ໃນວັນ​ທີ 28 ກັນຍາ 2021 ທີ່ ກອງ​ເລ​ຂາ​ອາ​ຊຽນ, ນະຄອນຫຼວງຈາກາກຕາ, ປະເທດອິນໂດເນເຊຍ,             ທ່ານ ບໍວອນທັດ ດວງຈັກ ໄດ້​ຍື່ນ​ສານ​ແຕ່ງ​ຕັ້ງ​ຕໍ່ ທ່ານ ດາ​ໂຕະ ລິມ ຈ໋ອກ ຮອຍ, ເລ​ຂາ​ທິ​ການ​ໃຫຍ່​ອ​າ​ຊຽນ ​ ເພື່ອດຳລົງຕຳແໜ່ງ​ເປັນ​ເອກ​ອັກ​ຄະ​ລັດ​ຖະ​ທູດ, ຜູ້​ຕາງ​ໜ້າ​ຖາ​ວອນ ແຫ່ງ ​ສ​ປ​ປ ລາວ ປະ​ຈຳ​ ອາ​ຊຽນ. ໃນ​ໂອ​ກາດ​ນີ້, ທ່ານ ດາໂຕະ ລິມ ຈ໋ອກ ຮອຍ ໄດ້ສະແດງຄວາມຍິນດີຮັບຕ້ອນ ແລະ ສະແດງຄວາມຊົມເຊີຍ ທ່ານ ບໍວອນທັດ ດວງຈັກ ທີ່ໄດ້ຖືກ ແຕ່ງຕັ້ງເປັນ​ເອກ​ອັກ​ຄະ​ລັດ​ຖະ​ທູດ, ຜູ້​ຕາງ​ໜ້າ​ຖາ​ວອນ ແຫ່ງ ​ສ​ປ​ປ ລາວ ຄົນໃໝ່ ປະ​ຈຳ​ ອາ​ຊຽນ ແລະ ເຊື່ອໝັ້ນວ່າ ຈະສືບຕໍ່ປະຕິບັດໜ້າທີ່ຂອງຄະນະກໍາມະການຜູ້ຕາງໜ້າຖາວອນ ປະຈໍາອາຊຽນ ໄດ້ຮັບຜົນສໍາເລັດ ແລະ ເສີມຂະຫຍາຍ ບົດບາດຂອງອາຊຽນ ໃນເວທີສາກົນ. ສຸດທ້າຍ ທ່ານ ດາໂຕະ ຍັງໄດ້ຝາກຄວາມຢື້ຢາມຖາມຂ່າວ ແລະ ພອນໄຊອັນປະເສີດມາຍັງພະນະທ່ານປະທານປະເທດ ແລະ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.

ທ່ານເອ​ກ​ອັກ​ຄະ​ລັດ​ຖະ​ທູດ ໄດ້​ນຳ​ເອົາ​ຄວາມ​ຢື້​ຢາມ​ຖາມ​ຂ່າວ​ອັນ​ອົບ​ອຸ່ນ​ຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ແລະ ຈາກ ທ່ານ ສະເຫຼີມໄຊ ກົມມະສິດ, ລັດ​ຖະ​ມົນ​ຕີກະ​ຊວງ​ການ​ຕ່າງ​ປະ​ເທດ ແຫ່ງ ສ​ປ​ປ ລາວ ມາຍັງ ທ່ານເລ​ຂ​າ​ທິ​ການ​ໃຫຍ່​ອາ​ຊຽນ. ພ້ອມດຽວກັນນັ້ນ, ກໍຍັງ​ໄດ້​ຕີ​ລາ​ຄາ​ສູງຕໍ່ບົດບາດຂອງອາຊຽນ ໃນຖານະເປັນອົງການ ລະຫວ່າງ ລັດຖະບານ ທີ່ມີຄວາມເຂັ້ມແຂງ ແລະ ມີເປົ້າໝາຍໃນການຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອຄວາມສົມບູນພູນສຸກ, ການເຊື່ອມໂຍງເສດຖະກິດຂອງພາກພື້ນ ແລະ ສາກົນ, ການຮັດແຄບຄວາມແຕກໂຕນດ້ານການພັດທະນາ ເຊິ່ງໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ປັບປຸງສະພາບຊີວິດການເປັນຢູ່ຂອງປະຊາຊົນ ຂອງບັນດາປະເທດສະມາຊິກອາຊຽນ.

ສຸດທ້າຍ, ທ່ານເອກອັກຄະລັດຖະທູດ ຍັງໄດ້ແຈ້ງຄວາມໝາຍໝັ້ນຂອງ ສປປ ລາວ ຕໍ່ການສົ່ງເສີມການຮ່ວມມືພາຍໃນອາຊຽນ, ແລະ ລະຫວ່າງ ອາຊຽນ ກັບຄູ່ຮ່ວມມືພາຍນອກ ໂດຍສະເພາະການປະຕິບັດໜ້າທີ່ຂອງ ສປປ ລາວ ໃນການເປັນປະເທດປະສານງານການພົວພັນຮ່ວມມືອາຊຽນ-ອົດສະຕຣາລີ ສໍາລັບປີ 2021-2024 ແລະ ປະເທດປະສານງານຂອງການພົວພັນຮ່ວມມືອາຊຽນ-ກຸ່ມພັນທະມິດປາຊີຟິກ ສໍໍາລັບປີ 2021. ທ່ານເອກອັກຄະລັດຖະທູດ ຍັງສະແເດງຄວາມກຽມພ້ອມຂອງຕົນ ໃນການຮັບໜ້າທີ່ເປັນປະທານຄະນະກຳມະການຜູ້ຕາງໜ້າຖາວອນ ປະຈຳ ອາຊຽນ ທີ່ ຈາກາກຕາ ໃນໂອກາດທີ່  ສປປ ລາວ ຈະຮັບໜ້າທີ່ເປັນປະທານອາຊຽນ ໃນປີ 2024 ແລະ ສະແດງຄວາມຫວັງວ່າ ກອງເລຂາອາຊຽນ ຈະສືບຕໍ່ສະໜັບສະໜູນ ສປປ ລາວ ໃນການປະຕິບັດໜ້າທີ່ດັ່ງກ່າວ.

Loading...