ວັນທີ 20 ເມສາ 2021 ທີ່ທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ (BIDV), ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ (BIDV) ຄົບຮອບ 64 ປີ.
ໂອກາດນີ້, ສະຫາຍ ຟານ ດຶກ ຕູ່ ປະທານສະພາບໍລິຫານ ແລະ ສະຫາຍ ເລ ຫງອກ ເລິມ ຜູ້ອໍານວຍການໃຫຍ່ຂອງທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ ກໍໄດ້ແຈ້ງໂດຍຫຍໍ້ ກ່ຽວກັບ ການດຳເນີນທຸລະກິດຂອງທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ (BIDV) ໃນໄລຍະ 64 ປີຜ່ານມາ ລວມທັງການໄປລົງທຶນຢູ່ ສປປ ລາວ.
ຈາກນັ້ນ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດທີ່ດີເດັ່ນຂອງ ທະນາຄານ (BIDV) ໄດ້ປະກອບສ່ວນອັນໃຫຍ່ຫຼວງເຂົ້າໃນພາລະກິດຕໍ່ສູ້ປົດປ່ອຍຊາດ, ພາລະດິດປ່ຽນແປງໃໝ່, ເຊື່ອມໂຍງກັບສາກົນ ແລະ ການພັດທະນາປະເທດຫວຽດນາມ ສາມາດຍາດໄດ້ຜົນສຳເລັດດີເດັ່ນ, ກ້າວຂຶ້ນເປັນທະນາຄານຮຸ້ນສ່ວນໃຫຍ່ທີ່ສຸດຂອງຫວຽດນາມ. ພິເສດທະນາຄານຮຸ້ນສ່ວນລົງທຶນ ແລະ ພັດທະນາຫວຽດນາມ ເປັນທະນາຄານຫວຽດນາມທຳອິດທີ່ເຂົ້າໄປດຳເນີນທຸລະກິດຢູ່ ສປປ ລາວ ເປັນເວລາ 20 ກວ່າປີແລ້ວ ຕາມທິດຊີ້ນໍາຂອງກົມການເມືອງ ກໍຄືລັດຖະບານຫວຽດນາມ ດ້ວຍຮູບການສ້າງຕັ້ງ ທະນາຄານຮ່ວມມື ລາວ – ຫວຽດ (Lao-Viet Bank), ບໍລິສັດປະກັນໄພ ລາວ-ຫວຽດ (LVI) ແລະ ຫ້ອງການຕົວແທນຂອງທະນາຄານ BIDV ຢູ່ ສປປ ລາວ.
ໃນໂອກາດດັ່ງກ່າວ, ສະຫາຍ ແສງເພັດ ຮຸ່ງບຸນຍວງ ໄດ້ຕາງໜ້າພັກ, ລັດ ແລະ ປະຊາຊົນລາວ ສະແດງຄວາມຮູ້ບຸນຄຸນອັນເລິກເຊິ່ງ, ຂອບໃຈຢ່າງຈິງໃຈຕໍ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫລືອຢ່າງໝົດຈິດໝົດໃຈ ແກ່ພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນ. ພິເສດ ໄດ້ສະແດງຄວາມຂອບໃຈຢ່າງຈິງໃຈມາຍັງສະພາບໍລິຫານ, ຄະນະນຳທະນາຄານ BIDV ທີ່ໄດ້ເອົາໃຈໃສ່ຊີ້ນຳ, ນຳພາ ແລະ ວາງທິດທາງຂະຫຍາຍການດຳເນີນທຸລະກິດຂອງທະນາຄານຮ່ວມທຸລະກິດ ລາວ-ຫວຽດ ຊຶ່ງສາມາດຍາດໄດ້ຜົນສຳເລັດຢ່າງຫລວງຫລາຍຕະຫລອດໄລຍະຜ່ານມາ, ໂດຍສະເພາະແມ່ນການປະກອບສ່ວນຊ່ວຍເຫຼືອສັງຄົມ ແລະ ການລຶບລ້າງຄວາມທຸກຍາກຢູ່ ສປປ ລາວ. ພ້ອມກັນນັ້ນ, ເນື່ອງໃນໂອກາດຄົບຮອບ 64 ແຫ່ງການສ້າງຕັ້ງທະນາຄານ BIDV ສະຫາຍ ແສງເພັດ ຮຸງບຸນຍວງ ກໍໄດ້ອວຍພອນໃຫ້ ສະພາບໍລິຫານ, ຄະນະນໍາ ພ້ອມດ້ວຍພະນັກງານທັງໝົດຂອງທະນາຄານ BIDV ສົ່ງມີສຸຂະພາບເຂັ້ມແຂງ, ສືບຕໍ່ຍາດໄດ້ຜົນສໍາເລັດໃໝ່ໃຫຍ່ຫຼວງກວ່າເກົ່າ ໃນການດໍາເນີນທຸລະກິດຂອງຕົນ.
ອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດຖະບານ ແລະ ປະຊາຊົນສອງປະເທດລາວ-ຫວຽດນາມ ຈົ່ງຂຽວສົດງົດງາມ, ໝັ້ນຄົງຄະນົງແກ່ນຊົ່ວກາລະນານ.
ຂ່າວ,ພາບ: ໂອລຳ
Loading...