ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຂ່ຳນັບຮັບຕ້ອນ ກອງປະຊຸມໃຫ່ຍຄັ້ງທີ XI
ຂອງ ພັກປະຊາຊົນປະຕິວັດລາວ ຢ່າງສຸດໃຈ

ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ ຫວຽດນາມ ໄປຢ້ຽມຢາມ ແລະ ສະເໜີຕົວ ຢູ່ ແຂວງເລິມດົ່ງ ແລະ ແຂວງກອນຕູມ ສສ ຫວຽດນາມ ໃນລະຫວ່າງວັນທີ 6-13 ມັງກອນ 2021

ໃນລະຫວ່າງວັນທີ 6-13 ມັງກອນ 2021, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ ພ້ອມດ້ວຍຄະນະ ຈາກສະຖານທູດລາວ ທີ່ ນະຄອນຫຼວງຮ່າໂນ້ຍ, ສະຖານກົງສຸນໃຫຍ່ລາວ ທີ່ ນະຄອນໂຮ່ຈີມິນ ແລະ ນະຄອນດານັງ ໄດ້ເຂົ້າຢ້ຽມຂໍ່ານັບຕໍ່ ສະຫາຍ ຟ້າມ ແອສ໌, ຮອງປະທານຄະນະກໍາມະການປະຊາຊົນແຂວງເລິມດົ່ງ ແລະ ສະຫາຍ ເລ ງ໋ອກ ຕ່ວນ, ຮອງເລຂາພັກແຂວງ, ປະທານຄະນະກໍາມະການປະຊາຊົນແຂວງກອນຕູມ ແຫ່ງ ສສ ຫວຽດນາມ ເນື່ອງໃນໂອກາດມາດຳລົງຕໍາແໜ່ງເປັນເອກະອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ຄົນໃໝ່ ປະຈຳ ສສ ຫວຽດນາມ.
ໃນການເຂົ້າຢ້ຽມຂໍ່ານັບພົບປະບັນດາແຂວງຄັ້ງນີ້: ການນຳແຂວງເລິມດົ່ງ ແລະ ແຂວງກອນຕູມ ໄດ້ສະແດງຄວາມຍິນດີ ຕ້ອນຮັບ ແລະ ຕີລາຄາສູງທີ່ ສະຫາຍ ແສງເພັດ ຮຸ່ງບຸນຍວງ ໄດ້ຮັບການແຕ່ງຕັ້ງມາດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ເຊິ່ງເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຂອງພັກ, ລັດ ແລະ ປະຊາ ຊົນລາວ ທີ່ມີຕໍ່ສະຫາຍເອກອັກຄະລັດຖະທູດ ພ້ອມທັງໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງໂດຍຫຍໍ້ ກໍຄືການຮ່ວມມືບັນດາແຂວງແຮກສ່ຽວຂອງ ສປປ ລາວ ໃຫ້ຊາບ. ການນໍາແຕ່ລະແຂວງກໍໄດ້ຕີລາຄາສູງ ທີ່ສະຫາຍເອກອັກຄະລັດຖະທູດ ໄດ້ນຳພາຄະນະສະຖານທູດລາວທີ່ ນະຄອນຫຼວງຮ່າໂນ້ຍ, ສະຖານກົງສຸນໃຫຍ່ຂອງລາວ ທີ່ ນະຄອນດານັງ ແລະ ນະຄອນໂຮ່ຈີມິນ ເດີນທາງມາຢ້ຽມຢາມ ແລະ ເຮັດວຽກຢູ່ແຂວງເລິມດົ່ງ ແລະ ແຂວງກອນຕູມ ໃນຄັ້ງນີ້ ເຊິ່ງຈະເປັນການສືບຕໍ່ກະຕຸກຊຸກຍູ້ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນຂອງສອງປະເທດຫວຽດນາມ ເວົ້າລວມ, ເວົ້າສະເພາະ ກໍແມ່ນການພົວພັນຮ່ວມມືຊ່ວຍເຫຼືອ ເຊິ່ງກັນ ແລະ ກັນ ລະຫວ່າງບັນດາແຂວງທ້ອງຖິ່ນຂອງລາວ ແລະ ຫວຽດນາມ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.
