ວັນທີ 29 ຕຸລາ 2022, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຕວຽນກວາງ, ໃນໂອ ກາດນີ້, ສະຫາຍ ແສງເພັດ ຮຸ່ງບຸນຍວງ ກໍໄດ້ພົບປະ ແລະ ເຮັດວຽກກັບ ສະຫາຍ ຫງວຽນ ວັນ ເຊີນ, ຮອງເລຂາພັກແຂວງ, ເຈົ້າແຂວງ ທັງເປັນປະທານຄະນະກໍາມະການປະຊາຊົນ ແຂວງຕວຽນກວາງ, ຊຶ່ງໃນການພົບປະຄັ້ງນີ້, ການນໍາແຂວງ ກໍໄດ້ສະ ແດງຄວາມຍິນດີຕ້ອນຮັບ, ຕີລາຄາສູງ ທີ່ ສະຫາຍ ເອກອັກຄະລັດຖະທູດ ພ້ອມຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຕວຽນກວາງມີຂຶ້ນທ່າມ ກາງບັນຍາກາດທີ່ສອງປະເທດພວມຈັດ ຕັ້ງກິດຈະກໍາຕ່າງໆເພື່ອພ້ອມ ກັນສະເຫຼີມສະ ຫຼອງ “ປີສາມັກຄີມິດ ຕະພາບ ລາວ- ຫວຽດນາມ 2022” ເພື່ອຫວນຄືນສອງວັນປະຫວັດສາດທີ່ສຳຄັນ ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ (05/09/ 1962- 05/09/2022) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (18/07/1977-18/07/2022).
ໂອກາດນີ້, ສະຫາຍ ຫງວຽນ ວັນ ເຊີນ, ຮອງເລຂາພັກແຂວງ, ເຈົ້າແຂວງ ຕວຽນກວາງໄດ້ລາຍງານໂດຍຫຍໍ້ກ່ຽວກັບສະ ພາບການພັດທະນາເສດຖະກິດສັງຄົມຂອງແຂວງໃນໄລຍະຜ່ານມາ. ພິເສດແຂວງຕວຽນກວາງເປັນເຂດທີ່ໝັ້ນຂອງການປະຕິວັດຫວຽດນາມ ແລະ ການປະຕິວັດລາວທີ່ການນຳລາວມາເຄື່ອນ ໄຫວ ແລະ ເຮັດວຽກໃນໄລຍະປີ 1950- 1951 ທີ່ເມືອງ ອຽນເຊີນ ຕາແສງ ໝີບັ່ງ, ພ້ອມທັງໄດ້ແຈ້ງໃຫ້ຊາບການ ພົວພັນຮ່ວມມືກັບ ສປປ ລາວ, ໂດຍສະເພາະແຂວງຕວຽນກວາງໄດ້ເຊັນບົດບັນທຶກການແຮກສ່ຽວ ກັບແຂວງຊຽງຂວາງຂອງລາວ ໄລຍະ 2012-2015, ແຕ່ 2016- 2020 ແລະ 2021-2025. ພ້ອມທັງແຈ້ງໃຫ້ຊາບກ່ຽວກັບໂຄງການຊ່ວຍເຫຼຶອຂອງແຂວງຕວຽນກວາງໃຫ້ກັບແຂວງຊຽງຂວາງໃນໄລຍະຜ່ານມາເຊັ່ນ: ການປູກຝັງ, ລ້ຽງສັດຢູ່ແຂວງຊຽງຂວາງເປັນຕົ້ນແມ່ນການລ້ຽງງົວ ແລະ ປູກຊາ ນອກຈາກນັ້ນຍັງໃຫ້ທຶນການສຶກສາ ແຂວງຊຽງຂວາງ ແລະ ແຂວງຜົ້ງສາລີ ຈຳນວນ 11 ຕື້ດົງ. ສະຫາຍເຈົ້າແຂວງຍັງໃຫ້ຄວາມເຊື່ອໝັ້ນວ່າ ໃນໄລຍະທີ່ສະຫາຍເອກອັກຄະລັດ ຖະທູດມາດຳລົງຕຳແໜງຢູ່ ສສ ຫວຽດ ນາມຈະສືບຕໍ່ເປັນຂົວຕໍ່ທີ່ສຳຄັນໃນການປະສານງານລະຫວ່າງສອງປະເທດເວົ້າລວມ, ເວົ້າສະເພາະແມ່ນແຂວງຕວຽນກວາງ ແລະ ແຂວງຊຽງຂວາງ ແລະ ແຂວງຜົ້ງສາລີ.
