ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ ເຂົ້າຢ້ຽມຂ່ຳນັບ ເລຂາຄະນະພັກນະຄອນຫຼວງຮ່າໂນ້ຍ

ໃນວັນທີ 18 ມິຖຸນາ 2020, ທີ່ ຫ້ອງ​ວ່າການ​ຄະນະ​ພັກນະຄອນຫຼວງ​ຮ່າ​ໂນ້ຍ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນ​ຜູ້​ມີ​ອຳນາດ​ເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ​ເວື​ອງດິ່ງ​ເຫ​ວ່, ກຳມະການ​ກົມ​ການ​ເມືອງ​ສູນ​ກາງ​ພັກ, ​ເລຂາ​ຄະນະ​ພັກ​ ນະຄອນຫຼວງ​ຮ່າ​ໂນ້ຍ ເນື່ອງໃນໂອກາດດຳລົງຕໍ່າແໜ່ງເປັນເອກະອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.

ກ່າວ​ຕ້ອນຮັບ, ສະຫາຍ ​ເວື​ອງດິ່ງ​ເຫ​ວ່ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງ ຕໍ່​ການ​ມາ​ດຳລົງ​ຕຳ​ແໜ່​ງ​ເປັນເອກອັກຄະລັດຖະທູດຂອງ​ ທ່ານ ແສງເພັດ ຮຸ່ງບຸນຍວງ ​ແລະ ​ໄດ້​ລາຍ​ງານ​ຫຍໍ້​ກ່ຽວ​ກັບ​ສະພາບ​ການ​ເມືອງ, ​ເສດຖະກິດ, ສັງຄົມ ​ຂອງ​ນະຄອນຫຼວງ​ຮ່າ​ໂນ້ຍ ​​ໂດຍຍົກ​ໃຫ້​ເຫັນ​​ບັນດາ​ຜົນສຳ​ເລັດ​ແລະ​ໄຊຊະນະ​ທີ່​ຍາດ​ມາ​ໄດ້​ທີ່​ຜ່ານ​ມາ​ອັນ​ພົ້ນ​ເດັ່ນ​ແມ່ນ​ໃນແຕ່ລະ​ປີນະຄອນຫຼວງຮ່າໂນ້ຍ​ໄດ້ປະກອບ ສ່ວນ 18% ເຂົ້າງົບປະມານແຫ່ງລັດ ປະມານ16% ຂອງ GDP, ​ໃນ​ນັ້ນລາຍ​ຮັບຂອງຮ່າໂນ້ຍປະມານ 45 ຕື້​ໂດ​ລາສະຫະລັດ,  ລາຍໄດ້ສະເລ່ຍຕໍ່ຫົວຄົນແມ່ນ 5,200 ​ໂດ​ລາ​ສະຫະລັດ. ​ໃນ​ໄລຍະ​ລະບາດ​ພະຍາດ​ໂຄ​ວິດ-19, ​ເຖິງ​ຈະ​ໄດ​ຮັບ​ຜົນ​ກະທົບ​ໜັກໜ່ວງ​ແຕ່​ຈັງຫວະ​ເຕີບ​ໂຕ GDP ກໍ່​ບັນລຸ​ໄດ້ 3,4% ​ແລະ ພວມ​ສູ້​ຊົນ​ໃຫ້​ກວມ 1/3 GDP ຂອງ​ທົ່ວ​ປະ​ເທດ ​ແລະ ​ໃຫ້​ບັນລຸ​ຄາດໝາຍ​ເກັບ​ລາຍ​ຮັບ​ງົບປະມານ​ໃຫ້​ໄດ້ 280 ຕື້​ດົງ (14 ຕື້​ໂດ​ລາ​ສະຫະລັດ).

