ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 17 ມັງກອນ 2023, ທີ່ ສຳນັກ ງານປະທານາທິບໍດີ ແຫ່ງ ສາທາລະ ນະລັດ ສະຫະພັນ ເຢຍລະມັນ (Schloss Bellevue), ທ່ານ ໄມບົວ ໄຊຍະວົງ ໄດ້ເຂົ້າຍື່ນສານຕາຕັ້ງຕໍ່ ພະນະທ່ານ ຟຣັງ- ວານເຕີ ສະຕາຍມາຍເອີ (Frank-Walter STEINMEIER), ປະທານາທິບໍດີ ແຫ່ງ ສາທາລະນະລັດ ສະຫະພັນ ເຢຍລະມັນ ເພື່ອດຳລົງຕຳ ແໜ່ງເປັນເອກອັກຄະລັດ ຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ເຢຍ ລະມັນ.
ພາຍຫຼັງການຢື່ນສານຕາຕັ້ງ, ທ່ານເອກອັກຄະລັດຖະທູດ ໄດ້ພົບປະໂອ້ລົມກັບ ພະນະທ່ານປະທານາທິບໍດີ, ຊຶ່ງ ພະນະທ່ານ ປະທານາທິບໍດີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ ທ່ານ ໄມບົວ ໄຊຍະວົງ, ທີ່ໄດ້ຮັບ ການແຕ່ງຕັ້ງຈາກ ປະທານປະເທດ ແຫ່ງ ສປປ ລາວ ໃຫ້ດຳລົງຕຳແໜ່ງ ເປັນເອກອັກຄະລັດ ຖະທູດຜູ້ມີອຳນາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ເຢຍລະມັນ, ເຊິ່ງເປັນການປະກອບສ່ວນອັນສໍາຄັນເຂົ້າໃນການເພີ່ມທະວີ ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງສອງປະເທດໃຫ້ນັບມື້ນັບເລິກເຊິ່ງຍິ່ງຂຶ້ນ ແລະ ອວຍ ພອນໃຫ້ ທ່ານເອກອັກຄະລັດຖະທູດຄົນໃໝ່ ຈົ່ງປະສົບຜົນສຳເລັດໃນການປະ ຕິບັດໜ້າທີ່ວຽກງານອັນມີກຽດຂອງຕົນ.
ທ່ານເອກອັກຄະລັດຖະທູດ ໄດ້ສະແດງຄວາມຂອບໃຈ ຕໍ່ຄໍາເວົ້າອັນຈົບງາມ ແລະ ຖືໂອກາດນີ້ ນຳເອົາຄວາມ ຢື້ຢາມຖາມຂ່າວອັນອົບອຸ່ນ, ພອນໄຊອັນປະ ເສີດ ແລະ ຄວາມຮັກແພງ ຈາກພະນະທ່ານ ທອງລຸນ ສີສຸລິດ, ປະທານ ປະເທດ ແຫ່ງ ສປປ ລາວ ເຖິງ ພະນະທ່ານ ຟຣັງ- ວານເຕີ ສະຕາຍມາຍເອີ ແລະ ຜ່ານພະນະທ່ານປະທານາທິບໍດີ ໄປຍັງ ລັດຖະ ບານ ແລະ ປະຊາຊົນ ເຢຍລະມັນ ທຸກຖ້ວນໜ້າ ແລະ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີທີ່ເປັນມູນເຊື້ອມາແຕ່ດົນນານ ລະ ຫວ່າງ ສປປ ລາວ ແລະ ສສ ເຢຍລະມັນ, ພິເສດໃນປີ 2023 ນີ້ເປັນປີຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ແລະ ຄົບຮອບ 60 ປີ ການຮ່ວມມື ລາວ -ເຢຍລະມັນ. ພ້ອມກັນນັ້ນ, ທ່ານທູດ ໄດ້ຕາງໜ້າໃຫ້ລັດຖະບານສະແດງຄວາມຂອບໃຈຢ່າງສູງ ມາຍັງ ປະຊາຊົນ ແລະ ລັດຖະບານ ເຢຍລະມັນ ທີ່ໄດ້ໃຫ້ການຊ່ວຍເຫຼືອອັນ ລໍ້າຄ່າ ແກ່ ສປປ ລາວ ຕະຫຼອດໄລຍະຜ່ານມາ ເປັນຕົ້ນແມ່ນການພັດທະນາຊົນນະບົດ, ກໍ່ສ້າງໂຄງລ່າງພື້ນຖານ, ອາຊີວະ ສຶກສາ, ອະນຸລັກສິ່ງແວດລ້ອມ, ພັດທະນາເສດຖະກິດແບບຍືນຍົງ ແລະ ສົ່ງເສີມພາກທຸລະ ກິດ-ເອກະຊົນ, ຊຶ່ງການ ຊ່ວຍເຫຼືອຂອງເຢຍລະມັນ ກວມເອົາເກືອບທຸກຂະແໜງການ ລວມມູນຄ່າຫຼາຍກວ່າ 571 ລ້ານເອີໂຣ.
ພ້ອມດຽວກັນນີ້, ທ່ານເອກອັກຄະລັດ ຖະທູດ ໄດ້ອວຍພອນໄຊອັນປະເສີດ ແດ່ພະນະທ່ານ ປະທານາທິບໍດີ ພ້ອມດ້ວຍ ຄອບຄົວ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດທຸກປະການໃນໜ້າທີ່ອັນສູງສົ່ງ ຂອງພະນະທານ ລວມທັງ ປະຊາຊົນເຢຍລະມັນ ທຸກຖ້ວນໜ້າ ຈົ່ງມີຄວາມຈະເລີນ ຮຸ່ງເຮືອງ ກ້າວໜ້າຕະຫລອດໄປ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