ສະຫາຍ ແສງເພັດ ຮຸ່ງບຸນຍວງ ກໍໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ເປັນກັນເອງໃນຖານສະຫາຍອ້າຍນ້ອງພ້ອມທັງສະແດງຄວາມຊົມເຊີຍໝາກຜົນການພັດທະນາເສດຖະ ກິດ-ສັງຄົມໃນໄລຍະຜ່ານມາຂອງແຂວງ ຊຶ່ງບັນດາຜົນສຳເລັດດັ່ງກ່າວກໍໄດ້ສະ ແດງໃຫ້ເຫັນເຖິງການ ວາງແນວທາງທີ່ຖືກຕ້ອງ, ຄວາມສາມາດໃນການຊີ້ນຳ- ນຳພາຂອງອົງຄະນະພັກ, ອຳນາດການປົກຄອງ ແລະ ການເປັນຈິດໜຶ່ງໃຈດຽວຂອງປະຊາຊົນແຂວງຕວຽນກວາງ. ພ້ອມທັງຕີລາຄາສູງການພົວພັນ ຮ່ວມມື ລະ ຫວ່າງສອງປະເທດໂດຍສະເພາະແມ່ນປີ 2022 ເປັນປີສາມັກຄີມິດຕະພາບທາງແຂວງໄດ້ເອົາໃຈໃສ່ໃນການຕ້ອນຮັບຄະນະຜູ້ແທນຂັ້ນສູງຂອງລາວມາເຄື່ອນ ໄຫວຢ້ຽມຢາມ ແລະ ເຮັດວຽກຢູ່ແຂວງຕວຽນກວາງ ເປັນຈຳນວນຫຼາຍຄະນະອີກດ້ວຍ, ນອກຈາກນັ້ນຍັງໄດ້ປະສານສົບທົບການຮ່ວມມືກັບບັນດາແຂວງແຮກສ່ຽວເຊັ່ນຊຽງຂວາງ ແລະ ແຂວງຜົ້າສາລີຢ່າງຮອບດ້ານ.
ກ່ອນໜ້ານີ້, ວັນທີ 28 ຕຸລາ 2022 ສະ ຫາຍເອກອັກຄະລັດຖະທູດ ພ້ອມດ້ວຍຄະນະໄດ້ໄປຢ້ຽມຊົມເຂດອະນຸສອນປະຫວັດສາດ, ເປັນເຂດທີ່ໝັ້ນການປະຕິດວັດຂອງປະທານ ສຸພານຸວົງ ແລະ ປະທານໄກສອນ ພົມວິຫານ ແລະ ການນຳຂອງລາວໃນປີ 1950-1951, ຢ້ຽມຊົມເຂດອະນຸສອນແຫ່ງຊາດພິເສດເຕີນຈ່າວ (ເຊີນເຢືອງ) ຢ້ຽມຢາມ ແລະ ຢ້ຽມຊົມເຂດກະສິກຳສ່ວນໝາກຟຸກທີ່ຕາແສງຟຸກນິງ(ອຽນເຊີນ). ພິເສດ, ໃນໂອກາດການເດີນທາງຢ້ຽມຢາມ ແລະ ເຮັດວຽກແຂວງຕວຽນກວາງຄັ້ງນີ້ ສະຫາຍ ແສງເພັດ ຮຸ່ງບຸນຍວງ ຍັງໄດ້ລົງໄປພົບປະ, ເຮັດວຽກກັບຄະນະອຳນວຍຄວາມ ມະ ຫາວິທະຍາໄລເຕີນຈ່າວ ເພື່ອສະແດງຄວາມຂອບໃຈ ໃນການເອົາໃສ່ເບິ່ງແຍງດູແລ ແລະ ຕີລາຄາສູງການ ປະກອບສ່ວນ ຢ່າງຕັ້ງໜ້າ ໃນການກໍ່ສ້າງ ຊັບພະ ຍາກອນມະນຸດໃຫ້ແກ່ ສປປ ລາວ ເວົ້າລວມ, ເວົ້າສະເພາະແມ່ນ ການກໍ່ສ້າງຊັບພະຍາກອນ ມະນຸດໃຫ້ແກ່ແຂວງຊຽງຂວາງ ແລະ ແຂວງຜົ້ງສາລີ ພ້ອມທັງສືບຕໍ່ໃຫ້ເນັ້ນໜັກການກໍ່ສ້າງ ຊັບພະ ຍາກອນມະນຸດທີ່ມີຄຸນນະພາບສູງກວ່າເກົ່າ ແລະ ໂອ້ລົມນັກສຶກສາລາວທີ່ກຳລັງສຶກສາຮໍ່າຮຽນ ຢູ່ໂຮງ ມະຫາວິທະຍາໄລແຫ່ງນັ້ນ.
ຂ່າວ,ພາບ: ສະຖານທູດລາວທີ່ຮ່າໂນ້ຍ