ບຸນຊ່ວງເຮືອປະເພນີປະຈໍາປີ ພສ 2566 ຄສ 2023 ໂອກາດບຸນຫໍ່ເຂົ້າປະດັບດີນ ທີ່ນະຄອນຫຼວງພະບາງ ໄດ້ຈັດຂຶ້ນໃນວັນທີ່ 14 ກັນຍາ 2023 ນີ້ ໃຫ້ກຽດເຂົ້າຊົມ ມີ ທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກລັດຖະມົນຕີ, ພ້ອມດ້ວຍການນຳຂັ້ນແຂວງ, ຂັ້ນນະຄອນ- ເມືອງ, ແຂກຮັບເຊີນ, ມວນຊົນທັງພາຍໃນ ແລະຕ່າງປະເທດ ຕາມແຄມຝັ່ງນ້ຳຄານ. ເປັນປະຈຳທຸກປີ ພໍຮອດມື້ແຮມ 14 ຄໍ່າເດືອນ 9 ທີ່ຊາວຫຼວງພະບາງ ເມືອງມໍລະດົກໂລກ ໄດ້ຈັດໃຫ້ມີການຊ່ວງເຮືອປະເພນີ, ອັນເປັນປາງບຸນໜຶ່ງ ທີ່ໄດ້ສືບທອດກັນມາໄດ້ຫຼາຍເຊັ່ນຄົນ ຈົນມາເຖິງປັດຈຸບັນ ເປັນການສະແດງເຖິງ ພາລະກຳລັງ ຄວາມສາມັກຄີ ແລະ ບົດຮຽນ-ປະສົບການ ພ້ອມທັງເປັນການບູຊາພະຍານາກ 15 ຕະກູນ ທີ່ເປັນເຈົ້າປົກປັກຮັກສາຊາວຫຼວງພະບາງ ແລະປົກປັກຮັກສາບ້ານເມືອງ ໃຫ້ມີຄວາມຈະເລີນຮຸ່ງເຮືອງ ແລະຢູ່ເຢັນເປັນສຸກຕະຫລອດໄປ. ສຳລັບປີນີ້ ມີເຮືອຊ່ວງປະເພນີຈາກບັນດາບ້ານພາຍໃນນະຄອນຫຼວງພະບາງ, ຕາງໜ້າຈາກເມືອງອ້ອມຂ້າງ, ເຂົ້າຮ່ວມແຂ່ງຂັນລວມທັງໝົດ 22 ລໍາ, ຜ່ານການແຂ່ງຂັນທ່າມກາງສຽງຊົມສຽງເຊຍຢ່າງມ່ວນຊື່ນ ຕາມແຄມຝັ່ງນ້ຳຄານຜົນປະກົດວ່າ: ທີ 1 ເຮືອຊ່ວງບໍລິສັດຫຼວງພຣະບາງສະມາຣ໌ດຊິດຕີ້ ໄດ້ຮັບຂັນເງິນນ້ຳໜັກ 1.500 ກຼາມ, ເປັນຂັນຄອງແຊ້ມ 3 ປີ (ປີທຳອິດ) ພ້ອມຂັນແຊ້ມປະຈໍາປີ ເປັນຂັນເງິນ ນໍ້າໜັກ 1 ກິໂລກຼາມ ແລະເງິນສົດ 17.000.000 ກີບ, ທີ 2 ເຮືອຊ່ວງບໍລິສັດເຈົ້າຫລວງ ບ້ານນູນສະຫວາດ, ໄດ້ຮັບຂັນເງິນ ນ້ຳໜັກ 800 ກຼາມ ພ້ອມເງິນສົດ 16.000.000 ກີບ, ທີ 3 ເຮືອຊ່ວງນາວາຜານາກທະນາຄານ ແລະສະຖາບັນການເງິນ ໄດ້ຮັບຂັນເງິນນ້ຳໜັກ 500 ກຼາມ ພ້ອມເງິນສົດ 15.000.000 ກີບ, ທີ 4 ເຮືອຊ່ວງ ວັດຊຽງທອງ ໄດ້ຮັບເງິນສົດ 14.000.000 ກີບ, ທີ 5 ເຮືອຊ່ວງເມືອງໂພນທອງ ບໍລິສັດ KY