ເນື່ອງໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນການທູດຫວຽດ ນາມ-ລາວ ຄົບຮອບ 60 ປີ (05/9/1962-05/9/2022). ຕອນເຊົ້າວັນທີ 4 ກັນຍາ 2022 ທີ່ສະຖານທູດຫວຽດນາມ ນະຄອນຫລວງວຽງຈັນ ທ່ານ ຫງວຽນ ບ໋າ ຮຸ່ງ, ເອກອັກຄະລັດຖະທູດ ຜູ້ມີອຳນາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ໃຫ້ສໍາພາດຕໍ່ສື່ມວນຊົນລາວ ເຖິງສາຍພົວພັນລະຫວ່າງສອງປະເທດຕະຫລອດໄລຍະ 60ປີຜ່ານມາ ໂດຍສະເພາະປີນີ້ ເຊິ່ງແມ່ນປີສາມັກຄີມິດຕະພາບຫວຽດນາມ-ລາວ, ລາວ-ຫວຽດນາມ ຕໍ່ຄໍາຖາມຂອງນັກຂ່າວທີ່ວ່າ: ສາຍພົວພັນຫວຽດນາມ-ລາວ, ລາວ-ຫວຽດນາມ ທັງສອງປະເທດຖືວ່າແມ່ນພິເສດ. ຂໍອະນຸຍາດທ່ານທູດຂະຫຍາຍຄວາມໝາຍດັ່ງກ່າວໃຫ້ເຫັນຊັດເຈນຂຶ້ນ?
ທ່ານ ຫງວຽນ ບ໋າ ຮຸ່ງ, ກ່າວວ່າ: ເພື່ອຕອບຄຳຖາມນີ້ໄດ້, ພວກເຮົາຕ້ອງສັງເກດບັນດາ ປັດໄຈນັ້ນ ຢ່າງມີວິທະຍາສາດ, ຍອມຮັບເຖິງການຄົງຕົວໃນພາວະວິໄສ ພວກເຮົາຈຶ່ງມີພື້ນຖານຄວາມເຊື່ອໝັ້ນທີ່ໜັກແໜ້ນຕໍ່ການຄົງຕົວ ແລະ ເພື່ອປະກອບສ່ວນເພື່ອປັບປຸງ, ພັດທະນາສາຍພົວພັນພິເສດຫວຽດນາມ-ລາວ.
ອັນທໍາອິດ, ປັດໄຈດ້ານພູມີສາດ, ຫວຽດນາມ-ລາວ ແມ່ນສອງປະເທດບ້ານໃກ້ເຮືອນຄຽງ, ຮ່ວມສາຍພູຫຼວງອັນໃຫຍ່ໂຕມະໂຫຖານ, ຮ່ວມແມ່ນໍ້າລຳເຊ. ຕໍ່ມາແມ່ນດ້ານປະຫວັດສາດ, ສອງປະເທດຮ່ວມສັດຕູໂຕດຽວ, ອີກໜຶ່ງປັດໄຈທີ່ເປັນສິ່ງຕັດສິນແມ່ນປະຊາຊົນສອງຊາດ ລ້ວນແຕ່ໄດ້ມີພັກການເມືອງປະຈັນບານຂອງຊົນຊັ້ນກຳມະກອນເປັນຜູ້ນຳພາ, ດ້ວຍແນວທາງ ອັນຖືກຕ້ອງ ໃນການຕໍ່ສູ້ປະຕິວັດ, ສ້າງສາປະເທດຊາດ ແລະ ໃນສາຍພົວພັນສາກົນ. ດ້ວຍປັດໄຈເລົ່ານີ້, ຂ້າພະເຈົ້າຂໍຍົກບາງ ຕົວຢ່າງລະອຽດເພື່ອພິສູດໃຫ້ແກ່ປັດໄຈເລົ່ານີ້ ທີ່ມີບົດບາດສຳຄັນໃນການກໍ່ສ້າງສາຍພົວພັນພິເສດຫວຽດ-ລາວ.
