ວັນທີ 03 ມິຖຸນາ 2024, ທີ່ນະຄອນຫຼວງ ຮ່າໂນ້ຍ, ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂ່ຳນັບທ່ານ ພົນເອກ ຟານ ວັນຢາງ, ກຳມະການກົມການເມືອງສູນກາງພັກ, ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດ ນາມ.
ທ່ານ ນາງ ຄຳເພົາ ເອີນທະວັນ ໄດ້ນຳເອົາຄຳຢ້ຽມຢາມຖາມຂ່າວອັນອົບອຸ່ນ ແລະ ຄຳອວຍພອນອັນປະເສີດ ຂອງການນຳພັກ, ລັດຖະບານ, ລັດຖະມົນຕີກະຊວງປ້ອງ ກັນປະເທດລາວ ເຖິງການນຳພັກ, ລັດຖະບານ, ທ່ານລັດຖະມົນຕີກະຊວງປ້ອງກັນປະເທດຫວຽດນາມ. ພ້ອມທັງສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງທ່ານ ພົນເອກ ຟານ ວັນຢາງ ແລະ ສະແດງຄວາມຂອບໃຈມາຍັງພັກ, ລັດຖະບານ, ກອງທັບ ແລະ ປະຊາຊົນຫວຽດນາມທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ພັກ, ລັດຖະບານ, ກອງທັບ ແລະ ປະຊາຊົນລາວ ໃນການປະຕິບັດສອງໜ້າທີ່ຍຸດທະສາດທີ່ພັກ, ລັດ ແລະ ປະຊາຊົນມອບໝາຍໃຫ້.
ໃນໄລຍະຜ່ານມາ, ສອງກະຊວງປ້ອງກັນປະເທດຂອງ ລາວ ແລະ ຫວຽດນາມ ໄດ້ພ້ອມກັນຈັດຕັ້ງຜັນຂະຫຍາຍແຜນການຮ່ວມມືປະຈຳປີໄດ້ຮັບຜົນສຳເລັດ ແລະ ປະ ກົດຜົນເປັນຈິງໃນຫຼາຍດ້ານ ຊຶ່ງໃນນັ້ນພົ້ນເດັ່ນແມ່ນ ວຽກງານໂຄສະນາ, ສຶກສາອົບ ຮົມດ້ານການເມືອງແນວຄິດ, ວຽກງານແລກປ່ຽນຂໍ້ມູນຂ່າວສານດ້ານປ້ອງກັນຊາດ, ວຽກງານຄຸ້ມຄອງຊາຍແດນ, ວຽກງານຝຶກຊ້ອມ ແລະ ອື່ນໆ.
ທ່ານລັດຖະມົນຕີກະຊວງປ້ອງກັນປະເທດຫວຽດນາມ ໄດ້ສະແດງຄວາມຊົມ ເຊີຍ ແລະ ເຊື່ອໝັ້ນທ່ານ ນາງ ຄຳເພົາ ເອີນທະວັນ ໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ ປະຈຳ ສສ ຫວຽດນາມ ຊຶ່ງຈະປະຕິບັດໜ້າທີ່ເປັນຂົວຕໍ່ປະ ສານງານກັບພາກສ່ວນຕ່າງຂອງທັງສອງຊາດເພື່ອເສີມຂະຫຍາຍສາຍພົວພັນມິດ ຕະພາບ ລະຫວ່າງສອງປະເທດ ລາວ – ຫວຽດນາມ ໃຫ້ນັບມື້ນັບຂະຫຍາຍຕົວເຂົ້າສູ່ລວງເລິກ ແລະ ລວງກວ້າງ. ພ້ອມນີ້, ທ່ານຍັງໄດ້ຢືນຢັນວ່າ, ສາຍພົວພັນມິດຕະ ພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ເວົ້າລວມ, ເວົ້າສະ ເພາະແມ່ນກະຊວງປ້ອງກັນປະເທດຂອງສອງປະເທດ ໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ, ຮັບປະກັນປົກປັກຮັກສາສັນຕິພາບ ແລະ ຄວາມໝັ້ນຄົງເພື່ອສ້າງເງື່ອນໄຂໃຫ້ແກ່ການພັດທະນາເສດຖະກິດ-ສັງຄົມຂອງແຕ່ລະປະເທດ.
ໃນໂອກາດນີ້, ຖານະເປັນເອກອັກຄະລັດຖະທູດລາວ ປະຈຳ ສສ ຫວຽດນາມ, ທ່ານ ນາງ ຄຳເພົາ ເອີນທະວັນ ໄດ້ໃຫ້ຄຳໝັ້ນສັນຍາວ່າ ຈະປະຕິບັດໜ້າທີ່ສຸດຄວາມສາມາດຂອງຕົນ ໃນການເປັນຂົວຕໍ່ສຳຄັນໃຫ້ແກ່ການຊຸກຍູ້ການຮ່ວມມືຂອງສອງຝ່າຍ ເພື່ອເສີມຂະຫຍາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ນັບແຕກດອກອອກຜົນຍິ່ງໆຂື້ນ.
ຂ່າວ-ພາບ: ສະຖານທູດລາວທີ່ຮ່າໂນ້ຍ.