ບຸບຜາ, ໄດ້ຮັບເງິນສົດ 13.000.000 ກີບ, ທີ 6 ເຮືອຊ່ວງບ້ານເມືອງຂາຍ ພະແນກສຶກສາທິການ ແລະ ກິລາແຂວງ ໄດ້ຮັບເງິນສົດ 12.000.000 ກີບ, ທີ 7 ເຮືອຊ່ວງເມືອງໂພນໄຊ ວັດຫາດຫ່ຽນ ໄດ້ຮັບເງິນສົດ 11.000.000 ກີບ, ທີ 8: ເຮືອຊ່ວງເມືອງຊຽງເງິນ ບ້ານປາກແວດ ໄດ້ຮັບເງິນສົດ 10.000.000 ກີບ, ທີ 9 ຮ່ວມລວມມີ: ເຮືອຊ່ວງບ້ານສັງຄະໂລກ ລາວແກັສ, ເຮືອຊ່ວງບໍລິສັດເລີຄູນໂຊກ-ເຮືອນພັກໄຊດາຣາ ບ້ານຄົກມັນ, ເຮືອຊ່ວງ ພະທາດຫມາກໂມບ້ານອາໄພ ກຸ່ມວິຊຸນ ແລະເຮືອຊ່ວງບ້ານປາກເຊືອງ ໄດ້ຮັບລາງວັນເງິນສົດ ລາງວັນລະ 11.500.000 ກີບ, ທີ 13 ຮ່ວມລວມມີ: ເຮືອຊ່ວງບ້ານຊຽງລ້ອມ, ເຮືອຊ່ວງບ້ານທາດຫລວງ ກຸ່ມວັດທາດ, ເຮືອຊ່ວງນາວາປາກຄານ ບ້ານໂພນສະອາດ, ເຮືອຊ່ວງບ້ານຊ່າງໄຫ ພັດທະນາ ໄດ້ຮັບລາງວັນເງິນສົດ ລາງວັນລະ 11.000.000 ກີບ, ທີ 17 ຮ່ວມລວມມີ: ເຮືອຊ່ວງສະຖາບັນການເງິນຈຳປາລາວ, ເຮືອຊ່ວງເມືອງປາກອູ ບໍລິສັດພົນທະຈັກບໍ່ແຮ່ ຈຳກັດ, ເຮືອຊ່ວງບ້ານຜານົມ ວັດໃຫມ່ສຸວັນນະພູມາຣາມ ສວນລາດແລງ, ເຮືອຊ່ວງ ບ້ານຖິ່ນຊົມ, ເຮືອຊ່ວງເທບທິດານາຄີ ບ້ານພັນຫລວງ ແລະເຮືອຊ່ວງ ບ້ານສະເລື່ອນ ເມືອງຈອມເພັດ, ໄດ້ຮັບລາງວັນເງິນສົດລາງວັນລະ 10.500.000 ກີບ. ພ້ອມນີ້ໄດ້ມີລາງວັນເຮືອງາມ ທີ່ 1 ແມ່ນເຮືອຊ່ວງບ້ານຜານົມ ວັດໃຫມ່ສຸວັນນະພູມາຣາມ ສວນລາດແລງ ໄດ້ຮັບລາງວັນເງິນສົດ 3.500.000 ກີບ, ທີ່ 2 ເຮືອຊ່ວງ ວັດຊຽງທອງ ໄດ້ຮັບລາງວັນເງິນສົດ 2.500.000 ກີບ, ທີ່ 3 ເຮືອຊ່ວງສະຖາບັນການເງີນຈຳປາລາວ ແລະເຮືອນາງດຳ-ນາງດ່ອນ ໄດ້ຮັບລາງວັນລະ 3.500.000 ກີບ, ໃຫ້ກຽດມອບລາງວັນໂດຍ ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ພ້ອມດ້ວຍການນຳຂອງແຂວງ ແລະຄະນະກຳມະການຈັດການແຂ່ງຂັນ.
ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ
