ເອກອັກຄະລັດຖະທູດ ສປປ ລາວ ຍື່ນສານຕາຕັ້ງໄປຍັງ ສະຫາຍປະທານກິດຈະການແຫ່ງລັດ ສປປ ເກົາຫຼີ

ໃນຕອນບ່າຍຂອງວັນທີ 22 ສິງຫາ 2024 ທີ່ ນະຄອນຫຼວງພຽງຢາງ ສະຫາຍ ແກ້ວ ມັກຄະຜົນ ໄດ້ເຂົ້າຍື່ນສານຕາຕັ້ງ ໂດຍຜ່ານ ສະຫາຍ ແຈ ຣອງ ແຮ ປະທານຄະນະກຳມະການປະຈໍາສະພາປະຊາຊົນສູງສຸດ ແຫ່ງ ສາທາລະນະລັດ ປະຊາຊົນ ປະຊາທິປະ ໄຕ ເກົາຫລີ ໄປຍັງ ສະຫາຍ ກິມ ເຈິງ ອຸນ ເລຂາທິການໃຫ່ຍພັກແຮງງານເກົາ ຫຼີ ປະ ທານກິດຈະການແຫ່ງລັດ ສປປ ເກົາຫຼີ ເພື່ອດຳລົງຕໍາແໜ່ງເປັນ ເອກອັກຄະລັດຖະ ທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສາທາລະນະລັດ ປະຊາຊົນ ປະຊາທິປະໄຕ ເກົາຫຼີ.

ໃນໂອກາດດັ່ງກ່າວ ສະຫາຍ ແກ້ວ ມັກຄະຜົນ ໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນພ້ອມດ້ວຍຄໍາອວຍພອນໄຊອັນປະເສີດຂອງ ສະຫາຍ ທອງລຸນ ສີສຸລິດ ເລຂາທິການໃຫ່ຍຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໂດຍຜ່ານ ສະຫາຍ ແຈ ຣອງ ແຮ ປະທານຄະນະກຳມະການປະຈໍາສະພາປະຊາຊົນສູງສຸດ ສປປ ເກົາຫຼີ ໄປຍັງ ສະ ຫາຍ ກິມ ເຈິງ ອຸນ ເລຂາທິການໃຫ່ຍພັກແຮງງານເກົາຫລີ ປະທານກິດຈະການແຫ່ງລັດ ຜູ້ບັນຊາການສູງສຸດກຳລັງປະກອບອາວຸດ ສປປ ເກົາຫຼີ ແລະ ປະຊາຊົນ ສປປ ເກົາຫຼີ ອ້າຍນ້ອງທຸກຖ້ວນໜ້າ.

ສະຫາຍ ແຈ ຣອງ ແຮ ໄດ້ສະແດງຄວາມຊົມເຊີຍຕໍ່ ສະຫາຍ ແກ້ວ ມັກຄະຜົນ ທີ່ໄດ້ຖືກແຕ່ງຕັ້ງໃຫ້ມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງ ສາທາລະ ນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈໍາ ສາທາລະນະລັດ ປະຊາຊົນ ປະຊາທິປະ ໄຕ ເກົາຫຼີ ເພື່ອປະຕິບັດໜ້າທີ່ອັນຊົງກຽດ ແລະ ສູງສົ່ງ ພ້ອມທັງອວຍພອນໃຫ້ ສະ ຫາຍ ເອກອັກຄະລັດຖະທູດ ຈົ່ງປະສົບຜົນສຳເລັດ ໃນການເຄື່ອນໄຫວວຽກ ງານການ ທູດຂອງຕົນ.

