ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ ໄດ້ເຂົ້າຢ້ຽມຂ່ຳນັບ ສະຫາຍຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ຫວຽດນາມ

ໃນວັນທີ 25 ພະຈິກ 2019, ທີ່ກະຊວງການຕ່າງປະເທດ ຫວຽດນາມ, ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມໄດ້ເຂົ້າ​ຢ້ຽມ​​ຂ່ຳນັບ​ ທ່ານ ຟ໋າມບິ່ງມິງ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ.

ໃນການຕ້ອນຮັບ ສະຫາຍ ຟ໋າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ໄດ້ສະແດງຄວາມພາກພູມໃຈ ແລະ ຕີລາຄາສູງຕໍ່ທ່ານທູດທີ່ໄດ້ຮັບການແຕ່ງຕັ້ງໃຫ້ດໍາລົງຕໍາແໜ່ງເປັນ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ, ແລະ ຫວັງຢ່າງຍີ່ງວ່າ ສະຫາຍຈະປະກອບສ່ວນ​ຢ່າງ​ຕັ້ງໜ້າ ໃນນາມ​ເປັນ​ຂົວ​ຕໍ່ໃຫ້​ແກ່​ການ​ພົວພັນ​ຮ່ວມ​ມື​ໃນ​ຫຼາຍ​ດ້ານ, ປະກອບ​ສ່ວນ​ສໍາ​ຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ອັນ​ຍິ່ງ​ໃຫຍ່, ຄວາມ​ສາມັກຄີ​ພິເສດ ​ແລະ​ ການ​ຮ່ວມ​ມື​ຮອບດ້ານ​ລະຫວ່າງສອງ​ປະເທດ.

ໂອກາດນີ້,  ສະຫາຍ ແສງເພັດ ຮຸ່ງບຸນຍວງ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ, ​ໄດ້​ສະ​ແດງ​ຄວາມ​ຂອບ​ອົກ​ຂອບ​ໃຈ​ມາ​ຍັງ ສະຫາຍ ຟ໋າມບິ່ງມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມ ຕໍ່ການຮ່ວມມື ແລະ ສະໜັບສະໜຸນຊ່ວຍເຫຼືອໃນໄລຍະຜ່ານມາ  ພ້ອມທັງໄດ້ສະແດງຄວາມມຸ່ງຫວັງວ່າ ຈະພະຍາຍາມເຮັດສຸດຄວາມສາມາດຂອງຕົນ ເພື່ອປະກອບ ສ່ວນເຂົ້າໃນການຊຸກຍູ້​ສົ່ງ​ເສີມ​ການ​ພົວພັນ​ທີ່​ຍິ່ງ​ໃຫຍ່​ຄວາມ​ສາມັກຄີ​ພິ​ເສດ ​ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວຫວຽດນາມໃຫ້ນັບມື້ແຕກດອກອອກຜົນຈະເລີນຫງອກງາມຂື້ນເລື້ອຍໆໄປ ແລະ ຍັງໄດ້ລາຍງານຕໍ່ທ່ານຮອງນາຍົກກຽວກັບຄະນະຜູ້ແທນຂັ້ນສູງຂອງພັກ-ລັດລາວທີ່ຈະເດີນທາງມາຢ້ຽມຢາມ ແລະ ເຮັດວຽກຢູ່ ສສຫວຽດນາມໃນທ້າຍປີນີ້ ​ແລະ ຕົ້ນ​ປີໜ້າ.

ທ່ານ ຟ໋າມບິ່ງມິງ ໄດ້ສະແດງຄວາມຂອບອົກຂອບໃຈມາຍັງສະຫາຍທູດ ແລະ ຍັງໄດ້ແຈ້ງໃຫ້ຮູ້ວ່າ ທ້າຍປີນີ້ກໍ່ຈະມີການພົບປະລະຫວ່າງສອງລັດຖະມົນຕີກະຊວງການຕ່າງປະເທດ  ແລະ ຍັງໄດ້ເນັ້ນຕື່ມວ່າ ປີ  2020 ຫວຽດນາມ ຈະມີຫຼາຍເຫດການທີ່ສຳຄັນສອງກະຊວງການຕ່າງປະເທດຈະຕ້ອງໄດ້ປະສານສົມທົບກັນຢ່າງແໜ້ນແຟ້ນເພື່ອກະກຽມໃຫ້ແກ່ການນຳຂັ້ນສູງມາເຄື່ອນໄຫວຢູ່ຫວຽດນາມໃນໄລຍະຫວຽດນາມເປັນປະທານ ອາຊຽນ  ແລະ ເປັນ ສະມາຊິກບໍ່ຖາວອນຂອງສະພາຄວາມໝັ້ນຄົງ ຂອງສະຫະປະຊາຊາດປີ 2020-2021.

ສະຫາຍ ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ,  ແສງເພັດ ຮຸ່ງບຸນຍວງ  ອວຍພອນໃຫ້ ສະຫາຍຮອງນາຍົກລັດຖະມົນຕີ ຟ໋າມບິ່ງມິງ  ພ້ອມທັງການນຳຂັ້ນສູງຂອງຫວຽດນາມ ຈົ່ງສືບຕໍ່ຍາດເອົາຜົນສຳເລັດໃໝ່ໃຫຍ່ຫຼວງກວ່າເກົ່າໃນການເປັນປະທານອາຊຽນ ໃນປີ 2020 ແລະ ເປັນ ສະມາຊິກບໍ່ຖາວອນຂອງສະພາຄວາມໝັ້ນຄົງ ຂອງສະຫະປະຊາຊາດປີ 2020-2021.