ອັນທີໜຶ່ງ, ປະຊາຊົນສອງປະເທດຍາມໃດກໍ່ຄຽງບ່າຄຽງໄຫຼ່, ຮ່ວມຢູ່ຮ່ວມຕາຍນຳກັນ, ພ້ອມກັນ ເສຍສະຫຼະຊີວິດໃຫ້ກັນແລະກັນໃນການຕໍ່ສູ້ຍາດເອົາ ແລະ ຮັກສາຄວາມເປັນເອກະລາດ, ເສລີພາບ. ສາຍພົວພັນລະຫວ່າງສອງປະເທດໄດ້ສ້າງຂຶ້ນດ້ວຍເລືອດເນື້ອ, ເຫື່ອແຮງຂອງພະນັກງານ ນັກຮົບທະຫານຫວຽດນາມ ແລະ ລາວບັນດາພະນັກງານນັກຊ່ຽວຊານ ແລະ ທະຫານອາສາສະໝັກຫວຽດນາມ ເປັນໝື່ນໆຄົນ.
ອັນທີສອງ, ນໍ້າໃຈສາມັກຄີພິເສດລະຫວ່າງສອງຊາດໄດ້ຮັບການສ້າງຂຶ້ນຈາກຢາດເຫື່ອ, ຢາດນໍ້າຕາ ແລະ ຢາດນໍ້ານົມຫອມຫວານຂອງບັນດາແມ່ຍິງລາວ ທີ່ໄດ້ເສຍສະຫຼະອາຫານການກິນ, ໂດຍສະເພາະ ແມ່ນໄດ້ເສຍສະຫຼະຢາດນໍ້ານົມທີ່ໃຫ້ລູກນ້ອຍຂອງຕົນ ອຸທິດໃຫ້ແກ່ກອງທັບ ຫວຽດນາມກິນ ເພື່ອເອົາຊີວິດຢູ່ລອດ; ບັນດາແມ່ຍິງຫວຽດນາມກໍໄດ້ສົ່ງຜົວ ແລະ ລູກຂອງຕົນສູ່ເສັ້ນທາງການຕໍ່ສູ້ຢູ່ປະເທດລາວ ແລະ ບໍ່ໄດ້ຫວນກັບຄືນບ້ານເກີດອີກເລີຍ.
ອັນທີສາມ, ສາຍພົວພັນຫວຽດ-ລາວ ແມ່ນພິເສດແທ້ໆ ເພາະສອງປະເທດມີສາຍພົວພັນ ແລະ ຮ່ວມມື, ຊ່ວຍເຫຼືອເຊິ່ງກັນແລະກັນຢ່າງຈິງໃຈ, ບໍ່ເຫັນແກ່ຕົວ, ຜ່ອງໃສ, ມິດຈິດມິດໃຈ, ບໍ່ຖືກມົວຂຸ່ນດ້ວຍແນວຄິດສະແຫວງຫາຜົນປະໂຫຍດ ຫຼື ເປັນປະເທດໃຫຍ່, ປະເທດນ້ອຍ ແລະ ບໍ່ພຽງແຕ່ຮັກແພງ ຫາກຍັງແມ່ນຍາມໃດກໍເຄົາລົບ, ພົວພັນເຊິ່ງກັນແລະກັນຢ່າງສະເໝີພາບ.
ອັນທີສີ່, ໄປພ້ອມໆກັບຄວາມມຸ້ງຫວັງຢ່າງແຮງກ້າໃນການພາປະຊາຊົນນຂອງຕົນບືນຕົວ ທຽບເທົ່າກັບ ບັນດາປະເທດມະຫາອຳນາດ, ປະຊາຊົນຫວຽດນາມຍາມໃດກໍມີຄວາມມຸ້ງຫວັງ ຢ່າງແຮງກ້າວ່າປະເທດຊາດ ແລະ ປະຊາຊົນລາວອ້າຍນ້ອງໄດ້ດຳລົງຊີວິດໃນຄວາມສັນຕິພາບ, ເອກະລາດ, ເສລີພາບ, ວັດທະນາວັດທະນາຖາວອນ, ມີຖານະສູງໃນເວທີສາກົນ. ຄວາມມຸ້ງຫວັງຢ່າງແຮງກ້ານັ້ນແມ່ນທຳມະຊາດ ທີ່ພຽງແຕ່ໃນລະຫວ່າງຜູ້ເປັນອ້າຍເປັນນ້ອງສະໜິດ ສະໜົມ ແລະ ໄວ້ເນື້ອເຊື່ອໃຈທີ່ສຸດ. ນີ້ແມ່ນສິ່ງທີ່ພິເສດມີແຕ່ສອງຊົນຊາດຫວຽດນາມ ແລະ ລາວມີເທົ່ານັ້ນ.
