ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເອກອັກຄະລັດຖະທູດລາວ ຢື່ນສານຕາຕັ້ງຕໍ່ “ປະທານາທິບໍດີ ແຫ່ງ ສາທາລະນະລັດ ຕວັກກີ
ໃນວັນທີ 25 ເມສາ 2024, ທີ່ທໍານຽບປະທານາທິບໍດີ ແຫ່ງ ສ. ຕວັກກີ, ນະຄອນຫຼວງອັງກາຣາ, ທ່ານ ລັດສະໝີ ແກ້ວ ມະນີ ໄດ້ຍື່ນສານຕາຕັ້ງຕໍ່ ພະນະທ່ານ Recep Tayyip Erdoğan, ປະທານາທິບໍດີ ແຫ່ງ ສ. ຕວັກກີ ເພື່ອດຳລົງຕຳ ແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ. ຕວັກກີ, ເຊີ່ງມີສໍານັກງານ ຕັ້ງຢູ່ເຊີແນວ, ປະເທດ ສະວິດເຊີແລນ.
ພາຍຫຼັງການຢື່ນສານຕາຕັ້ງ, ທ່ານທູດລາວຄົນໃໝ່ໄດ້ຮັບກຽດພົບປະໂອ້ລົມກັບ ພະນະທ່ານປະທານາທິບໍດີ, ເຊິ່ງທ່ານທູດໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະພອນໄຊອັນປະເສີດຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານ Recep Tayyip Erdoğan ແລະຜ່ານ ພະນະທ່ານ ໄປຍັງລັດຖະບານ ແລະ ປະຊາ ຊົນ ສ.ຕວັກກີ ທຸກຖ້ວນໜ້າ ແລະ ໄດ້ຕີລາສູງຕໍ່ຜົນສໍາເລັດຂອງການພົວພັນຮ່ວມມືສອງຝ່າຍ ລາວ-ຕວັກກີ ຕະຫລອດໄລຍະຫົກທົດສະວັດຜ່ານມາ (1958-2024); ພິເສດ, ໄດ້ສະແດງຄວາມຊົມເຊີຍຕໍ່ບົດບາດອັນສຳຄັນທາງດ້ານການເມືອງ-ຄວາມໝັ້ນຄົງ ແລະການພັດທະນາເສດຖະກິດ-ສັງຄົມຂອງ ສ. ຕວັກກີ ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ແລະປະກອບສ່ວນເຂົ້າໃນການສ້າງສັນຕິພາບ ແລະຄວາມໝັ້ນຄົງຢູ່ພາກພີ້ນ ແລະສາກົນ. ໃນໂອກາດດັ່ງກ່າວ, ທ່ານປະທານາ ທິບໍດີໄດ້ຕີລາຄາສູງ ແລະຊົມເຊີຍຕໍ່ການມາດໍາລົງຕໍາແໜ່ງ ເປັນເອກອັກຄະລັດຖະທູດ ແຫ່ງ ສປປ ລາວ ປະຈໍາ ສ.ຕວັກກີ ແລະອວຍພອນໃຫ້ທ່ານເອກອັກຄະລັດຖະທູດຈົ່ງ ປະສົບຜົນສໍາເລັດໃນການປະຕິບັດໜ້າທີ່ ແນ່ໃສ່ສົ່ງເສີມສາຍພົວພັນຮ່ວມມືສອງຝ່າຍ ລາວ-ຕວັກກີ ໃຫ້ນັບມື້ນັບເພີ່ມທະວີ.
ໃນໂອກາດເຂົ້າຮ່ວມພິທີຍື່ນສານຕາຕັ້ງຄັ້ງນີ້, ທ່ານທູດລາວຄົນໃໝ່ຍັງໄດ້ພົບປະ-ເຮັດວຽກ ກັບທ່ານ ຫົວໜ້າກົມພິທີການທູດ ແລະທ່ານຫົວໜ້າກົມ ອາຊີ-ປາຊີຟິກ, ກະຊວງການ ຕ່າງປະ ເທດ ແລະທ່ານ ກົງສຸນກິດຕິມະສັກ ແຫ່ງ ສປປ ລາວ ປະຈໍາ ສ. ຕວັກກີ, ເຊິ່ງໄດ້ຕີລາຄາສູງຕໍ່ການຜັນຂະຫຍາຍ ການພົວພັນ ຮ່ວມມືສອງຝ່າຍ ລາວ-ຕວັກກີ ໃນໄລຍະຜ່ານມາ ແລະກໍານົດທິດທາງໃນຕໍ່ໜ້າ ໂດຍຈະສຸມໃສ່ບາງຂົງເຂດ ບູລິມະສິດທີ່ທັງ ສອງຝ່າຍມີຄວາມອາດສາມາດ ແລະທ່າແຮງບົ່ມຊ້ອນເຊັ່ນ: ການ ສຶກສາ, ການທ່ອງທ່ຽວ, ການຄ້າ ແລະການລົງທຶນ. ພ້ອມນີ້, ສອງຝ່າຍຈະເພີ່ມທະວີການພົວພັນຮ່ວມມືໃນຂອບຫລາຍຝ່າຍຕື່ມເປັນຕົ້ນ: ອາຊຽນ, ເອເຊັມ (ASEM), ເອຊີດີ (ACD) ແລະອົງການສະຫະປະຊາຊາດ.
ສປປ ລາວ ແລະສ.ຕວັກກີ ສ້າງຕັ້ງສາຍພົວພັນການທູດນໍາກັນໃນວັນທີ 26 ມິຖຸນາ 1958 (ຄົບຮອບ 66 ປີ).
ທີ່ມາ: ກົມການຂ່າວ, ກະຊວງການຕ່າງປະເທດ