ໃນວັນທີ 18 ທັນວາ 2023, ທີ່ ຕືກ ສະພາເອີຣົບ, ນະຄອນຫຼວງບຣຸກແຊນ, ປະເທດ ແບນຊິກ, ທ່ານ ກິ່ງໂພແກ້ວ ພົມມະຫາໄຊ, ໄດ້ເຂົ້າຍື່ນສານຕາຕັ້ງຕໍ່ ທ່ານ ຊາກ ມິແຊນ, ປະທານສະພາມົນຕີການເມືອງເອີຣົບ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະພາບເອີຣົບ.
ໃນໂອກາດດັ່ງກ່າວ, ທ່ານ ກິ່ງໂພແກ້ວ ພົມມະຫາໄຊ ໄດ້ຮັບກຽດໂອ້ລົມກັບ ທ່ານ ຊາກ ມິແຊນ ດ້ວຍບັນຍາກາດອັດທະຍາໄສໄມຕີຈິດອັນດີ, ເຊິ່ງທ່ານທູດໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຂອງ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ສົ່ງມາຍັງ ທ່ານ ຊາກ ມິແຊນ. ພ້ອມດຽວກັນນັ້ນ, ທ່ານທູດ ຍັງໄດ້ກ່າວໃນນາມຕາງໜ້າລັດຖະບານລາວວ່າ ສປປ ລາວ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີມີມາແລ້ວ ນັບຕັ້ງແຕ່ ສປປ ລາວ ແລະ ສະຫະພາບເອີຣົບ ໄດ້ສ້າງຕັ້ງສາຍພົວພັນການທູດນໍາກັນໃນປີ 1975 ແລະ ເຫັນໄດ້ວ່າ ການພົວພັນມິດຕະພາບ ແລະ ການຮ່ວມມືທີ່ດີດັ່ງກ່າວໄດ້ຮັບການເສີມຂະຫຍາຍຢ່າງເປັນປົກກະຕິ. ໃນພ້ອມດຽວກັນນັ້ນ, ທ່ານທູດ ຍັງໄດ້ແຈ້ງໃຫ້ຊາບຕື່ມວ່າ ປີ 2024 ສປປ ລາວ ຈະໄດ້ຮັບກຽດເປັນປະທານໝູນວຽນອາຊຽນອີກຮອບໜື່ງ ແລະ ຫວັງວ່າ ສະຫະພາບເອີຣົບ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ແລະ ສະໜັບສະໜູນໃນການເປັນປະທານອາຊຽນ ກໍຄືຂອບການຮ່ວມມືສາກົນອື່ນໆ.
ໃນໂອກາດດຽວກັນນີ້, ທ່ານ ຊາກ ມິແຊນ ກໍໄດ້ສະແດງຄວາມຂອບໃຈ ແລະ ສົ່ງຄໍາອວຍພອນຢື້ຢາມ ຖາມຂ່າວຄືນ ເຖິງ ພະນະທ່ານ ປະທານປະເທດ ແຫ່ງ ສປປ ລາວ ເຊັ່ນດຽວກັນ, ທັງໄດ້ສະແດງຄວາມຍິນດີຕ້ອນຮັບ ທ່ານທູດຄົນໃໝ່ ແລະ ອວຍພອນໃຫ້ທ່ານທູດ ຈົ່ງປະສົບຜົນສໍາເລັດໃນການປະຕິບັດໜ້າທີ່ການທູດທຸກປະການ. ທ່ານທູດ ກໍໄດ້ສະແດງຄວາມຂອບໃຈ ຕໍ່ຄໍາເວົ້າອັນຈົບງາມ ແລະ ຄໍາອວຍພອນດັ່ງກ່າວ ແລະ ຢືນຢັນວ່າ ຈະປະຕິບັດໜ້າທີ່ຂອງຕົນໃຫ້ດີ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ ແລະ ສະຫະພາບເອີຣົບ ໃຫ້ນັບມື້ນັບດີຂື້ນ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ
