ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມເຂົ້າຢ້ຽມຂ່ຳນັບ ແລະ ຊົມ ເຊີຍ ສະຫາຍ ຟ້າມ ມິງ ຈິງ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສສ ຫວຽດນາມ

ວັນທີ 10 ມິຖຸນາ 2021 ທີ່ ຫ້ອງວ່າການສຳນັກງານນາຍົກລັດຖະມົນຕີ ແຫ່ງ ສສ ຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂໍ່ານັບ ແລະ ຊົມເຊີຍ ສະຫາຍ ຟ້າມ ມິງ ຈິງ, ກຳມະການກົມການເມືອງສູນກາງພັກ, ນາຍົກ ລັດຖະມົນຕີ ແຫ່ງ ສສ ຫວຽດ ນາມ, ເນື່ອງໃນໂອກາດທີ່ສະຫາຍໄດ້ຮັບຕຳແໜ່ງໃໝ່.
ໂອກາດນີ້, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ກໍໄດ້ນຳເອົາກະຕ່າດອກໄມ້ ເຂົ້າອວຍພອນ ແລະ ສະແດງຄວມຊົມ ເຊີຍຢ່າງຈິງໃຈຕໍ່ສະຫາຍ ຟ້າມ ມິງ ຈິງ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສສ ຫວຽດ ນາມ, ເນື່ອງໃນໂອກາດທີ່ສະຫາຍໄດ້ຮັບການແຕ່ງຕັ້ງເປັນ ນາຍົກລັດຖະມົນຕີ ແຫ່ງ ສສ ຫວຽດນາມ ຄົນໃໝ່ ສິ່ງດັ່ງກ່າວ, ເປັນການສະແດງໃຫ້ເຫັນເຖິງຄວາມໄວ້ເຊື່ອໃຈຂອງພັກ, ລັດ ແລະ ປະຊາຊົນຫວຽດນາມ ທີ່ມີຕໍ່ສະຫາຍ ກໍຄືການຕີລາຄາສູງຕໍ່ການປະກອບສ່ວນຂອງສະຫາຍໃນຕະຫຼອດໄລຍະທີ່ຜ່ານມາ. ພ້ອມທັງຝາກຄໍາຢື້ຢາມຖາມຂ່າວ ແລະ ສະແດງຄວາມຊົມ ເຊີຍຂອງ ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ຕໍ່ສະຫາຍ ແລະ ສົ່ງຄຳອວຍພອນອັນປະເສີດໃຫ້ສະຫາຍຈົ່ງມີພາລະນາໄມສົມບູນ, ມີຄວາມຜາສຸກ ແລະ ປະສົບຜົນ ສຳເລັດໃນໜ້າທີ່ການງານອັນສູງສົ່ງຂອງຕົນ.
ສະຫາຍ ແສງເພັດ ຮຸ່ງບຸນຍວງ ໄດ້ຕີລາ ຄາສູງ ແລະ ສະແດງຄວາມຊົມເຊີຍຕໍ່ຜົນສໍາເລັດອັນຈົບງາມຂອງກອງປະຊຸມໃຫຍ່ຄັ້ງ 13 ຂອງພັກກອມມູນິດຫວຽດນາມ, ຜົນສໍາເລັດຂອງກອງປະຊຸມສະໄໝທີ 11 ຂອງສະພາແຫ່ງຊາດ ຊຸດທີ 14 ແລະ ຜົນສໍາເລັດອັນຈົບງາມໃນການຈັດການເລືອກຕັ້ງຜູ້ແທນສະພາແຫ່ງຊາດ ແລະ ຜູ້ແທນສະພາປະຊາຊົນທ້ອງຖິ່ນຂັ້ນຕ່າງໆ ໄລຍະ 2021-2026, ໄດ້ສະແດງຄວາມເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາອັນສະຫຼາດສ່ອງໃສຂອງພັກກອມ ມູນິດຫວຽດນາມ ແລະ ການບໍລິຫານຂອງຄະນະລັດຖະບານ ນໍາໂດຍສະຫາຍ ພວກສະຫາຍຈະສາມາດຈັດຕັ້ງປະຕິບັດແຜນການພັດທະນາເສດ ຖະກິດ-ສັງຄົມ ໄລຍະ 5 ປີ (2021-2026) ກໍຄື ວິໄສທັດຮອດປີ 2030 ໃນໂອກາດ 100 ປີ ແຫ່ງການສ້າງຕັ້ງພັກກອມມູນິດຫວຽດນາມ ແລະ ວິໄສທັດຮອດປີ 2045 ໃນໂອກາດສະເຫຼີມ ສະຫຼອງຄົບຮອບ 100 ປີ ແຫ່ງວັນສ້າງຕັ້ງປະເທດຫວຽດນາມ ໃຫ້ກາຍເປັນປະເທດທີ່ພັດທະນາ ມີລາຍຮັບສູງ ຢ່າງຈົບງາມ.
ສະຫາຍ ຟ້າມ ມິງ ຈິງ, ກຳມະການການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສສ ຫວຽດ ນາມ ກໍໄດ້ສະແດງຄວາມຂອບໃຈຕໍ່ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມຄະນະ ທີ່ໄດ້ມາອວຍພອນ ພ້ອມທັງຝາກຄວາມຢື້ຢາມຖາມຂ່າວຜ່ານສະຫາຍເອກອັກຄະລັດຖະທູດໄປຍັງ ທ່ານປະທານປະເທດ, ປະທານສະພາແຫ່ງຊາດ ແລະ ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ລວມທັງ ບັນດາທ່ານອະດີດການນໍາຂັ້ນສູງຂອງ ສປປ ລາວ ແລະ ເຊື່ອໝັ້ນວ່າ ສະຫາຍທູດຈະເປັນຂົວຕໍ່ໃນການເພີ່ມພູນຄູນສ້າງ ສາຍພົວພັນມິດຕະພາບອັນ ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ ສອງລັດ ແລະ ປະຊາຊົນສອງຊາດຫວຽດນາມ-ລາວ ໃຫ້ນັບມື້ແໜ້ນແຟ້ນຍິ່ງຂຶ້ນ.
ພ້ອມດຽວກັນນັ້ນ, ສະຫາຍ ຟ້າມ ມິງ ຈິງ ກໍໄດ້ສະແດງຄວາມຊົມເຊີຍຕໍ່ຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ ແລະ ຜົນການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຂອງ ສປປ ລາວ.
ນອກຈາກນັ້ນ, ທັງສອງຝ່າຍກໍໄດ້ສົນທະນາ ແລະ ປຶກສາຫາລື ກ່ຽວກັບ ສະພາບການແຜ່ລະບາດຂອງເຊື້ອພະຍາດໂຄວິດ 19 ຢູ່ທັງສອງປະເທດ, ການພົວພັນຮ່ວມມືທາງດ້ານການລົງທຶນ, ເສດຖະກິດການຄ້າລະຫວ່າງສອງປະເທດ, ວຽກງານປ້ອງກັນຊາດ, ການສຶກສາ, ຄົມມະນາຄົມ, ໂດຍສະເພາະແມ່ນເປັນເອກະພາບກັນຈະຊອກຫາແຫຼ່ງທຶນ ເພື່ອສ້າງທາງດ່ວນ ວຽງຈັນ-ຮ່າໂນ້ຍ, ຊົມເຊີຍການພັດທະນາທ່າເຮືອຫວຸ່ງອ່າງ 1,2,3 ມີຄວາມຄືບໜ້າ ແລະ ເຫັນດີຊອກຫາບັນຫາ ແລະ ສິ່ງກີດຂວາງຕໍ່ການຮ່ວມມືດ້ານເສດຖະກິດການຄ້າທີ່ບໍ່ສາມາດຈັດຕັ້ງປະຕິບັດໄດ້ຕາມແຜນການທີ່ວາງໄວ້ ເພື່ອພ້ອມກັນແກ້ໄຂຈຸດຄົງຄ້າງດັ່ງກ່າວ ລວມທັງ ກະກຽມສະເຫຼີມສະຫຼອງ ສອງວັນປະຫວັດສາດ ແຫ່ງຄວາມສາມັກຄີແບບພິເສດ ແລະ ການຮ່ວມມືຮອບດ້ານຄື: 60 ປີ ແຫ່ງວັນສ້າງຕັ້ງສາຍພົວພັນການທູດລາວ-ຫວຽດນາມ ແລະ 45 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລາວ-ຫວຽດນາມ ໃນປີ 2022.
ໃນໂອກາດນີ້, ສະຫາຍ ແສງເພັດ ຮຸ່ງບຸນຍວງ, ກໍໄດ້ຕາງໜ້າພັກ, ລັດ ແລະ ປະຊາຊົນລາວ ສະແດງຄວາມຄວາມຮູ້ບຸນຄຸນ ແລະ ຂອບໃຈຢ່າງຈິງໃຈມາຍັງພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍໃຫ້ການຊ່ວຍເຫຼືອ, ສະໜັບສະໜູນແກ່ ສປປ ລາວ ຕະຫຼອດມາ ບໍ່ວ່າໃນສະໄໝຕໍ່ສູ້ປົດປ່ອຍປະເທດຊາດ ກໍຄືໃນຍຸກການປະຕິບັດສອງໜ້າທີ່ຍຸດທະສາດເພື່ອປົກປັກຮັກສາ ແລະ ສ້າງສາພັດທະນາປະເທດ. ພິເສດແມ່ນການຊ່ວຍເຫຼືອຢ່າງທັນການທາງດ້ານວັດຖຸເງິນຄໍາ, ຄະນະຊ່ຽວຊານ ແລະ ອຸປະກອນການແພດຂອງ ສສ ຫວຽດນາມ ໃຫ້ແກ່ ສປປ ລາວ ເຮັດໃຫ້ວຽກງານການຕ້ານ ແລະ ສະກັດກັ້ນການລະບາດຂອງເຊື້ອພະຍາດໂຄວິດ-19ຢູ່ ລາວ ມີປະສິດທິພາບ ແລະ ມີທ່າອຽງຜູ້ຕິດເຊື້ອຫຼຸດລົງໃນແຕ່ລະມື້. ສະຫາຍ ຍັງໄດ້ຕີລາຄາສູງ ຕໍ່ການບິແບ່ງໃຫ້ການຊ່ວຍເຫຼືອຄັ້ງນີ້ໄປໃຫ້ ສປປ ລາວ ໃນການຮັບມືກັບພະຍາດໂຄວິດ-19 ເຖິງແມ່ນວ່າຫວຽດນາມກໍພວມປະເຊີນກັບຄວາມຫຍຸ້ງຍາກໃນການຮັບມືກັບການລະບາດຂອງເຊື້ອພະບາດດັ່ງກ່າວ, ສິ່ງດັ່ງກ່າວເປັນການສະແດງໃຫ້ເຫັນເຖິງນໍ້າໃຈຄວາມສາມັກພິເສດລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ພ້ອມທັງໃຫ້ຄໍາໝັ້ນສັນຍາວ່າ ຈະເຮັດສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການເພີ່ມທະວີ ແລະ ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ແຕກດອກອອກຜົນ ແລະ ຈະເລີນງອກງາມຂຶ້ນເລື້ອຍໆໄປ.
ຂ່າວ,ພາບ: ໂອລຳ