ອັນທີຫ້າ, ເປັນສິ່ງທີ່ສຳຄັນທີ່ສຸດ ທີ່ເຮັດໃຫ້ສາຍພົວພັນຫວຽດ-ລາວ ກາຍເປັນ ພິເສດກວ່າບັນດາສາຍພົວພັນສາກົນອື່ນໆ ແມ່ນສາຍພົວພັນລະຫວ່າງສອງປະເທດ ມີການ ສະໜິດສະໜົມ, ມີຄວາມໄວ້ເນື້ອເຊື່ອໃຈດ້ານການເມືອງ, ຄວາມໄວ້ເນື້ອເຊື່ອໃຈດ້ານຍຸດທະສາດ ທີ່ເລິກເຊິ່ງ ແລະ ໜັກແໜ້ນຢ່າງແທ້ຈິງ.
ອີກສິ່ງໜຶ່ງທີ່ພິເສດແມ່ນທຸກສິ່ງດັ່ງກ່າວມານັ້ນໄດ້ກາຍເປັນແຜນນະໂຍບາຍ, ເປັນແນວທາງ, ເປັນນະໂຍບາຍຍາວນານຂອງສອງພັກ, ສອງລັດ, ໄດ້ສືບທອດຈາກລຸ້ນຄົນນີ້ສູ່ລຸ້ນຄົນຕໍ່ໄປ ແລະ ສົ່ງຕໍ່ໃຫ້ແກ່ລຸ້ນຄົນອະນາຄົດສືບຕໍ່.
ເພື່ອສະຫຼຸບຄືນສິ່ງກ່າວມານີ້, ຂ້າພະເຈົ້າຂໍຢໍ້າຄືນເນື້ອໃນທີ່ສະຫາຍ ທອງລຸນ ສີສຸລິດ, ເລຂາທິການໃຫຍ່-ປະທານປະເທດ ໄດ້ແລກປ່ຽນເມື່ອຕ້ອນຮັບບາງຄະນະຜູ້ແທນຫວຽດນາມ ເຂົ້າຢ້ຽມຂໍ່ານັບມໍ່ໆມານີ້, ລະຫວ່າງ ລາວ ແລະ ຫວຽດນາມ ມີ 04ນໍ້າໃຈ, ເຊິ່ງມີຄື: ນໍ້າໃຈມິດສະຫາຍຮ່ວມອຸດົມການກອມມູນິດ; ນໍ້າໃຈອ້າຍນ້ອງຮ່ວມພໍ່ແມ່ ເຊິ່ງແມ່ນພັກ ກອມມູນິດອິນດູຈີນ; ນໍ້າໃຈເພື່ອນມິດສະໜິດສະໜົມ, ຮ່ວມສຸກຮ່ວມທຸກນຳກັນ; ແລະ ນໍ້າໃຈສາມັກຄີພິເສດ, ສະໜິດຕິດແທດ, ບໍລິສຸດດູດດື່ມ. ຂ້າພະເຈົ້າຂໍໄດ້ເພີ່ມເຕີມອີກຄວາມໜຶ່ງທີ່ສູງສົ່ງລະຫວ່າງຫວຽດນາມ ແລະ ລາວ, ນັ້ນແມ່ນນໍ້າໃຈເພື່ອນຮ່ວມສູ້ຮົບຮ່ວມເປັນຮ່ວມຕາຍ, ເຂົ້າເມັດຫັກ ຜັກເສັ້ນໜຶ່ງກໍ່ແບ່ງປັນກັນກິນ.
ຕໍ່ຄໍາຖາມຂອງນັກຂ່າວວ່າ: ປີສາມັກຄີມິດຕະພາບຫວຽດນາມ-ລາວ, ລາວ-ຫວຽດນາມ 2022 ມີຄວາມໝາຍເປັນແນວໃດ ແລະ ສາຍພົວພັນສອງຝ່າຍໄດ້ສົ່ງສານແນວໃດສູ່ຫາງສຽງ ພາຍໃນ ແລະ ສາກົນ.
ທ່ານຫງວຽນ ບ໋າຮຸ່ງ ກ່າວວ່າ: ປີ 2022 ມີຄວາມໝາຍສຳຄັນພິເສດຕໍ່ສອງປະເທດ ຫວຽດນາມ ແລະ ລາວ. ສອງປະເທດຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນ ການທູດຄົບຮອບ 60 ປີ, ວັນເຊັນສົນທິສັນຍາມິດຕະ ພາບ ແລະ ການຮ່ວມມືຫວຽດນາມ-ລາວ ຄົບຮອບ 45 ປີ.
