ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສສ. ຫວຽດນາມ ເຂົ້າຢ້ຽມຂ່ຳນັບຫົວໜ້າຄະນະຂົນຂວາຍປະຊາຊົນ ສູນກາງພັກຄອມມູນິດຫວຽດນາມ

ວັນທີ 25 ມິຖຸນາ 2020, ທີ່ສຳນັກງານ​ສູນ​ກາງ​ພັກ​ຄອມ​ມູນ​ນິດ​ຫວຽດນາມ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນ​ຜູ້​ມີ​ອຳນາດ​ເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ​ນາງ ​ເຈືອງ​ທິມາຍ, ກຳມະການ​ກົມ​ການ​ເມືອງ​ສູນ​ກາງ​ພັກ, ​ເລຂາ​ທິການ​ສູນ​ການ​ພັກ, ຫົວໜ້າ​ຄະນະ​ຂົນຂວາຍ​ປະຊາຊົນ ສູນ​ກາງ​ພັກ​ຄອມ​ມູນິດ​ຫວຽດນາມ ເນື່ອງໃນໂອກາດດໍາລົງຕໍ່າແໜ່ງເປັນເອກະອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.

​​ໃນ​ການ​ຕ້ອນຮັບ, ສະຫາຍນາງ ​ເຈືອງ​ທິມາຍ, ກຳມະການ​ກົມ​ການ​ເມືອງ​ສູນ​ກາງ​ພັກ, ​ເລຂາ​ທິການ​ສູນ​ການ​ພັກ, ຫົວໜ້າ​ຄະນະ​ຂົນຂວາຍ​ປະຊາຊົນ ສູນ​ກາງ​ພັກ​ຄອມ​ມູນິດ​ຫວຽດນາມ ໄດ້ກ່າວສະແດງຄວາມຊົມເຊີຍ ແລະ ຕີລາຄາສູງ ຕໍ່​ການ​ມາ​ດຳລົງ​ຕຳ​ແໜ່​ງ​ເປັນເອກອັກຄະລັດຖະທູດຂອງ​ ສະຫາຍ ແສງເພັດ ຮຸ່ງບຸນຍວງ ພ້ອມ​ທັງ​ເຊື່ອ​ໝັ້ນ​ວ່າສະຫາຍ ຈະ​ປະສົບ​ຜົນສຳ​ເລັດ​ຢ່າງ​ຈົບງາມ​ໃນ​ການປະຕິບັດໜ້າທີ່ຢູ່ ສສ ຫວຽດນາມ ເພື່ອເປັນຂົວຕໍ່ໃຫ້ແກ່ການ​ເພີ່ມ​ທະວີ​ສາຍພົວພັນມິດຕະພາບອັນ​ຍິ່ງ​ໃຫຍ່​ຄວາມ​ສາມັກຄີ​ພິ​ເສດ ແລະ ການຮ່ວມມືຮອບດ້ານລະຫວ່າງ ສອງພັກ,  ສອງລັດ ແລະ ປະຊາຊົນຂອງສອງປະເທດຫວຽດນາມ – ລາວ, ລາວ – ຫວຽດນາມ. ​​ໂດຍ​ສະ​ເພາະ​ແມ່ນລະຫວ່າງຄະນະ​ຂົນຂວາຍ​ປະຊາຊົນ ສູນ​ກາງ​ພັກ​ຄອມ​ມູນິດ​ຫວຽດນາມ ​ແລະ ສູນ​ກາງ​ແນວ​ລາວ​ສ້າງ​ຊາດ​ໃຫ້​ນັບ​ມື້​ແໜ້ນ​ແຟ້ນຍີ່​ງໆ​ຂຶ້ນ.

​ ​ໃນ​ໂອກາດ​ນີ້​ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນ​ຜູ້​ມີ​ອຳນາດ​ເຕັມແຫ່ງ ສປປ ລາວ ປະຈຳ ສສ ຫວຽດນາມ, ​ໄດ້ກ່າວສະແດງຄວາມຊົມ​ເຊີຍ, ຕີ​ລາຄາ​ສູງ​ຕໍ່​ຜົນງານ​ອັນ​ໃຫຍ່​ຫຼວງ, ຮອບດ້ານ, ​ເລິກ​ເຊິ່ງທີ່​​ຄະນະ​ຂົນຂວາຍ​ປະຊາຊົນ ສູນ​ກາງ​ພັກ​ຄອມ​ມູນິດ​ຫວຽດນາມ ຍາດ​ມາ​ໄດ້​ໃນ​ໄລຍະ​ຜ່ານ​ມາ​ໂດຍ​ສະ​ເພາະ​ການ​ປະກອບສ່ວນ​ເຂົ້າ​ໃນ​ບັ້ນ​ຕ້ານ ​ແລະ ສະກັດ​ກັ້ນ​ພະຍາດ​ໂຄ​ວິດ-19 ປະສົບ​ຜົນສຳ​ເລັດ​ຢ່າງ​ໃຫຍ່​ຫຼວງ, ພ້ອມ​ກັນ​ນີ້​ກໍ​ໄດ້​ສະ​ແດງ​ຄວາ​ມ ຂອບໃຈມາຍັງການ​ນຳພັກ​, ລັດ ​ແລະ ປະຊາຊົນ​ຫວຽດນາມ​ທີ່ຍາມ​ໃດ​ກໍ່​ໄດ້​​ໃຫ້ການຊ່ວຍ​ເຫຼືອ​ພາລະກິດ​ປະຕິ​ວັດ​ຂອງປະຊາຊົນລາວ​ຕະຫຼອດ​ມາ​​​, ພິ​ເສດ ​​ແມ່ນ​ການ​ຊ່ວຍ​ເຫຼືອ​ວັດຖຸ, ອຸປະກອນ​ການ​ແພດ ​ແລະ ຊ່ຽວຊານໃນ​ການ​ປ້ອງ​ກັນ​ພະຍາດ​ລະບາດ​ໂຄ​ວິດ-19​ ຢູ່​ສປປ ລາວ, ພ້ອມດຽວ​ກັນ​​ນັ້ນ​ສະຫາຍ ແສງເພັດ ຮຸ່ງບຸນຍວງຢືນຢັນ​ວ່າ ຈະພະຍາຍາມສຸດຄວາມສາມາດຂອງຕົນ, ​ເພື່ອ​ປະກອບສ່ວນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ກາ​ນ ຮ່ວມ​ມື​ຮອບດ້ານ​  ລະຫວ່າງ ສອງພັກ,  ສອງລັດ ແລະ ປະຊາຊົນຂອງສອງປະເທດ ລາວ – ຫວຽດນາມ, ຫວຽດນາມ – ລາວໃຫ້ນັບມື້ຈະ​ເລີ​ນຫງອກ​ງາມ​ຕະຫຼອດ​ໄປ.