ພ້ອມດຽວກັນນີ້ ສະຫາຍ ແຈ ຣອງ ແຮ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ສະຫາຍ ກິມ ເຈິງ ອຸນ ເລຂາທິການໃຫ່ຍພັກແຮງ ງານເກົາຫຼີ ປະທານກິດຈະການແຫ່ງລັດ ຜູ້ບັນຊາການສູງສຸດກຳລັງປະກອບອາວຸດ ສປປ ເກົາຫຼີ ແລະ ປະຊາຊົນ ສປປ ເກົາຫຼີ ໂດຍຜ່ານ ສະຫາຍ ເອກອັກຄະລັດຖະທູດ ໄປຍັງ ສະຫາຍ ທອງລຸນ ສີສຸລິດ ເລຂາທິການໃຫ່ຍ ຄະນະບໍລິຫານງານສູນກາງພັກປະຊາຊົນ ປະຕິວັດລາ ປະທານປະເທດ ແຫ່ງ ສາທາ ລະນະລັດ ປະຊາທິ ປະໄຕ ປະຊາ ຊົນລາວ ແລະ ປະຊາຊົນລາວ ທຸກທົ່ວໜ້າ ໃນໂອກາດນີ້ດ້ວຍ.

ໃນໂອກາດຍື່ນສານຕາຕັ້ງດັ່ງກ່າວ ສະຫາຍ ແກ້ວ ມັກຄະຜົນ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສປປ ເກົາ ຫຼີ ເຊິ່ງແມ່ນການພົວພັນຮ່ວມມືທີ່ມີມູນເຊື້ອມາແຕ່ດົນນານ ທີ່ໄດ້ຮັບການກໍ່ຕັ້ງຂຶ້ນໂດຍ ສະຫາຍ ປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປະຊາຊົນລາວ ແລະ ສະຫາຍ ປະທານ ກິມ ອິນ ຊຸງ ຜູ້ນໍາທີ່ຍິ່ງໃຫ່ຍຂອງປະຊາຊົນ ສປປ ເກົາ ຫລີ ແລະ ສືບທອດໂດຍບັນດາຜູ້ນໍາລຸ້ນຕໍ່ມາຂອງສອງປະເທດ ສປປ ລາວ ແລະ ສ ປປ ເກົາຫຼີ ສອງປະເທດພວກເຮົາໄດ້ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນໄລຍະການຕໍ່ສູ້ເພື່ອປົດປ່ອຍປະເທດຊາດໃນເມື່ອກ່ອນ ກໍຄື ການປົກປັກຮັກ ສາ ແລະ ພັດທະນາປະເທດຊາດຂອງແຕ່ລະປະເທດໃນປັດຈຸບັນ ສາຍພົວພັນດັ່ງກ່າວ ໄດ້ປະກອບສ່ວນເຂົ້າໃນການຮັດແໜ້ນການພົວພັນຮ່ວມມືລະຫວ່າງສອງປະ ເທດ ກໍຄື ປະກອບສ່ວນເຂົ້າໃນພາລະກິດປົກປັກຮັກສາສັນຕິພາບ ແລະ ເສີມຂະ ຫຍາຍການຮ່ວມມືເພື່ອພັດທະນາໃນພາກພື້ນ ແລະ ໃນໂລກ.

ສະຫາຍ ແກ້ວ ມັກຄະຜົນ ໄດ້ສະແດງຄວາມຂອບໃຈຢ່າງຈິງໃຈຕໍ່ການຕ້ອນຮັບອັນອົບອຸ່ນ ແລະ ຄໍາເວົ້າອັນດີງາມຂອງ ສະຫາຍ ແຈ ຣອງ ແຮ ທີ່ມີຕໍ່ສາຍພົວພັນມິດ ຕະພາບຖານສະຫາຍອ້າຍນ້ອງ ລະຫວ່າງ ສອງປະເທດ ພ້ອມດຽວກັນນັ້ນ ກໍໄດ້ອວຍ ພອນໄຊອັນປະເສີດໃຫ້ ສະຫາຍ ແຈ ຣອງ ແຮ ຈົ່ງມີພະລານາໄມສົມບູນ ແລະ ປະສົບຜົນສໍາເລັດໃນໜ້າທີ່ວຽກງານອັນຊົງກຽດຂອງຕົນ.