ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເອົາໃຈໃສ່ກິນຢູ່ຢ່າງສະອາດ ເພື່ອປ້ອງກັນພະຍາດທີ່ອາດຈະມາກັບນ້ຳ

ນັບແຕ່ທ້າຍເດືອນ ກໍລະກົດເປັນຕົ້ນມາ ຫລາຍທ້ອງຖິ່ນໃນທົ່ວປະເທດຂອງລາວປະສົບອຸທົກກະໄພຮ້າຍແຮງສົມຄວນ, ໃນນີ້ ຮ້າຍແຮງກ່ວາໝູ່ແມ່ນອຸທົກກະໄພທີ່ເກີດຂຶ້ນຢູ່ເມືອງ ສະໜາມໄຊ, ແຂວງ ອັດຕະປື ຍ້ອນສັນເຂື່ອນກັ້ນນ້ຳອ່າງເກັບນ້ຳສຳຮອງໂຄງການເຂື່ອນໄຟ ຟ້າເຊປຽນ-ເຊນ້ຳນ້ອຍແຕກ ເຮັດໃຫ້ປະລິມານນ້ຳຈຳນວນມະຫາສານໄຫລຊຸເຮືອນຊານ ແລະ ຖ້ວມເນື້ອທີ່ທຳການຜະລິດ ແລະ ເນື້ອທີ່ອື່ນຯ ຂອງປະຊາຊົນເສຍຫາຍເຖີງ 13 ບ້ານ, ມີປະຊາຊົນຫລາຍກ່ວາ 13.000 ຄົນ, ໃນນັ້ນໜັກໜ່ວງກ່ວາໝູ່ມີ 6 ບ້ານທີ່ຕັ້ງຢູ່ລຽບຕາມສາຍນ້ຳເຊປຽນ ເຮັດໃຫ້ເຮືອນຊານ ແລະ ຊັບສິນມີຄ່າຖືກນ້ຳຊຸທັ່ງພັງເພເກືອບໝົດບ້ານ, ເນື້ອທີ່ທຳການຜະລິດຕ່າງຯ ກາຍເປັນທະເລຕົມພຽງຄ່ຳຄືນດຽວ, ປະຊາຊົນຫລາຍພັນຄົນໄດ້ຮັບຜົນກະທົບ, ມີທັງຜູ້ເສຍຊີວິດ ແລະ ສູນຫາຍເປັນຈຳນວນຫລວງຫລາຍ. ຂະນະທີ່ຜູ້ລອດຊີວິດຕ້ອງໄດ້ອາໃສຢູ່ບ່ອນພັກຊົ່ວຄາວທີ່ລັດຖະບານ ກໍຄື ອົງການປົກຄອງແຂວງ ອັດຕະປື ຈັດສັນໄວ້ໃຫ້ທັງຢູ່ພາຍໃນເທດສະບານເມືອງສະໜາມໄຊ ແລະ ຈຸດອື່ນຯ.

ປັດຈຸບັນ ເຖີງວ່າປະຊາຊົນຜູ້ປະສົບອຸທົກກະໄພຫລາຍພັນຄົນໄດ້ຮັບການຍົກຍ້າຍ ແລະ ຈັດສັນໃຫ້ອາໃສຢູ່ສູນພັກຊົ່ວຄາວຢ່າງເປັນລະບົບ ໂດຍມີທຸກຂະແໜງການກ່ຽວຂ້ອງໃຫ້ການຊ່ວຍ ເຫລືອເອົາໃຈໃສ່ເບິ່ງແຍງຊີວິດການເປັນຢູ່ໃນທຸກດ້ານແລ້ວກໍຕາມ ແຕ່ສັງຄົມໃຫ້ຄວາມສົນໃຈ ແລະ ເປັນຫ່ວງຫລາຍບັນຫາ. ໜຶ່ງໃນນັ້ນແມ່ນບັນຫາສຸຂະພາບຂອງຜູ້ປະສົບໄພ ເພາະສູນພັກ ຊົ່ວຄາວຍັງບໍ່ໄດ້ມາດຕະຖານ, ມີຄວາມແອອັດ, ບວກກັບພື້ນເດີ່ນຂອງສູນພັກຊົ່ວຄາວຫລາຍຈຸດເປັນບວກເປັນຂຸມນ້ອຍໃຫຍ່ ເວລາຝົນຕົກລົງມາເກີດເປັນດິນຕົມເປີະເປື້ອນ ແລະ ນ້ຳຖ້ວມ. ຂະນະທີ່ ສິ່ງອຳນວຍຄວາມສະດວກທີ່ຈຳເປັນຕໍ່ການດຳລົງຊີວິດປະຈຳວັນ ເຖີງວ່າມີຫລາຍພາກສ່ວນຍື່ນມືເຂົ້າມາໃຫ້ການຊ່ວຍເຫລືອແຕ່ຍັງບໍ່ພຽງພໍກັບຄວາມຕ້ອງການ ໂດຍສະເພາະ ຫ້ອງນ້ຳ, ລວມເຖີງເຄື່ອງ ນຸ່ງຫົ່ມ ເຮັດໃຫ້ມີໂອກາດສູງທີ່ອາດຈະເກີດການລະບາດຂອງພະຍາດຊະນິດຕ່າງຯ ໄດ້ງ່າຍ ເປັນຕົ້ນ: ຖອກ ທ້ອງ, ໄຂ້ຫວັດ, ໄຂ້ເລືອດອອກ, ອັກເສບຕັບບີ, ໄຂ້ແມງແດງ, ອັກເສບປອດ, ຕຸ່ມເປື່ອຍ ແລະ ອື່ນຯ ເພາະຜູ້ປະສົບໄພຈຳນວນຫລາຍຮ້ອຍຄົນທີ່ອາໃສຢູ່ສູນພັກຊົ່ວຄາວຮວມກັນໃນແຕ່ລະຈຸດຍັງບໍ່ຮູ້ຊາຕາກຳຂອງຕົນເອງ ແລະ ຄອບຄົວເທື່ອວ່າຕ້ອງອາໃສຢູ່ທີ່ພັກຊົ່ວຄາວນີ້ອີກດົນປານໃດ ຈິ່ງຈະມີເຮືອນຊານທີ່ຖາວອນເປັນຂອງຕົວເອງອີກຄັ້ງໜຶ່ງ.

ດຣ. ນາງ ອ່ອນຜີວ ໂພທິລາດ, ຫົວໜ້າພະແນກສາທາລະນະສຸກແຂວງ ອັດຕະປື ໃຫ້ຮູ້ວ່າ: ຂະແໜງສາທາລະນະສຸກແຂວງ ອັດຕະປື ຮ່ວມກັບກະຊວງສາທາລະນະສຸກ ໄດ້ເອົາໃຈໃສ່ເຝົ້າຕິດຕາມ ແລະ ປ້ອງກັນການລະບາດຂອງພະຍາດຊະນິດຕ່າງຯ ທີ່ອາດຈະເກີດຂຶ້ນຢູ່ຕາມສູນພັກຊົ່ວຄາວຂອງຜູ້ປະສົບອຸທົກກະໄພທີ່ເມືອງ ສະໜາມໄຊ ຕະຫລອດ 24 ຊົ່ວໂມງ. ປັດຈຸບັນ ເຫັນວ່າພະຍາດທີ່ເກີດຂຶ້ນສ່ວນໃຫຍ່ແມ່ນ ໄຂ້ຫວັດ, ໄຂ້ແມງແດງ, ອັກເສບປອດ, ຕຸ່ມເປື່ອຍ ແລະ ຖອກທ້ອງ ແຕ່ບໍ່ຮ້າຍແຮງ ແລະ ສາມາດຄວບຄຸມໄດ້.

 

