ໂດຍ: ຍຸພິນທອງ
ເພື່ອລະນຶກເຖິງວັນສ້າງຕັ້ງສະຫະພັນແມ່ຍິງລາວ ວັນທີ 20 ກໍລະກົດ 1955 – 20 ກໍລະກົດ 2024 ຄົບຮອບ 69 ປີ ເປັນວັນທີ່ມີຄວາມໝາຍສໍາຄັນທາງປະຫວັດສາດຂອງພັກ-ຂອງຊາດ ແລະ ມູນເຊື້ອຂອງແມ່ຍິງລາວໃນທົ່ວປະເທດ. ໃນໄລຍະຜ່ານມາບໍ່ວ່າຈະເປັນໄລຍະຕໍ່ສູ້ປົດປ່ອຍຊາດຕ້ານຈັກກະພັດຜູ້ຮຸກຮານ ກໍຄືໃນໄລຍະສ້າງສາພັດທະນາປະເທດຊາດ, ແມ່ຍິງລາວບັນດາເຜົ່າໃນທົ່ວປະເທດ ຍາມໃດກໍໄດ້ຄຽງບ່າຄຽງໄຫຼ່ຮ່ວມກັບອ້າຍນ້ອງຊາຍ ໃນການປະຕິບັດວຽກງານທີ່ຕົນເອງຮັບຜິດຊອບດ້ວຍນໍ້າໃຈຮັກຊາດອັນສູງສົ່ງ ຊຶ່ງເຫັນໄດ້ຜົນງານອັນໂດດເດັ່ນ ໃຫຍ່ຫຼວງ ຫຼາຍທ່ານໄດ້ກາຍເປັນວິລະຊົນແຫ່ງຊາດ.
ທ່ານນາງ ນິນຄໍາ ແກ້ວປະພັນ ຜູ້ຈັດການຝ່າຍກວດກາພາຍໃນທະນາຄານ ເອັສທີ ຈໍາກັດ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ 20 ກໍລະກົດ ເມື່ອບໍ່ດົນມານີ້ວ່າ: ຕົນເອງໄດ້ກຳເນີດໃນຄອບຄົວພະນັກງານປະຕິວັດ ຈາກການບອກເຫຼົ່າຂອງພໍ່ ແລະ ແມ່ ເຖິງແມ່ນວ່າພວກທ່ານທັງສອງຈະຈາກໄປແລ້ວກໍຕາມ ແຕ່ຄຸນງາມຄວາມດີ ນ້ຳໃຈຮັກຊາດຂອງພວກທ່ານຍັງຄົງຢູ່ໃນດວງໃຈຂອງລູກໆຕະຫຼອດມາ ໂດຍສະເພາະຜູ້ເປັນແມ່ໄດ້ກາຍເປັນແບບຢ່າງອັນດີໃຫ້ລູກ ຊຶ່ງກ່ອນໜ້ານີ້ເພີ່ນດຳລົງຊີວິດຢູ່ກັບຄອບຄົວໃນເຂດຖານທີ່ໝັ້ນປະຕິວັດ (ເຂດປົດປ່ອຍ) ເພີ່ນເຮັດວຽກຢູ່ໃນກອງສິລະປະກອນສະແດງຮັບໃຊ້ແນວໜ້າ ແລະ ສັງຄົມ ປຸກລະດົມປະຊາຊົນໃຫ້ມີຈິດໃຈຮັກຊາດ ຮັກບ້ານເກີດເມືອງນອນ ປະກອບສ່ວນສູ້ຮົບຕ້ານກັບພວກຈັກກະພັດທີ່ເຂົ້າມາຮຸກຮານດ້ວຍຈິດໃຈປະຕິວັດໃນທົ່ວປວງຊົນລາວທັງຊາດ ແມ່ໄດ້ຮັບການຍ້ອງຍໍຈາກພັກ-ລັດ, ອຳນາດການປົກຄອງ, ເປັນແມ່ຍິງ 3 ດີ, ເປັນຄອບຄົວແມ່ຍິງ 3 ດີ, ເປັນຄອບຄົວຕົວແບບໃນດ້ານຕ່າງໆ ຈົນກາຍເປັນຄອບຄົວພັດທະນາ, ຜົນງານຄຸນງາມຄວາມດີ ແລະ ແບບຢ່າງອັນພົ້ນເດັ່ນໄດ້ສົ່ງຕໍ່ໃຫ້ກັບລູກໆແຕ່ລະຄົນ ໄດ້ຮັບການສຶກສາຮ່ຳຮຽນຢູ່ທັງພາຍໃນ ແລະ ຕ່າງປະເທດ ພ້ອມນຳເອົາແບບຢ່າງບົດຮຽນຂອງເພີ່ນມາໝູນໃຊ້ໃນການດຳລົງຊີວິດເປັນຄະຕິເຕືອນໃຈຕະຫຼອດມາ.