ສະຫາຍ ເອກອັກຄະລັດຖະທູດ ແຫ່ງ ສປປ ລາວ ກໍໄດ້ກ່າວສະແດງຄວາມຂອບໃຈ ມາຍັງການນຳ, ອຳນາດການປົກຄອງແຂວງເລິມດົ່ງ ແລະ ແຂວງກອນຕູມ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ເຊິ່ງເຕັມໄປດ້ວຍນໍ້າໃຈຖານສະຫາຍອ້າຍນ້ອງ ພ້ອມທັງໃຫ້ຄຳໝັ້ນສັນຍາວ່າ: ໃນຖານະມາດຳລົງຕຳ ແໜ່ງເປັນເອກອັກຄະລັດຖະທູດວິສາມັນຜູ້ອຳນາດເຕັມ ແຫ່ງ ສປປ ລາວ ປະຈໍາ ສສ ຫວຽດນາມ ຈະສືບຕໍ່ເປັນຂົວຕໍ່ທີ່ສຳຄັນ ເພື່ອສົ່ງເສີມການພົວພັນຮ່ວມມືສອງປະເທດໃຫ້ນັບມື້ນັບມີການພັດທະນາເຂົ້າສູ່ລວງເລິກ ແລະ ກວ້າງຂວາງ, ຈະທຸ້ມເທເຫື່ອແຮງ ແລະ ສະຕິປັນຍາຂອງຕົນເຂົ້າໃນການເສີມຂະຫຍາຍສາຍພົວພັນພິເສດສອງຊາດລາວ-ຫວຽດນາມ ໃຫ້ຈະເລີນແຕກດອກອອກຜົນຍິ່ງໆຂຶ້ນ ພ້ອມທັງສະແດງຄວາມຂອບໃຈພັກ, ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອ ພັກ, ລັດ ແລະ ປະຊາຊົນລາວ ຕະຫຼອດມາ ໂດຍສະເພາະແມ່ນແຂວງເລິມດົ່ງ ແລະ ແຂວງກອນຕູມ ທີ່ໄດ້ໃຫ້ການຊ່ວຍເຫຼືອແກ່ບັນດາແຂວງແຮກສ່ຽວຂອງລາວຕະຫຼອດມາ, ພິເສດແມ່ນການຊ່ວຍກໍ່ສ້າງຊັບພະຍາກອນມະນຸດ. ນອກຈາກນີ້, ສະຫາຍເອກອັກຄະລັດຖະທູດ ກໍໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງ, ຮອບດ້ານທີ່ຍາດມາໄດ້ໃນການພັດທະນາເສດຖະກິດ-ສັງຄົມຂອງແຕ່ລະແຂວງ ໂດຍສະເພາະໃນປີ 2020 ເຖິງຈະຖືກຜົນກະທົບຈາກການລະບາດຂອງເຊື້ອພະຍາດໂຄວິດ-19 ກໍຕາມ ແຕ່ສອງແຂວງກໍສາມາດຈັດຕັ້ງປະຕິບັດສອງເປົ້າໝາຍທີ່ສໍາຄັນຄື: ສະກັດກັ້ນ, ປ້ອງກັນການລະບາດຂອງເຊື້ອພະຍາດໂຄວິດ-19 ແລະ ພັດທະນາເສດຖະກິດ-ສັງຄົມຄວບຄຸມກັນໄດ້ເປັນຢ່າງດີ ເຊິ່ງສາມາດເກັບລາຍຮັບເຂົ້າງົບປະມານແຫ່ງຊາດບັນລຸເກີນຄາດໝາຍທີ່ວາງໄວ້, ເປັນແຂວງໜຶ່ງໃນບັນດາແຂວງ-ນະຄອນຂອງຫວຽດນາມ ທີ່ມີລະດັບການຂະຫຍາຍຕົວເສດຖະກິດຂະຫຍາຍຕົວຢ່າງວ່ອງໄວ ໂດຍສະເພາະແມ່ນການພັດທະນາຂະແໜງກະສິກໍາທີ່ນຳໃຊ້ເຕັກໂນໂລຊີທີ່ທັນສະໄໝ ຢືນຢູ່ແຖວໜ້າຂອງປະເທດ.
ໃນໂອກາດນີ້, ສະຫາຍແສງເພັດ ຮຸ່ງບຸນຍວງ ກໍໄດ້ສະແດງຄວາມເພິ່ງພໍໃຈ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ແຂວງເລິມດົ່ງ ກັບ ແຂວງຈຳປາສັກ ແລະ ແຂວງບໍລິຄຳໄຊ, ລະຫວ່າງແຂວງກອນຕູມ ກັບ ແຂວງອັດຕະປື ແລະ ແຂວງເຊກອງ ຂອງ ສປປ ລາວ ເຊິ່ງຈະເປັນການປະກອບ ສ່ວນອັນສຳຄັນໃນເສີມຂະຫຍາຍ ແລະ ປົກປັກຮັກສາສາຍພົວພັນມິດຕະພາບຂອງສອງປະເທດລາວ-ຫວຽດນາມ ໃຫ້ໝັ້ນຄົງທະນົງແກ່ນຕະຫຼອດຊົ່ວກະລານານ.