       ໄລຍະເບື້ອງຕົ້ນຂອງການເກີດເຫດອຸທົກກະໄພ ມີແພດອາສາສະໝັກຈາກຫລາຍປະເທດເຂົ້າມາໃຫ້ການຊ່ວຍເຫລືອເບິ່ງແຍງສຸຂະພາບຂອງຜູ້ປະສົບໄພ ຄື: ຫວຽດນາມ, ຈີນ, ໄທ ແລະ ສາທາລະ ນະລັດເກົາເຫລີ ແຕ່ປັດຈຸບັນແພດອາສາສະໝັກຕ່າງປະເທດໄດ້ເດີນທາງກັບຄືນປະເທດໝົດແລ້ວ ເຫລືອພຽງແຕ່ແພດໝໍ ແລະ ພະນັກງານກ່ຽວຂ້ອງ ຈາກກະຊວງ ສາທາລະນະສຸກ ແລະ ແຂວງ ອັດ ຕະປື ເຮັດໜ້າທີ່ບໍລິການປິ່ນປົວ, ໄປພ້ອມຯ ກັບການໂຄສະນາເຜີຍແຜ່ໃຫ້ຄວາມຮູ້ແກ່ຜູ້ປະສົບໄພໃນການຮັກສາສຸຂະພາບ ດ້ວຍການກິນຢູ່ທີ່ສະອາດປອດໄພ ແລະ ຖືກຕ້ອງຕາມຫລັກການອະນາໄມທຸກຢ່າງ.   ປັດຈຸບັນ ຜູ້ປະສົບອຸທົກກະໄພຢູ່ເມືອງສະໜາມໄຊ ທີ່ອາໃສຢູ່ແຕ່ລະສູນພັກຊົ່ວຄາວ ໄດ້ຮັບການເບິ່ງແຍງດ້ານສຸຂະພາບ ກໍຄື ການກິນຢູ່ພັກເຊົາປະຈຳວັນຈາກທຸກຂະແຫນງການກ່ຽວຂ້ອງດີສົມຄວນ ແລະ ຍັງບໍ່ມີການລະບາດຂອງພະຍາດຮ້າຍແຮງເກີດຂຶ້ນ.

ພະຍາດທີ່ອາດຈະເກີດເນື່ອງຈາກອຸທົກກະໄພ ມີຫລາຍຊະນິດ. ດັ່ງນັ້ນ ຈິ່ງຮຽກຮ້ອງມາຍັງຜູ້ປະສົບອຸທົກກະໄພທີ່ເມືອງ ສະໜາມໄຊ, ແຂວງ ອັດຕະປື ກໍຄື ປະຊາຊົນທ້ອງ ຖິ່ນຕ່າງຯ ທົ່ວປະເທດທີ່ປະສົບໄພນ້ຳຖ້ວມ ຕ້ອງເອົາໃຈໃສ່ເບິ່ງແຍງສຸຂະພາບໃຫ້ດີ. ກ່ອນກິນອາຫານ ຫລື ຫລັງຈາກເຂົ້າຫ້ອງນ້ຳຕ້ອງລ້າງມືໃຫ້ສະອາດທຸກຄັ້ງ, ກິນອາຫານທີ່ສຸກ ແລະ ປຸງແຕ່ງໃໝ່, ດື່ມນ້ຳທີ່ສະອາດ, ໝັ້ນຮັກສາຄວາມສະອາດຮ່າງກາຍດ້ວຍການອາບນ້ຳໃຊ້ສະບູ, ຖູແຂ້ວ ແລະ ຊັກເຄື່ອງນຸ່ງ-ຫົ່ມເປັນປະຈຳ, ບໍ່ຄວນຍ່າງຊໍ່ານຳ ຫລື ຢູ່ກັບນ້ຳເປັນເວລາດົນ, ໝັ້່ນຮັກສາອະນາ ໄມສະຖານ ທີ່ອ້ອມຂ້າງທີ່ພັກເພື່ອບໍ່ໃຫ້ເປັນບ່ອນລີ້ຊ່ອນຂອງຍຸງລາຍ ຫລື ແຜ່ເຊື້ອພະຍາດຊະນິດອື່ນຯ. ສິ່ງສຳຄັນເມື່ອຮູ້ສຶກວ່າເປັນໄຂ້ ບໍ່ສະບາຍ ໃຫ້ໄປປຶກສາແພດໝໍທີ່ປະຈຳຢູ່ສູນພັກຊົ່ວຄາວ ຫລື ໂຮງໝໍທີ່ຢູ່ໃກ້ຄຽງ, ຫລີກຫລ່ຽງທີ່ສຸດບໍ່ໃຫ້ຊື້ຢາມາກິນເອງ ຖ້າເຮັດໄດ້ຄືແນວນີ້ ແນ່ນອນວ່າຜູ້ປະສົບອຸທົກກະໄພທີ່ອາໃສຢູ່ສູນພັກຊົ່ວຄາວ ແລະ ພັກເຊົາຢູ່ນຳຍາດຕິພີ່ນ້ອງ ຈະມີສຸຂະພາບທີ່ແຂງ ແຮງ ແລະ ຫ່າງໄກຈາກພະຍາດຕ່າງຯ ທີ່ອາດຈະເກີດຂຶ້ນ.

ຂຽນໂດຍ: ບຸນຕຽງ ຈັນທະວົງ