ວັນທີ 24 ມິຖຸນາ 2024, ທີ່ນະຄອນຫຼວງ ຮ່າໂນ້ຍ, ທ່ານ ນາງ ຄໍາເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂ່ຳນັບ ທ່ານ ພົນໂທ ເລືອງ ຕາມ ກວ່າງ, ກໍາມະການສູນກາງພັກ, ລັດຖະມົນຕີກະຊວງປ້ອງກັນຄວາມສະຫງົບ ສສ ຫວຽດນາມ ໃນໂອກາດທີ່ທ່ານໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ປະຈຳ ສສ ຫວຽດ ນາມ.
ທ່ານ ນາງ ຄໍາເພົາ ເອີນທະວັນ ໄດ້ນໍາເອົາຄໍາຢ້ຽມຢາມຖາມຂ່າວອັນອົບອຸ່ນ ແລະ ຄໍາອວຍພອນອັນປະເສີດ ຂອງການນໍາພັກ, ລັດຖະບານ, ການນໍາກະຊວງປ້ອງກັນຄວາມສະຫງົບລາວ ເຖິງການນໍາພັກ, ລັດຖະບານ, ທ່ານລັດຖະມົນຕີກະຊວງປ້ອງກັນຄວາມສະຫງົບຫວຽດນາມ. ພ້ອມທັງສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງທ່ານ ພົນໂທ ເລືອງ ຕາມ ກວ່າງ .
ທ່ານທູດໄດ້ຕີລາຄາສູງຕໍ່ ສສ ຫວຽດນາມ: ພາຍໃຕ້ການນໍາພາ-ຊີ້ນໍາອັນສະຫຼາດສ່ອງໃສຂອງພັກກອມມູນິດຫວຽດນາມ ແລະ ພາຍໃຕ້ການນໍາພາຂອງທ່ານລັດຖະ ມົນຕີກະຊວງປ້ອງກັນຄວາມສະຫງົບ, ສສ ຫວຽດນາມ ແມ່ນມີສະຖຽນລະພາບທາງດ້ານການເມືອງ, ມີຄວາມສະຫງົບສຸກ, ເສດຖະກິດໄດ້ຮັບການພັດທະນາ, ປະເທດ ຊາດນັບມື້ຈະເລີນຮຸ່ງເຮືອງ, ຊີວິດການເປັນຢູ່ຂອງປະຊາຊົນກໍນັບມຶ້ນັບດີຂື້ນເລື້ອຍໆ; ສສ ຫວຽດນາມ ກໍຄືກໍາລັງປ້ອງກັນຄວາມສະຫງົບປະຊາຊົນ ໄດ້ມີຄວາມເຕີບໃຫຍ່ເຂັ້ມແຂງຮອບດ້ານ, ປະກອບສ່ວນເຂົ້າໃນພາລະກິດປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ, ຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ເສດຖະກິດ, ວັດທະນະທໍາ – ສັງຄົມ ໄດ້ຮັບການພັດທະ ນາຢ່າງບໍ່ຢຸດຢັ້ງ, ບົດບາດອິດທິພົນຂອງ ສສ ຫວຽດນາມ ກໍຄືກໍາລັງປ້ອງກັນຄວາມສະຫງົບປະຊາຊົນຫວຽດນາມ ນັບມື້ພົ້ນເດັ່ນຂື້ນໃນເວທີພາກພື້ນ ແລະ ສາກົນ.
ຜ່ານມາ, ການພົວພັນຮ່ວມມືລະຫວ່າງສອງກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມ ນັບມື້ນັບແໜ້ນແຟ້ນ ແລະ ໄດ້ຮັບໝາກຜົນໃນທຸກຂົງເຂດວຽກງານ ໂດຍສະເພາະແມ່ນການຮ່ວມມືໃນຂົງເຂດວຽກງານວິຊາສະເພາະ. ໃນປີ 2024 ນີ້, ລັດຖະບານ ສສ ຫວຽດນາມ ກໍຄືກະຊວງປ້ອງກັນຄວາມສະຫງົບຫວຽດນາມ ໄດ້ໃຫ້ການຊ່ວຍເຫຼືອ 2 ໂຄງການໃຫຍ່ຄື: ໂຄງ ການສ້າງສູນບໍາບັດຢາເສບຕິດຂະໜາດກາງໃຫ້ແກ່ກະຊວງປ້ອງກັນຄວາມສະຫງົບລາວ ແລະ ໂຄງການສ້າງຖານຂໍ້ມູນປະຊາກອນແຫ່ງຊາດໃຫ້ແກ່ ສປປ ລາວ.
