ເມື່ອບໍ່ດົນມານີ້, ທີ່ຫ້ອງປະຊຸມກອງບັນຊາການ ປກສ ແຂວງເຫງະອານ ສສ ຫວຽດນາມ ໄດ້ຈັດກອງປະຊຸມແລກປ່ຽນສະພາບປະຈຳປີ 2024 ລະຫວ່າງກອງບັນຊາການ ປກສ ແຂວງບໍລິຄຳໄຊ, ປກສ ແຂວງ ຊຽງຂວາງ ແລະ ປກສ ແຂວງ ຫົວພັນ ສປປ ລາວ ກັບກອງບັນຊາການ ປກສ ແຂວງເຫງະອານ ສສ ຫວຽດນາມ ເປັນເຈົ້າພາບ.
ກອງປະຊຸມໄດ້ພ້ອມກັນສັງເກດຕີລາຄາຄືນໝາກຜົນການຮ່ວມມືຮັກສາຄວາມສະຫງົບ, ຄວາມເປັນລະບຽບຮຽບ ຮ້ອຍ ລຽບຕາມຊາຍແດນລາວ-ຫວຽດນາມ, ໃນຊຸມປີຜ່ານມາ ລະຫວ່າງກອງບັນການຕໍາຫຼວດເເຂວງເຫງະອານ ສສ ຫວຽດ ນາມ ກັບ ກອງບັນຊາການ ປກສ ເເຂວງບໍລິຄໍາໄຊ, ແຂວງ ຊຽງ ຂວາງ ເເລະ ເເຂວງຫົວພັນ ໂດຍສະເພາະເເມ່ນວຽກງານປ້ອງກັນຄວາມສະຫງົບຄວາມເປັນລະບຽບຮຽບຮ້ອຍ ເເລະ ວຽກງານການຮ່ວມມືຂອງ 2 ປະເທດ ລາວ-ຫວຽດນາມ ຄື: ເເຂວງບໍລິຄໍາໄຊ, ແຂວງ ຊຽງຂວາງ ເເລະ ເເຂວງຫົວພັນ ທີ່ໄດ້ມີຊາຍແດນຕິດຈອດກັນ, ສາຍພົວພັນຮ່ວມມືປະສານສົມທົບກັນມາເເຕ່ດົນ ນານ ເຊີ່ງຄະນະພັກ, ອົງການປົກຄອງທັງ 2 ປະເທດໄດ້ສ້າງເງື່ອນໄຂອໍານວຍຄວາມສະດວກໃຫ້ເເກ່ການພົວພັນຮ່ວມມືປະກອບສ່ວນເພີ່ມພູນ ຄູນສ້າງສາຍພົວພັນທີ່ດີງາມ ເເລະ ບໍລິສຸດຜຸດຜ່ອງລະຫວ່າງລາວ-ຫວຽດນາມກ່ຽວກັບການເຄື່ອນໄຫວວຽກ ງານປ້ອງກັນຄວາມສະຫງົບຮອບດ້ານ, ເປັນເຈົ້າການປະສານສົມທົບກ່ຽວກັບການເເລກປ່ຽນຂໍ້ມູນຂ່າວສານທີ່ສໍາຄັນ ຕ້ານ ເເລະ ສະກັດກັ້ນບັນຫາອາດຊະຍາກໍາຂ້າມຊາດ, ຂ້າມເເດນ ບັນຫາຢາເສບຕິດ, ຄ້າຂາຍເຖື່ອນ, ການລີ້ຊ່ອນຕັ້ງພູມລໍາເນົາເເບບບໍ່ຖືກຕ້ອງ ເເລະ ບັນຫາອື່ນໆ ທີ່ສົ່ງຜົນກະທົບໂດຍກົງຕໍ່ການພັດທະນາເສດຖະກິດ-ສັງຄົມ ເເລະ ຄວາມໝັ້ນຄົງທັງ 2 ປະເທດ.