ສະຫາຍ​ເລຂາ​ຄະນະ​ພັກ​ນະຄອນຫຼວງ​ຮ່າ​ໂນ້ຍ ພ້ອມ​ແລ້ວ ຈະອໍານວຍຄວາມສະດວກໃຫ້ ສະຫາຍເອກອັກຄະລັດຖະທູດ ແຫ່ງ ສປປ ລາວ ເປັນຢ່າງດີໃນໄລຍະທີ່ມາດຳລົງຕໍ່າແໜ່ງ ແລະ ປະຕິບັດໜ້າທີ່ຢູ່ ສສ ຫວຽດນາມ ເພື່ອເປັນຂົວຕໍ່ໃຫ້ແກ່ການ​ເພີ່ມ​ທະວີ​ສາຍພົວພັນມິດຕະພາບອັນ​ຍິ່ງ​ໃຫຍ່​ຄວາມ​ສາມັກຄີ​ພິ​ເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດ ຫວຽດນາມ-ລາວ, ລາວ-ຫວຽດນາມ,  ພິ​ເສດ​ແມ່ນ​ນະຄອນຫຼວງ​ຮ່າ​ໂນ້ຍ ກັບ ​ນະຄອນຫຼວງ​ວຽງ​ຈັນ ໃຫ້ນັບມື້ແຕກດອກອອກຜົນຍິ່ງໆ​ຂຶ້ນ.

ພ້ອມ​ດຽວ​ກັນ​ນັ້ນ ສະຫາຍ ​ເວື​ອງດິ່ງ​ເຫ​ວ່ ຍັງ​ໄດ້​ຕີ​ລາຄາ​ສູງ ​ແລະ ຊົມ​ເຊີຍທີ່​ລັດຖະບານ​ລາວ ​ໄດ້​ມີມາດຕະການ​ເຂັ້ມ​ງວດປ້ອງ​ກັນແກ້ໄຂຄວບຄຸມພະຍາດ​ລະບາດ​ໂຄ​ວິດ-19, ໂດຍ​ການ​ຮ່ວມ​ແຮງ​ຮ່ວມ​ໃຈ​ ​ທັງ​ຢູ່ສູນ​ກາງ ​ແລະ ທ້ອງ​ຖິ່ນ​ ​ແລະ ປະຊາຊົນໃນ​ຂອບ​ເຂດ​ທົ່ວ​ປະ​ເທດ ​ແລະ ບັນລຸໄດ້ຜົນສຳ​ເລັດ​ອັນ​ຈົບງາມ.

​ໃນ​ໂອກາດ​ນີ້​ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນ​ຜູ້​ມີ​ອຳນາດ​ເຕັມແຫ່ງ ສປປ ລາວ ປະຈຳ ສສ ຫວຽດນາມ ​ກໍ່ໄດ້ກ່າວສະແດງຄວາມຊົມ​ເຊີຍ ​ແລະ ຕີ​ລາຄາ​ສູງ​ຕໍ່​ຜົນງານ​ອັນ​ໃຫຍ່​ຫຼວງ, ຮອບດ້ານ, ​ເລິກ​ເຊິ່ງທີ່​ນະຄອນຫຼວງ​ຮ່າ​ໂນ້ຍຍາດ​ມາ​ໄດ້, ຂອບໃຈມາຍັງການ​ນຳພັກ​, ລັດ ​ແລະ ປະຊາຊົນ​ຫວຽດນາມ​ທີ່ຍາມ​ໃດ​ກໍ່​ໄດ້​​ໃຫ້ການຊ່ວຍ​ເຫຼືອ​ພາລະກິດ​ປະຕິ​ວັດ​ຂອງປະຊາຊົນລາວ ​ຕະຫຼອດ​ມາ, ​ຊຶ່ງ​ໃນ​ນັ້ນ​ກໍ່​ຄື​ການ​ປະກອບສ່ວນ​ຢ່າງ​ໃຫຍ່​ຫຼວງ​ຂອງ​ນະຄອນຫຼວງ​ຮ່າ​ໂນ້ຍ ​ນັບ​ແຕ່​ສະ​ໄໝ​ຕໍ່ສູ້​ກູ້​ຊາດ​ມາ​ຮອດ​ປະຈຸ​ບັນ ​ແລະ ຈະພະຍາຍາມສຸດຄວາມສາມາດຂອງຕົນ​ເພື່ອ​ປະກອບສ່ວນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ກາ​ນຮ່ວມ​ມື​ຮອບດ້ານ​  ລະຫວ່າງ ສອງພັກ,  ສອງລັດ ແລະ ປະຊາຊົນຂອງສອງປະເທດ ລາວ-ຫວຽດນາມ, ຫວຽດນາມ-ລາວ, ພິ​ເສດ​ແມ່ນ​ສອງນະຄອນຫຼວງ​ວຽງ​ຈັນກັບນະຄອນຫຼວງ​ຮ່າ​ໂນ້ຍ.

ຂ່າວ: ກົມການຂ່າວ, ກະຊວງການຕ່າງປະເທດລາວ.