ຕອນເຊົ້າວັນທີ 18 ກໍລະກົດ ນີ້, ທີ່ນະຄອນຫຼວງ ຮ່າໂນ້ຍ, ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະໄດ້ເຂົ້າຢ້ຽມຂ່ຳນັບ ທ່ານ ຫວຽນ ຈິຢຸງ, ກຳມະການສູນກາງພັກ, ລັດຖະມົນຕີກະຊວງແຜນການ ແລະ ການລົງທຶນ ແຫ່ງ ສສ ຫວຽດນາມ ໃນໂອກາດທີ່ທ່ານໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ປະຈຳ ສສ ຫວຽດນາມ.
ທ່ານ ນາງ ຄຳເພົາ ເອີນທະວັນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ສະໜິດສະໜົມຂອງທ່ານ ຫວຽນ ຈິຢຸງ ແລະ ລາຄາສູງຕໍ່ຜົນສຳເລັດຂອງ ສສ ຫວຽດນາມ ທີ່ຍາດມາໄດ້ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ໂດຍພາຍໃຕ້ການນຳພາອັນສະຫຼາດສ່ອງໃສຂອງສະຫາຍ ຫງວຽນ ຝູຈ້ອງ ເລຂາທິການໃຫຍ່ພັກກອມມູນິດຫວຽດນາມ ໄດ້ເຮັດໃຫ້ປະເທດຊາດພັດທະນາຢ່າງຮອບດ້ານ ແລະ ກ້າວກະໂດດ, ເສດຖະກິດມີຄວາມໝັ້ນທ່ຽງ, ຮັກສາໄດ້ມູນເຊື້ອວັດທະນະທຳອັນດີງາມຂອງຫວຽດນາມ. ການພົວພັນຮ່ວມມືລະຫວ່າງສອງກະຊວງແຜນການ ແລະ ການລົງທຶນລາວ ແລະ ກະຊວງແຜນການ ແລະ ການຮ່ວມມືຫວຽດນາມ ນັບມື້ນັບແໜ້ນແຟ້ນ ແລະ ໄດ້ຮັບໝາກຜົນໃນທຸກຂົງເຂດວຽກ ງານ ໂດຍສະເພາະແມ່ນການຮ່ວມມືຂອງສອງຄະນະກຳມະການຮ່ວມມືລາວ-ຫວຽດນາມ, ຫວຽດນາມ-ລາວໃນໄລຍະຜ່ານມາ.
ທ່ານ ລັດຖະມົນຕີກະຊວງແຜນການ ແລະ ການລົງທຶນຫວຽດນາມ ໄດ້ສະແດງຄວາມຊົມເຊີຍທ່ານ ນາງ ຄຳເພົາ ເອີນທະວັນ ທີ່ໄດ້ຮັບໜ້າທີ່ເປັນເອກອັກຄະລັດຖະທູດລາວຄົນໃໝ່ ປະຈຳ ສສ ຫວຽດນາມ ແລະ ເຊື່ອໝັ້ນວ່າ, ທ່ານຈະເປັນຂົວຕໍ່ປະກອບສ່ວນຢ່າງຕັ້ງໜ້າ ເຂົ້າໃນການເສີມຂະຫຍາຍສາຍພົວພັນຮ່ວມມືລະຫວ່າງສອງປະເທດ ລາວ-ຫວຽດນາມ ໃຫ້ນັບມື້ນັບຂະຫຍາຍຕົວ, ບັນລຸໄດ້ໝາກຜົນສຳເລັດໃນຫຼາຍຂົງເຂດວຽກງານ. ກະຊວງແຜນການ ແລະ ການລົງທຶນຫວຽດນາມ ພ້ອມໃຫ້ການຮ່ວມມື, ສະໜັບສະໜູນ ແລະ ອຳນວຍຄວາມສະດວກ ເພື່ອໃຫ້ທ່ານທູດປະຕິບັດສຳເລັດໜ້າທີ່ ທີ່ພັກ, ລັດຖະບານ ແລະ ປະຊາຊົນລາວມອບໝາຍໃຫ້. ພ້ອມນີ້, ທ່ານຍັງໄດ້ກ່າວວ່າ, ກະຊວງແຜນການ ແລະ ການລົງທຶນຂອງຫວຽດນາມ ກໍຄືລັດຖະບານຫວຽດນາມ ໃຫ້ຄວາມສຳຄັນ ແລະ ໃຫ້ບຸລິມະສິດສູງສຸດຕໍ່ການເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ, ລາວ-ຫວຽດນາມ.
ໃນໂອກາດນີ້, ທ່ານທູດຍັງໄດ້ຕາງໜ້າພັກ, ລັດ ແລະ ປະຊາ ຊົນລາວ ສະແດງຄວາມຂອບໃຈ ແລະ ຄວາມຮູ້ບຸນຄຸນມາຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ສປປ ລາວ ຕະຫຼອດມາ. ໃນຖານະເປັນເອກອັກຄະລັດຖະທູດລາວຄົນໃໝ່ປະຈຳ ສສ ຫວຽດນາມ, ທ່ານຈະສືບຕໍ່ໄດ້ຮັບການສະໜັບສະໜູນ, ຊ່ວຍເຫຼືອຈາກທ່ານລັດຖະມົນຕີ ກໍຄືຄະນະນຳກະຊວງແຜນການ ແລະ ການລົງທຶນ ແລະ ທຸກພາກສ່ວນທີ່ກ່ຽວຂ້ອງຂອງຫວຽດນາມ ແລະ ຈະປະຕິບັດໜ້າທີ່ສຸດຄວາມສາມາດຂອງຕົນ ໃນການເປັນຂົວຕໍ່ສຳຄັນໃຫ້ແກ່ການຊຸກຍູ້ການຮ່ວມມືຂອງສອງຝ່າຍ ເພື່ອເສີມຂະຫຍາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາ ຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ແຕກດອກອອກຜົນຍິ່ງໆຂື້ນໄປເລື້ອຍໆ.
ຂ່າວ-ພາບ: ສະຖານທູດລາວທີ່ຮ່າໂນ້ຍ.