ທ່ານລັດຖະມົນຕີກະຊວງປ້ອງກັນຄວາມສະຫງົບຫວຽດນາມ ໄດ້ສະແດງຄວາມຊົມເຊີຍທ່ານ ນາງ ຄໍາເພົາ ເອີນທະວັນ ທີ່ໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ ປະຈຳ ສສ ຫວຽດນາມ ແລະ ເຊື່ອໝັ້ນວ່າ, ທ່ານຈະເປັນຂົວຕໍ່ ປະກອບສ່ວນຢ່າງຕັ້ງໜ້າເຂົ້າໃນການເສີມຂະຫຍາຍສາຍພົວພັນຮ່ວມມືລະຫວ່າງສອງປະ ເທດ ລາວ – ຫວຽດນາມ ໃຫ້ນັບມື້ນັບຂະຫຍາຍຕົວ, ບັນລຸໄດ້ໝາກຜົນສຳເລັດໃນຫຼາຍຂົງເຂດ ການເມືອງ, ເສດຖະກິດ, ວັດທະນະທຳ, ປ້ອງກັນຊາດ, ປ້ອງກັນຄວາມສະຫງົບ. ກະຊວງປ້ອງກັນຄວາມສະຫງົບຫວຽດນາມ ພ້ອມແລ້ວທີ່ຈະໃຫ້ການຮ່ວມ ມື, ສະໜັບສະໜູນ ແລະ ອຳນວຍຄວາມສະດວກເພື່ອໃຫ້ທ່ານທູດປະຕິບັດໜ້າທີ່ຂອງຕົນສຳເລັດຕາມການມອບໝາຍຂອງພັກ ແລະ ລັດຖະບານ. ພ້ອມນີ້, ທ່ານຍັງໄດ້ກ່າວວ່າ, ການພົວພັນຮ່ວມມືລະຫວ່າງສອງກະຊວງປ້ອງກັນຄວາມສະຫງົບ ຫວຽດນາມ ແລະ ລາວ ໃນໄລຍະຜ່ານມາໄດ້ຮັບການປັບປຸງ ແລະ ຂະຫຍາຍຕົວໄປສູ່ລວງກວ້າງ ແລະ ລວງເລິກ, ພິເສດແມ່ນໃນວຽກງານການປະສານງານ, ການແລກ ປ່ຽນ ສະພາບການທີ່ກ່ຽວຂ້ອງກັບວຽກງານປ້ອງກັນຄວາມສະຫງົບແຫ່ງຊາດ ແລະ ຄວາມເປັນລະບຽບຮຽບຮ້ອຍຂອງສັງຄົມຂອງແຕ່ລະປະເທດ. ທ່ານຢືນຢັນອີກວ່າ, ກະຊວງປ້ອງກັນຄວາມສະຫງົບຫວຽດນາມ ໃຫ້ຄວາມສຳຄັນ ແລະ ໃຫ້ບຸລິມະສິດສູງສຸດຕໍ່ການເພີ່ມທະວີສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ເວົ້າລວມ, ເວົ້າສະເພາະແມ່ນລະຫວ່າງກະຊວງປ້ອງກັນຄວາມສະຫງົບຂອງສອງປະເທດ.
ໃນໂອກາດນີ້, ທ່ານທູດຍັງໄດ້ຕາງໜ້າພັກ, ລັດ ແລະ ປະຊາຊົນລາວ ສະແດງຄວາມຄວາມຮູ້ບຸນຄຸນ ແລະ ຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາ ຊົນຫວຽດນາມອ້າຍນ້ອງທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ສປປ ລາວ ຕະ ຫຼອດໄລຍະຜ່ານມາ. ໃນຖານະເປັນເອກອັກຄະລັດຖະທູດລາວ ປະຈຳ ສສ ຫວຽດ ນາມ, ທ່ານຈະສືບຕໍ່ໄດ້ຮັບການສະໜັບສະໜູນ, ຊ່ວຍເຫຼືອຈາກທ່ານລັດຖະມົນຕີ ກໍຄືຄະນະນໍາກະຊວງປ້ອງກັນຄວາມສະຫງົບຫວຽດນາມ ແລະ ທຸກພາກສ່ວນທີ່ກ່ຽວຂ້ອງຂອງຫວຽດນາມ ແລະ ຈະປະຕິບັດໜ້າທີ່ສຸດຄວາມສາມາດຂອງຕົນ ໃນການເປັນຂົວຕໍ່ສຳຄັນໃຫ້ແກ່ການຊຸກຍູ້ການຮ່ວມມືຂອງສອງຝ່າຍ ເພື່ອເສີມຂະຫຍາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ມີໝາກຜົນຍິ່ງໆຂື້ນ.
ຂ່າວ-ພາບ: ສະຖານທູດລາວທີ່ຮ່າໂນ້ຍ.