ໃນໂອກາດອັນມີຄວາມໝາຍນີ້ ຕົນເອງມີຄວາມຮູ້ສຶກພາກພູມໃຈເປັນຢ່າງຍິ່ງ ທີ່ຍາມໃດພັກ-ລັດກໍໄດ້ເອົາໃຈ ໃສ່ໃນຊຸກຍູ້ສົ່ງເສີມບົດບາດແມ່ຍິງລາວໃນສັງຄົມ ຕະຫຼອດໄລຍະທີ່ຜ່ານມາເຫັນໄດ້ວ່າສະຫະພັນແມ່ຍິງລາວ ພາຍໃຕ້ການນໍາພາຂອງພັກ-ລັດ ໄດ້ສ້າງເງື່ອນໄຂໃຫ້ອົງການຈັດຕັ້ງສະຫະພັນແມ່ຍິງລາວ ເຄື່ອນໄຫວຕາມພາລະບົດບາດ, ສິດ, ໜ້າທີ່ຂອງຕົນ, ສະມາຊິກແມ່ຍິງໄດ້ຮັບການພັດທະນາໃນທຸກດ້ານ, ເອົາໃຈໃສ່ສຶກສາອົບຮົມການເມືອງນໍາພາແນວຄິດໃຫ້ແມ່ຍິງລາວບັນດາເຜົ່າຕື່ນຕົວປະຕິບັດແນວທາງນະໂຍບາຍຂອງພັກ. ໃນນາມສ່ວນຕົວ ຕົນເອງກໍເປັນພະນັກງານແມ່ຍິງຜູ້ໜຶ່ງທີ່ມີຄວາມຫ້າວຫັນ ແລະ ພັດທະນາວິຊາສະເພາະຂອງຕົນຢູ່ສະເໝີ ປັດຈຸບັນການສຶກສາແມ່ນທຸກຄົນສາມາດເຂົ້າເຖິງໄດ້. ແມ່ຍິງລາວບັນດາເຜົ່າມີມູນເຊື້ອອັນດີງາມ ທີ່ສືບທອດກັນມາໃນຫຼາຍຍຸກ ຫຼາຍສະໄໝ ຊຶ່ງໃນນີ້ບໍ່ສະເພາະແຕ່ຮ່ວມຮັກສາ ແລະ ສືບທອດວັດທະນະທໍາ, ຮີດຄອງປະເພນີອັນດີງາມຂອງຊາດລາວບໍ່ໃຫ້ຈາງຫາຍ. ແມ່ຍິງລາວບັນດາເຜົ່າໃນອະດີດ ກໍຄືສະມາຊິກສະຫະພັນແມ່ຍິງລາວຍັງໄດ້ຮັກສາ ແລະ ສືບຕໍ່ເສີມຂະຫຍາຍຜົນງານການເຄື່ອນໄຫວຕິດແໜ້ນກັບຂະບວນການປະຕິວັດ ທີ່ໄດ້ຄຽງບ່າຄຽງໄຫຼ່ກັບອ້າຍນ້ອງຊາຍ ໃນພາລະກິດຕໍ່ສູ້ປົດປ່ອຍຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ຄຽງຄູ່ກັນນັ້ນ, ເພີ່ມທະວີການສ້າງຄວາມເຂົ້າໃຈ ແລະ ຖືສໍາຄັນຕໍ່ການປະຕິບັດຄຳຂວັນ, ຂໍ້ແຂ່ງຂັນ 3 ດີ ຕິດພັນກັບຂະບວນແຂ່ງຂັນຮັກຊາດ
ແລະ ພັດທະນາ, ການສ້າງຄອບຄົວ ແລະ ບ້ານແມ່ຍິງ 3 ດີ ຕິດພັນກັບການສ້າງບ້ານພັດທະນາຕາມທິດ 3 ສ້າງ ໃຫ້ເປັນຂະບວນກ້ວາງຂວາງ ເພື່ອພັດທະນາການຈັດຕັ້ງ, ສະມາຊິກສະຫະພັນແມ່ຍິງ, ແມ່ຍິງບັນດາເຜົ່າ, ສ້າງສະຖາບັນຄອບຄົວ ແລະ ສັງຄົມໃຫ້ມີຄວາມສະຫງົບ ປອດໄພ ເພື່ອບຸກທະລຸການພັດທະນາທັງ 4 ດ້ານ (ຮ່າງກາຍ, ແນວຄິດຈິດໃຈ, ການສຶກສາ, ວິຊາຊີບ ແລະ ສີມືແຮງງານ).
ໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 69 ປີ ຂໍອວຍພອນໄຊອັນປະເສີດມາຍັງການນໍາພັກ-ລັດ, ພະນັກງານອາວຸໂສບໍານານ, ຄະນະນໍາສະຫະພັນແມ່ຍິງ, ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ, ພະນັກງານ, ທະຫານ, ຕໍາຫຼວດໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ, ຄອບຄົວ ແລະ ມີຜົນສໍາເລັດໃນໜ້າທີ່ວຽກງານທຸກປະການ.
