ກອງປະຊຸມປະຈຳ 6 ເດືອນຕົ້ນປີ 2024 ຂອງຄະນະກຳມະການວຽກງານທາດໄຍຫີນ ສູນກາງສະຫະພັນກຳມະບານລາວ (ສກລ) ແລະ ອົງການອາຟີດາ ປະຈຳລາວ ຈັດຂຶ້ນວັນທີ 27 ມິຖຸນາ 2024 ຢູ່ໂຮງແຮມອ່າງຄຳ ນະຄອນຫຼວງວຽງຈັນ ໂດຍເປັນປະທານຂອງ ທ່ານ ວິໄລ ວົງຂະເສີມ ຮອງປະທານຄະນະບໍລິຫານງານ ສກລ ທ່ານ ນາງ ວິລະດາ ພົມດວງສີ ຫົວໜ້າຫ້ອງການອາຟີດາ ປະຈຳລາວ ມີຄະນະກຳມະການວຽກງານທາດໄຍຫີນ ຜູ້ຕາງໜ້າອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສຸບິນ ແທນບົວພາ ຫົວໜ້າພະແນກຄວາມປອດໄພ ແລະ ສຸຂະພາບແຮງງານ ສກລ ກ່າວວ່າ: ສກລ ແລະ ອົງການອາຟີດາ ປະຈຳລາວ ໄດ້ຮ່ວມມືກັນມາແຕ່ປີ 2004 ໂດຍສຸມໃສ່ສະໜັບສະໜູນການຈັດຕັ້ງປະຕິບັດ ແຜນຍຸດທະສາດຂອງ ສກລ ຄວາມສາມາດແກ່ກຳມະບານທຸກຂັ້ນ ໂດຍສະເພາະການໂຄສະນາເຜີຍແຜ່ວຽກງານຄວາມປອດໄພ ສ້າງສຸຂະພາບແຮງງານ OSH ສັນຍາແຮງງານລວມໝູ່ CBA ແລະ ຂະຫຍາຍການຈັດຕັ້ງກຳມະບານ ເພື່ອປົກປ້ອງກຳມະກອນ ຢູ່ຫົວໜ່ວຍແຮງງານພາກເອກະຊົນ ໂດຍການໂຄສະນາເຜີຍແຜ່ກ່ຽວກັບຜົນກະທົບຂອງທາດໄຍຫີນ ເພື່ອກ້າວໄປສູ່ການກຳຈັດພະຍາດທີ່ພົວພັນກັບທາດໄຍຫີນ ໃນ ສປປ ລາວ ໃຫ້ຫຼຸດລົງ ໄລຍະຜ່ານມາທັງສອງຝ່າຍໄດ້ວາງແຜນເພື່ອຈັດຕັ້ງປະຕິບັດແຕ່ລະກິດຈະກຳ ເປັນຕົ້ນປະສານງານ ແລະ ຈັດປະຊຸມປຶກສາຫາລືຮ່ວມກັນ ເພື່ອອອກແບບຂອງການຈັດກິດຈະກຳຂອງແຕ່ລະກິດຈະກຳ ແລະ ວາງແຜນສ້າງວາລະກິດຈະກຳ ກຳນົດເປົ້າໝາຍ ແລະ ຈໍານວນຂອງຜູ້ເຂົ້າຮ່ວມຈາກພາກສ່ວນທີ່ກ່ຽວຂ້ອງ ໄດ້ປຶກສາຜູ້ຊ່ຽວຊານ ເພື່ອຊ່ວຍໃນການປັບປຸງຖານຂໍ້ມູນ ຈັດກອງປະຊຸມກະກຽມປັບປຸງຖານຂໍ້ມູນ ແລະ ສ້າງຕັ້ງຄະນະຮັບຜິດຊອບວຽກງານທາດໄຍຫີນ ຂັ້ນກະຊວງ ອົງການ ແລະ ກຳນົດຫົວຂໍ້ລະອຽດທີ່ຈະນໍາສະເໜີ ແບ່ງຄວາມຮັບຜິດຊອບໃຫ້ແກ່ຄະນະ ແລະ ອື່ນໆ.
ຜ່ານການຈັດຕັ້ງປະຕິບັດບັນດາໜ້າວຽກຕົວຈິງໃນ 6 ເດືອນຕົ້ນປີຜ່ານມາ ຄະນະກຳມະການວຽກງານທາດໄຍຫີນ ສາມາດປະຕິບັດສຳເລັດຫຼາຍກິດຈະກຳ ເປັນຕົ້ນ ການເອົາໃຈໃສ່ໂຄສະນາເຜີຍແຜ່ ກ່ຽວກັບຄວາມອັນຕະລາຍຂອງທາດໄຍຫີນ ແລະ ກວດສຸຂະພາບເບື້ອງຕົ້ນແກ່ກຳມະກອນ ແລະ ຊຸມຊົນໃກ້ຄຽງໂຮງງານທີ່ນໍາໃຊ້ທາດໄຍຫີນ ໄດ້ຫຼາຍບ້ານເປົ້າໝາຍ ເປັນຕົ້ນຢູ່ເມືອງແປກ ແຂວງຊຽງຂວາງ ສາມາດປະຕິບັດໄດ້ 4 ບ້ານ ຄື: ບ້ານລາດງ່ອນ ບ້ານລີ່ ບ້ານນາຫອຍ ບ້ານນາຄຸນມີ ແລະ ເມືອງບາຈຽງ ຈະເລີນສຸກ ແຂວງຈຳປາສັກ ມີ 4 ບ້ານ ຄື:ບ້ານ ຫ້ວຍລືສີ ລົ່ມສັກເໜືອ ຫຼັກ 12 ແລະ ບ້ານ 13 ພ້ອມນີ້ໄດ້ຜະລິດສື່ໂຄສະນາສໍາລັບພະນັກງານ-ລັດຖະກອນ ເສີມສ້າງຄວາມສາມາດໃຫ້ແກ່ຄະນະຮັບຜິດຊອບໃນການຄຸ້ມຄອງໂຄງການ ແລະ ດໍາເນີນການໂຄສະນາ ນອກນີ້ຍັງໄດ້ສຳເລັດການກະກຽມກອງປະຊຸມ ລະດັບວິຊາການຕ່າງໆເປັນຕົ້ນ ກອງປະຊຸມກະກຽມສ້າງຮ່າງແຜນປະຕິບັດງານແຜນຍຸດທະສາດ ວຽກງານທາດໄຍຫີນ ເກັບກຳຂໍ້ມູນຂັ້ນແຂວງ ເປົ້າໝາຍ ແລະ ຂໍ້ມູນຈາກກະຊວງທີ່ກ່ຽວຂ້ອງ ລວມທັງຝຶກອົບຮົມວຽກງານຄວາມປອດໄພ ຈາກທາດໄຍຫີນ ແລະ ອື່ນໆ.
ທີ່ມາ: ວຽງຈັນທຸລະກິດສັງຄົມ
