ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ່ 18 ສິງຫາ ປີ2022 ນີ້ທີ່ຫ້ອງປະ ຊຸມຫ້ອງວ່າການເມືອງໂພນທອງ ແຂວງຫຼວງພະບາງ ຫ້ອງການໂຍທາທິການ ແລະ ຂົນສົ່ງເມືອງ ໄດ້ຈັດພິທີເຊັນສັນຍາ ໂຄງການ ຂະຫຍາຍໜ້າທາງ ແລະທະລຸເສັ້ນທາງ ແຕ່ບ້ານນາວັດເມືອງໂພນທອງ ແຂວງຫຼວງພະບາງ ຫາ ບ້ານສົບຮຸນເມືອງໃໝ່ແຂວງຜົ້ງສາລີ ມີ ທ່ານ ແຕ໋ງທອງ ໄຊຍະທິ ຮອງເຈົ້າເມືອງໂພນທອງ, ຜູ້ຊີ້ຂົງເຂດວຽກງານເສດຖະກິດຂອງເມືອງ, ພ້ອມດ້ວຍຄະນະກຳມະການຄຸ້ມຄ້ອງ ການລົງທຶນຂອງລັດຂັ້ນເມືອງ ແລະບໍລິສັດຮັບເໝົາເຂົ້າຮ່ວມ.
ພິທີ ໄດ້ມີການຜ່ານມະຕິຕົກລົງຂອງທ່ານເຈົ້າເມືອງໂພນທອງ ວ່າດ້ວຍການຮັບ ຮອງເອົາ ບໍລີສັດສີນໄຊຈະເລີນ ກໍ່ສ້າງສ້ອມແປງຂົວ-ທາງຈຳກັດ, ເປັນຜູ້ຈັດຕັ້ງປະຕິບັດໂຄງການຂະຫຍາຍໜ້າທາງ ແລະທະລຸເສັ້ນທາງ ບ້ານນາວັດເມືອງໂພນທອງ, ແຂວງຫຼວງພະບາງ ຫາ ບ້ານສົບຮຸນ ເມືອງໃໝ່ແຂວງຜົ້ງສາລີ ແລະຜ່ານຮ່າງສັນຍາ ເຊີ່ງເສັ້ນທາງ ທີ່ຈະຂະຫຍາຍໜ້າທາງ ແລະທະລຸໃໝ່ ມີຄວາມຍາວກວ່າ 7 ກິໂລແມັດ, ກວ້າງ 4 ແມັດເຄີ່ງ ໂດຍແມ່ນທຶນຂອງລັດ 100% ມູນຄ່າການກໍ່ສ້າງ 938 ລ້ານ 6 ແສນກວ່າກີບ, ໄລຍະເວລາໃນການກໍ່ສ້າງ 3 ເດືອນເທົ່າກັບ 115 ວັນ ເລີ່ມແຕ່ວັນທີ່ 1 ຕຸລາ ປີ 2022 ຫາ ວັນທີ 15 ກຸມພາ 2022 ໃຫ້ສໍາເລັດ 100% ໂດຍແມ່ນຫ້ອງການໂຍທາທິການ ແລະ ຂົງສົ່ງເມືອງໂພນທອງ ເປັນເຈົ້າຂອງໂຄງການ ແລະບໍລິສັດ ສີນສີນໄຊ ສ້ອມແປງຂົວ-ທາງຈຳກັດ ຕັ້ງຢູ່ ບ້ານຊາງ ເມືອງນໍ້າບາກ ແຂວງຫລວງພະບາງ ເປັນຜູ້ຮັບເໝົາກໍ່ສ້າງ, ຈາກນັ້ນ ໄດ້ມີພິທີເຊັນສັນຍາຕາມລະບຽບກົດໝາຍ ຕອນທ້າຍ ທ່ານຮອງເຈົ້າເມືອງໂພນທອງ ໄດ້ສະແດງຄວາມຂອບໃຈ ຕໍ່ທຸກພາກສ່ວນ ທີ່ເຮັດໃຫ້ການພັດທະນາພື້ນຖານໂຄງລ່າງຂອງເມືອງໂພນທອງ ໄດ້ຮັບການພັດທະນາຕາມແຜນການ ແລະໄດ້ເນັ້ນໜັກ ໃຫ້ບໍລິສັດຮັບເໝົາ ຕ້ອງຮັບປະກັນ ເຖິງຄຸນນະພາບຂອງການກໍ່ສ້າງ ເພື່ອໃຫ້ນຳໃຊ້ໄດ້ຍາວນານ.
ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