ອຸດສາຫະກໍາເຮືອນໍາທ່ຽວທີ່ນະຄອນຊານຢ້າ, ແຂວງໄຫຫລໍາ (ໄຫໜານ) ເຊິ່ງເກາະຢູ່ໃຕ້ສຸດຂອງຈີນ ທີ່ຂຶ້ນຊື່ລືນາມດ້ານການທ່ອງທ່ຽວ ແລະ ເປັນໄຂ່ມຸກແຫ່ງທະເລຈີນໃຕ້ ໄດ້ຮັບການຂະຫຍາຍຕົວຢ່າງຕໍ່ເນື່ອງ ເພາະໄດ້ຮັບຄວາມນິຍົມສູງຈາກນັກທ່ອງທ່ຽວທັງພາຍໃນ ແລະ ຕ່າງປະເທດ.
ອີງຕາມຂໍ້ມູນຈາກການໃຫ້ສໍາພາດຂອງພະນັກງານບໍລິສັດ Sanya Qilin Cruise ship.co. ໃຫ້ຮູ້ວ່າ: ໃນນະຄອນຊານຢ້າ ມີບໍລິສັດເຮືອນໍາທ່ຽວ 78 ບໍລິສັດ, ມີ 37 ສະໂມສອນ, ມີເຮືອທີ່ລົງທະບຽນທັງຫມົດ 1.786 ລໍາ, ຈັດຢູ່ອັນດັບຫນຶ່ງຂອງຈີນທີ່ມີເຮືອນໍາທ່ຽວແບບນີ້ເປັນຈໍານວນຫລາຍ, ແຕ່ລະມື້ມີນັກທ່ອງທ່ຽວມາໃຊ້ບໍລິການຫຼາຍພັນຄົນ.
ເຮືອນໍາທ່ຽວ ກໍຄືການລ່ອງເຮືອດັ່ງກ່າວ ທີ່ນະຄອນຊານຢ້າ ໄດ້ຮັບຄວາມນິຍົມຫລາຍໃນໄລຍະຫລາຍປີມານີ້ ເຮັດໃຫ້ຜູ້ປະກອບການດ້ານນີ້ຫຼາຍຄົນເຖິງຂັ້ນລົງທຶນຊື້ເຮືອໃຫມ່ມາເພີ່ມໃນກິດຈະການຂອງຕົນຫລາຍລໍາ.
ສໍາລັບວິທີເຊົ່າເຮືອບໍລິການນໍາທ່ຽວ ມີ 2 ຮູບແບບ ຄື: ການເຊົ່າເໝົາລໍາ ແລະ ການຮ່ວມເໝົາເຮືອກັບຄົນອື່ນ ຕາມເວລາ ກໍຄື ລາຄາທີ່ຕົກລົງກັນ. ໃນນີ້ ຖ້າແມ່ນໄລຍະແຫ່ງການທ່ອງທ່ຽວ ເຮືອຈະຖືກຈອງໄວ້ກ່ອນຢ່າງຫລວງຫລາຍ.
ຊານຢ້າ ເປັນນະຄອນ ຫລືເມືອງຫນຶ່ງທີ່ຂຶ້ນກັບແຂວງໄຫຫລໍາ, ສປ ຈີນ ເຊິ່ງເປັນນະຄອນແຫ່ງການທ່ອງທ່ຽວ ທີ່ນັກທ່ອງທ່ຽວທົ່ວໂລກຮູ້ຈັກກັນດີ ເພາະມີສະຖານທີ່ທ່ອງທ່ຽວທີ່ຫລາກຫລາຍ, ໃນນີ້ ລວມທັງການບໍລິການເຮືອນໍາທ່ຽວຢູ່ດ້ວຍ.
ດັ່ງນັ້ນ, ຖ້າທ່ານໃດໄດ້ມີໂອກາດເດີນທາງມາທີ່ແຂວງໄຫຫລໍາ ບໍ່ຄວນພາດໂອກາດໃນການໄປຂີ່ເຮືອທ່ອງທ່ຽວຊົມທໍາມະຊາດ ກໍຄື ທິວທັດທີ່ສວຍງາມຂອງນະຄອນຊານຢ້າ ຮັບຮອງຈະບໍ່ຜິດຫວັງຢ່າງແນ່ນອນ.