ປະຫວັດສາດໄດ້ພິສູດວ່າ, ຫວຽດນາມ ແລະ ລາວ ຊ່ວຍເຫຼືອເຊິ່ງກັນແລະກັນ ບໍ່ແມ່ນຍ້ອນມີ ເສັ້ນຊາຍແດນຮ່ວມກັນຍາວກວ່າ 2.337ກມ, ບໍ່ພຽງແຕ່ວ່າຍ້ອນມີສາຍພົວພັນສະໜິດສະໜົມ ລະຫວ່າງສອງຊົນຊາດແຕ່ດົນນານ ຫຼື ບໍ່ພຽງແຕ່ສອງປະເທດເດີນບົນເສັ້ນທາງກ້າວຂຶ້ນສັງຄົມນິຍົມ, ເຊິ່ງຍິ່ງກວ່າທັງໝົດທັງມວນ, ແມ່ນສາຍພົວພັນ ທີ່ອີງໃສ່ຄວາມໄວ້ເນື້ອເຊື່ອໃຈ, ຄວາມບໍລິສຸດຜຸດຜ່ອງ, ບໍ່ເຫັນແກ່ຕົວ, ມີຄວາມປອດໃສທີ່ຫາໄດ້ຍາກ, ເຄົາລົບເອກະລາດ, ອຳນາດອະທິປະໄຕ, ຍົກສູງສະຕິຮ່ວມມື, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ.
ປັດຈຸບັນ, ສະພາບການມີການຫັນປ່ຽນຢ່າງໄວວາ ແບບບໍ່ເຄີຍມີມາກ່ອນ, ຄາດເດົາໄດ້ຍາກ, ບວກກັບຜົນກະທົບຂອງການປະຕິວັດອຸດສາຫະກຳ 4.0, ສ້າງຫຼາຍກາລະໂອກາດ ແລະ ສິ່ງທ້າທາຍສະຫຼັບກັນ. ການນຳຂັ້ນສູງຂອງສອງປະເທດເປັນເອກະພາບປີ 2022 ແມ່ນປີສາມັກຄີມິດຕະພາບຫວຽດນາມ-ລາວ ທີ່ມີຄວາມໝາຍສຳຄັນຍິ່ງ, ໄດ້ສົ່ງສານຢ່າງຈະແຈ້ງວ່າ: ພັກ, ລັດຫວຽດນາມ ແລະ ລາວຈະສະເໝີຕົ້ນສະເໝີປາຍຈະເພີ່ມພູນຄຸນສ້າງ ແລະ ຍົກລະດັບສາຍພົວພັນຍິ່ງໃຫຍ່ລະຫວ່າງສອງປະເທດນັບມື້ນັບພັດທະນາ ທັງລວງກວ້າງ ແລະ ລວງເລິກຢ່າງບໍ່ຢຸດຢັ້ງ; ຢືນຢັນລະດັບຄວາມສຳຄັນ ແລະ ຄວາມໝາຍຍຸດທະສາດຂອງສາຍພົວພັນມິດຕະພາບຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານຫວຽດນາມ-ລາວ, ແມ່ນຊັບສິນລວມອັນປະເສີດຂອງສອງຊົນຊາດ, ສາຍພົວພັນ ສາມັກຄີພິເສດກາຍເປັນແບບຢ່າງມີໜຶ່ງດຽວໃນໂລກ, ແມ່ນປັດໄຈຮັບປະກັນຄວາມຄົງຕົວ, ພັດທະນາຂອງສອງປະເທດ; ຮ່ວມກັນຢືນຢັນອີກຄັ້ງ, ໂລກຍິ່ງສັບສົນ, ສ້າງສິ່ງທ້າທາຍຕໍ່ສອງປະເທດ, ຫວຽດນາມ ແລະ ລາວ ຍິ່ງຕັດສິນໃຈສູງປັບປຸງ, ເພີ່ມທະວີສາຍພົວພັນ ແລະ ການຮ່ວມມື ພິເສດດ້ວຍບັນດາເນື້ອໃນໃໝ່, ຮູບແບບໃໝ່ທີ່ແທດເໝາະກັບສະພາບຕົວຈິງ, ມີຜົນສຳເລັດໃໝ່.