຍດ່ວນ ຮັບປະກັນບໍ່ໃຫ້ການສັນຈອນຕິດຄັດເປັນເວລາດົນ.
ຂ່າວ: ແກ່ນຄຳ ສົມໃຈປອງ.