1 ປີຜ່ານມາໄດ້ຮ່ວມກັນປະສານສົມທົບກັນ ປະຕິບັດວຽກງານຮອບດ້ານສາມາດມ້າງຄະດີຂົນສົ່ງ-ຄ້າຂາຍຢາເສບຕິດຢູ່ເມືອງຄຳເກີດ, ກັກຜູ້ຖຶກຫາໄດ້01 ຄົນ, ຍຶດຂອງກາງ: ຢາໄອສ 106 ຫໍ່ ( ໜັກ 110 ກິໂລກຣາມ ), ເຮໂລອິນ 99 ແທ່ງ ( ໜັກ 38 ກິໂລກຣາມ ), ຢາອີ 47 ຖົງ ( ໜັກ 61 ກິໂລກຣາມ ), ພາຫະນະລົດໃຫຍ່ 01 ຄັນ, ສາມາດກັກຕົວກຸ່ມລັກລອບຂົນສົ່ງຢາເສບຕິດ ຢູ່ເຂດຊາຍແດນແຂວງ ບໍລິຄຳໄຊ ແລະ ແຂວງ ເຫງະອານ ທີ່ກຳລັງຈະຂ້າມໄປຫວຽດນາມ, ກັກຜູ້ຖຶກຫາໄດ້ 02 ຄົນ ( ຄົນລາວ ) ຍຶດຂອງກາງ: ເຮໂລອິນ 20 ແທ່ງ ( ໜັກ 7,8 ກິໂລກຣາມ ) ຢາໄອສ 05 ຖົງ ( ໜັກ 5 ກິໂລກຣາມ ). ໄດ້ສົມ ທົບເຈົ້າໜ້າທີ່ ປກສ ແຂວງ ເຫງະອານ ກວດກາ, ເກັບກຳຂໍ້ມູນ, ພິສູດ ແລະ ນຳຈັບເປົ້າໝາຍຄ້າ-ຂາຍຢາເສບຕິດ, ລັກຊັບພົນລະເມືອງ ທີ່ເອົາຕົວລົບໜີມາລີ້ຊ່ອນຢູ່ເມືອງຄຳເກີດ ແລະ ເມືອງ ວຽງທອງ ກັກຕົວ ໄດ້ 03 ຄົນ, ຈັບເປົ້າໝາຍລັກຊັບພົນລະເມືອງ ທີ່ມາລີ້ຊ່ອນຢູ່ເມືອງວຽງທອງ, ໄດ້ 02 ຄົນ ( ໄດ້ມອບໃຫ້ເຈົ້າໜ້າທີ່ ປກສ ແຂວງ ເຫງະອານ ສສ ຫວຽດນາມ ນຳໄປດຳເນີນຄະດີຕາມລະບຽບກົດໝາຍ,
ພ້ອມດຽວກັນນີ້ຍັງຈະໄດ້ພ້ອມກັນສືບຕໍ່ສຶກສາອົບຮົມພົນລະເມືອງຂອງຕົນໃຫ້ເອົາໃຈ ໃສ່ປະຕິບັດລະບຽບການເຂົ້າ- ອອກເມືອງ ເເລະ ປະຕິບັດລະ ບຽບກົດໝາຍຮີດຄອງປະເພນີອັນດີງາມຂອງສອງປະເທດ, ສືບຕໍ່ເພີ່ມທະວີປະສານສົມທົບກັນໃນທຸກດ້ານລວມເຖິງການພັດທະນາເສດຖະກິດສັງຄົມ ເເລະ ເເກ້ໄຂຊີວິດການເປັນຢູ່ຂອງປະຊາຊົນໃຫ້ດີຂື້ນເທື່ອລະກ້າວ, ເພີ່ມທະວີຄວາມສາມັກຄີຮັກເເພງກັນ ພ້ອມກັນປົກປັກຮັກສາ ເເລະ ສ້າງສາພັດທະນາເສັ້ນຊາຍເເດນລາວ-ຫວຽດນາມ, ຫວຽດນາມ- ລາວ, ໃຫ້ມີສັນຕິພາບມິດຕະພາບຮ່ວມມື ເເລະ ພັດທະນາ.
ຈາກນັ້ນ, ຕາງໜ້າຄະນະຜູ້ເເທນ ເເຕ່ລະຝ່າຍກໍ່ໄດ້ພ້ອມກັນລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາ ໃຫ້ຜູ້ເເທນທີ່ເຂົ້າຮ່ວມກອງປະຊຸມໄດ້ຮັບຊາບຍັງໄດ້ພ້ອມກັນລົງນາມເຊັນບົດບັນທືກຊ່ວຍຈໍາເພື່ອສືບຕໍ່ຂະຫຍາຍເເຜນສັນຍາຮ່ວມມືກັນໃນດ້ານຕ່າງໆ ເພື່ອຮ່ວມກັນສະກັດກັ້ນ ເເລະ ເເກ້ໄຂບັນຫາປະກົດການຫຍໍ້ທໍ້ອື່ນໆ, ທີ່ອາດຈະເກີດຂື້ນຕາມບໍລິເວນຊາຍເເດນໃຫ້ມີຄວາມວ່ອງໄວ ເເລະ ທ່ວງທັນຕໍ່ເວລາ. ຫຼັງຈາກນັ້ນ ທັງສອງຝ່າຍ ກອງບັນຊາການ ປກສ ແຂວງ ເຫງະອານ ສສຫວຽດນາມ ແລະ ກອງບັນຊາການ ປກສ ແຂວງ ບໍລິຄຳໄຊ ຍັງໄດ້ແລກປ່ຽນບາງບັນຫາກ່ຽວກັບວຽກງານຕ້ານ ແລະ ສະກັດກັ້ນຢາເສບຕິດຕາມຊາຍແດນ ແລະ ວຽກງານອື່ນອີກ.
ພາບ-ຂ່າວ: ເກ
